Ngai lơi kung tam gơl mờ bơsir pa: 28/7/2021

VOV4.K’ho- Ngai do, 28/7, Quốc hội pơrjum tơn jơh pơrjum dơ̆ 1, Quốc hội khoá 15. Lài mờ tŭ tơn jơh pơrjum, Quốc hội ring bal ală Nghị quyết bè kĭ ring bal broă pồ Phó Thủ tướng, Bộ trưởng, Kuang bàng ndai bơh Chính phủ dê; Nghị quyết kĭ ring bal Phó Chủ tịch lơgar mờ ală Kuang bàng Mpồl duh broă sền gàr dà lơgar mờ sền gàr bơta lơngap lơngai; ring bal Nghị quyết bè kĭ ring bal broă pồ Kuang bàng cah rña Anih cah rña làng bol dờng ngan rlau jơh. Quốc hội kung pờ tê ring bal Nghị quyết bè kĭ ring bal broă kờp dŭ tơn jơh dơ̆ ngui priă jền dà lơgar nam 2019. Nghị quyết bè broă rơndap lơh priă jền dà lơgar 5 nam tơngai bơh nam 2021-2025. Nghị quyết bè gùng dà broă lơh bơcri priă Broă lơh jơnau kờñ dà lơgar Tơrmù rƀah kơ̆ kơljap tơngai bơh nam 2021-2025. Nghị quyết bè gùng dà broă lơh bơcri priă Broă lơh jơnau kờñ dà lơgar bơt bơtàu ƀòn lơgar pa tơngai bơh nam 2021-2025 mờ Nghị quyết bè broă rơndap lơh bơcri priă dà lơgar dimơ tơngai tơngai bơh nam 2021-2025.

Lồi ƀùi mho ngai 27/7, Quốc hội pơrjum bơdìh jiơ lơh broă, neh pờ tê ring bal 3 Nghị quyết kuơ màng hơ̆ là: Nghị quyết bè Broă rơndap lơh bơtàu tơnguh lơh sa- mpồl bơtiàn 5 nam bơh nam 2021-2025. Nghị quyết bè Broă lơh bơt bơtàu adat, kơrnoat sồr nam 2022, tam gơl pa Broă lơh bơt bơtàu adat, kơrnoat sồr nam 2021. Nghị quyết bè broă crơng gơs Mpồl gròi sền tơngume bơh Quốc hội nam 2022. Pal sền gròi ngan là, nam 2022, Quốc hội sền sơwì, ai jơnau đơs tam gơl pa Adat Ù tiah.

Cau mblàng K’Hạnh

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định