Hing ang amăng hrơi: 24/6/2021

VOV4.Jarai-Lơ 23/6, ƀơi anom bruă khua mir sir, ơi Nguyễn Xuân Phúc Khua mir sir dêh čar ta hơmâo tŭ jưm Khua ding jum pơtom hiăp dêh čar Hàn Quốc, Chung Eui Yong nao mă tơngan, lơ̆m rai čuă jơmư Việt Nam mơ̆ng lơ 21-23/6/2021.

 

Ƀơi mông bưp, Khua mir sir ơi Nguyễn Xuân Phúc lăi pơtong, bruă ngă giăng mah rô nao rai dua bơnah dêh čar jing bruă pơsit tong ten, dơ̆ng mơ̆ng khua mua pơprong truh kơ khua mua djop ding jum anom bruă, laih anun mơnuih ƀôn sang Việt Nam. Khua mir sir ơi Nguyễn Xuân Phúc rơkâo, Ding jum pơtom hiăp hăng djop anom bruă dua bơnah ngă hrom kjăp, pơtrut tŭ yua hloh bruă ngă gơyut gơyâo giăng mah khua mua pơprong hăng djop gưl, pơdah thâo tơlơi pơčeh phrâo bruă mă kiăng găn rơgao hĭ tơlơi lông lăng tơnap tap klin kheng ngă; pok prong hloh hnong pơkra ming hăng sĭ mơdrô tuh pơ alin mơ̆ng Hàn Quốc rai pơ Việt Nam.

Kơ bruă amăng kual, jar kmar, Khua ding jum, Chung Eui Yong lăi, Ding jum pơtom hiăp dêh čar Hàn Quốc ăt pơtrut ngă hrom kjăp hăng Việt Nam amăng mông jơnum lu bơnah dêh čar hăng hơdôm tơlơi dua bơnah hơdai bơ gleng nao; čang rơmang Việt Nam ăt djru hrom pơtrut bưp nao rai, ngă hrom pơsir kơđi tơlơi ƀơi bul pơtâo Triều Tiên.

Nay Jek: Pơblang

ČRUAI PƠHIĂP DJUAI ɃIĂ VOV4 KUAL DAP KƠDƯ
Anih ngă bruă: 19 A Lê Duẩn, plơi prong Ƀuôn Ma Thuột, tơring čar Dak Lak, Việt Nam
Khua git gai: Vũ Hải  Định
Kơ-iăng Khua git gai: Ngô Quang Khương