Hing ang amăng hrơi: 4/12/2021

 

VOV4.Jarai - Tlam mơmot lơ 3/12, ƀơi Sang bruă pơ ala mơnuih ƀon sang dêh čar, Khua git gai pơ ala mơnuih ƀon sang ơi Vương Đình Huệ git gai jơnum ngă bruă hăng Khua apăn bruă Jơnum min Mơnuih mơnam hăng hơdôm anom bruă bơdjơ̆ nao kơ bruă Kơnuk kơna pơdah pơƀuh kơ Jơnum min khua apăn bruă brơi ngă sa dua tơlơi pơkôl pơkă, hơdră djru phara hơjăn amăng bruă pơhlôm pơgang klin Covid-19 kiăng dưi ngă Hơdră bruă abih bang kơ pơhlôm pơgang klin Covid-19. Pơhiăp ƀơi mông jơnum, hơdôm tơlơi pơgôp hiăp hơmâo lăi nao rơđah rơđông ƀơi rim tơlơi djru. Kơ mơnuih djru tlâ̆o pơgang, pơčrang kman, wai lăng hăng pơjrao mơnuih ƀă klin Covid-19, kơnuk kơna kiăng lăng rơđah anŏ phara hăng bruă pơkŏn, anom bruă khăm pơjrao tơlơi ruă, sang ia jrao čơkă pơjrao mơnuih ruă.

 

Anih jơnum.

 

Khua git gai pơ ala mơnuih ƀon sang dêh čar ơi Vương Đình Huệ lăi yôm kơ bruă kiăng biă hơmâo tơlơi pơtrun mơng Jơnum min khua apăn bruă pơ ala mơnuih ƀon sang dêh čar brơi ngă tui hơdôm tơlơi pơkôl pơkă, tơlơi ngă bruă phara hơjăn kiăng Kơnuk kơna pơtrun hăng pok pơhai ngă tui Hơdră bruă abih bang kơ pơhlôm pơgang klin covid-19. Khă hnun, tơlơi pơplih mơng Tơlơi pơtrun anai kơnong pơƀut nao hơdôm hơdră ngă bruă yôm phara hơjăn kơ bruă pơgang klin Covid-19 phara hăng tơlơi pơkôl mơng tơlơi phiăn ƀudah aka ƀu hơmâo tơlơi phiăn ră anai pơsit brơi ôh.

Siu H’Mai: Pơblang

ČRUAI PƠHIĂP DJUAI ɃIĂ VOV4 KUAL DAP KƠDƯ
Anih ngă bruă: 19 A Lê Duẩn, plơi prong Ƀuôn Ma Thuột, tơring čar Dak Lak, Việt Nam
Khua git gai: Vũ Hải  Định
Kơ-iăng Khua git gai: Ngô Quang Khương