Hing ang amăng hrơi: 24/5/2022

VOV4.Jarai-Hơdôm hrơi giăm anai, djop sang ia jrao amăng tơring čar Dak Lak ăt tŭ jum lu čơđai muai arăng ba nao pơkă lăng hăng pơjrao yua ƀă tơlơi ruă kơčung ƀek, plă tơkai, tơngan. Lăp gleng nao biă mă ñu, lu čơđai ruă kơčung ƀek, tơkai, tơngan samơ̆ amĭ ama ƀu thâo ôh, truh nao đih pơ sang ia jrao lĕ kraih laih.

Wai lăng hăng čem rông ană ñu kiah rơbêh 10 blan samơ̆ hlăk dŏ ruă kơčung amăng bah, plă tơkai, tơngan ƀơi sang ia jrao prong kual Dap Kơdư, Vũ Thị Hương dŏ pơ tơring glông Krông Pač, tơring čar Dak Lak brơi thâo, 1 wơ̆t hrơi tơjuh hlâo kơ anun, sang anŏ ñu ƀuh ană nge duăm hlor, pơ-iă drơi jăn, hia, laih anun ƀlĕ pơđeh amăng plă tơngan anun yơh ba nao pơ sang ia jrao tơring glông pơjrao. Tơdơi kơ 2 hrơi dŏ đih pơ sang ia jrao tơring glông, duăm jai kraih, anun rơkâo ba nao pơ sang ia jrao prong kual Dap Kơdư.

“Mơ̆ng hlâo lăng tivi, ƀing ơi ia jrao lăi tơlơi duăm anai hŭi biă mă anun ƀuh ană tui anun ba nao pơ sang ia jrao mơtam. Ƀing amĭ ƀuh ană duăm pơ-iă drơi ba nao pơ sang ia jrao brơi ơi ia jrao pơkă lăng, ƀu lui pơ sang ôh, hŭi biă mă”.

Ơi ia jrao sang ia jrao prong kual Dap Kơdư hlăk ĕp lăng pơjrao kơ čơđai muai ruă

kơčung ƀek plă tơkai tơngan

Ăt amăng anih pơjrao kơ čơđai muai duăm ruă lơ̆m sang ia jrao prong kual Dap Kơdư, amai Nguyễn Thanh Thảo dŏ pơ tơring glông Čư̆ Kuin, tơring čar Dak Lak brơi thâo, ñu aka ƀu abih mơ̆n hŭi yua hơdôm hrơi rơgao ƀuh anaw ñu kơhñăk na nao đôč yua tơlơi ruă kơčung ƀek plă tơkai tơngan anai ngă.

7 mông mơguah ƀing ơi ia jrao ĕp lăng giong ană hlong kơhñăk mơtam, rơbêh 10 mơnit kah abih, truh 2 mông tlam gơ̆ kơhñăk dơ̆ng, sit 10 mơnit kơhñăk hlong bơrơbah amăng 30 mơnit ƀu hơdor dơ̆ng tah, sa tơlơi duăm kraih biă mă amăng hrơi. Tơlơi ruă anai hŭi rơhyưt đơi hăng ană gơmơi, kraih hmar hăng ƀu hmao thâo mơtam”.

Ơi ia jrao Trần Thị Thúy Minh, Khua anom pơjrao ƀing čơđai muai pơ sang ia jrao prong kual Dap Kơdư brơi thâo, ră anai sang ia jrao prong hlăk tŭ jum pơjrao brơi kơ čơđai ƀă tơlơi duăm ruă kơčung ƀek hăng plă tơkai, tơngan, kơnong sa wơ̆t hrơi tơjuh rơgao đôč, Anom pơjrao duăm ruă kơ čơđai hơmâo tŭ jum 10 čô mơnuih ruă. Tui hăng ơi ia jrao Minh lăi, tơlơi ruă kơčung ƀek plă tơkai tơngan juăt hơmâo ƀơi ƀing čơđai gah yŭ 5 thun, biă mă ñu čơđai 3 thun. Tơlơi ruă anai tañ ƀă biă mă. Čơđai muai juăt ƀă kman mơ̆ng mơnuih ruă ƀă laih kman kơčung ƀek plă tơkai tơngan, ƀudah ƀă mơ̆ng gơnam djă ngui, djă apăn kơƀang grê, bah amăng sang đơ đa….

Rao tơngan rơgoh na nao jing hơdră tŭ yua hloh pơgăn ƀă kman tơlơi ruă

 kơčung ƀek plă tơkai tơngan

Sit hơmâo tơlơi ruă, čơđai mưn ƀuh kah hăng, ruă rơkông đok, ƀlĕ pơđeh, kơčung kơbum ia ƀơi plă tơngan hăng plă tơkai ƀudah ƀơi tong klôn. Tơdah djong lĕ, mơnuih ruă ñu amra hlao mă hơjăn hơdôm hrơi tơdơi kơ anun. Samơ̆, hơmâo mơ̆n ƀing ruă kơtang ƀu hơmâo pơjrao tañ bơbeč truh ruă dlô hăng pioh glăi tơlơi sat kơ čơđai kah hăng ruă sơ̆l dlô yua kman virus ngă.

Tơlơi ruă anai ñu mưn pơƀuh phara biă mă hăng tui hluai hnong kơtang ƀudah tơdu truh kraih. Tui anun ƀing amĭ ama hơmâo ană nge, ană dŏ anet lĕ khom kơđiăng nao kơ ană bă pô tơdah ƀuh duăm hlor pơ-iă drơi, hơmâo nam kơčung plă tơkai, tơngan laih anun pơtong glăi hnong tơdu hăng kơtang pioh pơjrao hmao kru”.

Ăt tui hăng ơi ia jrao Trần Thị Thúy Minh, tơlơi ruă kơčung ƀek plă tơkai tơngan lĕ ƀă kman kơtang biă, aka ƀu hơmâo ia jrao tlâ̆o pơgang hlâo ôh. Bruă pơhlôm pơgang tui hluai tơlơi thâo hluh rơnăk drơi jăn, pơgang hơdjă kơ čơđai muai, mơnuih wai lăng čơđai muai, khom rao tơngan na nao hăng ia hơdjă laih anun ia čơƀu, rao rơgoh na nao gơnam yua rĭm hrơi, anŏ čơđai muai djă ngui. Hăng čơđai ƀă tơlơi ruă plă tơkai hăng tơngan, dưi pơjrao pơ sang anŏ. Mah tui anun, amĭ ama čơđai khom krăo lăng tong ten sit ƀuh duăm hlor pơ-iă drơi lĕ ba nao pơ sang ia jrao mơtam, kiăng kơ ƀing ơi ia jrao ĕp lăng pơjrao hmao kru.

Vũ Nam Trang pô čih-Nay Jek: Pơblang

ČRUAI PƠHIĂP DJUAI ɃIĂ VOV4 KUAL DAP KƠDƯ
Anih ngă bruă: 19 A Lê Duẩn, plơi prong Ƀuôn Ma Thuột, tơring čar Dak Lak, Việt Nam
Khua git gai: Vũ Hải  Định
Kơ-iăng Khua git gai: Ngô Quang Khương