Ngai lơi kung tam gơl mờ bơsir pa: 13/5/2021

VOV4.K’ho- Tàm 4 nhai bồ nam do, priă geh bơh broă tăc phan mờ lơgar bơdìh càr Gia Lai dê gơguh wơl pràn ngan mờ khà gơguh mờr 48% pơn drờm mờ tŭ do nam 2020. Den tàng, broă lơh gơs jăt jơnau kờñ geh 610 tơlăk dolar Mỹ tàm nam 2021 là gơtùi geh ngan.

Tŭ do, phan tăc mờ lơgar bơdìh tờm ngan càr dê kung gam là kơphe, cao su, tiêu, biăp, plai chi... Ală bơta phan do neh geh măt tàm drà kă bro bơh mờr 40 lơgar. Tàm hơ̆ kuơ màng là geh ờ uă bơta phan neh di pal mờ jơnau kờñ bè bơta niam bơh drà kă bro kal ke ngan bè: lơgar Mỹ, mpồl tam klăc châu Âu, lơgar Nhờk. Geh pơnrơ ngan là kơphe mờ priă tăc geh rơlao 300 tơlăk dolar tàm 1 nam. Gùt càr geh di pơgăp 30 mpồl lơh sa kă bro tus bal tăc mờ lơgar bơdìh, tàm hơ̆ geh 11 mpồl lơh sa kă bro tăc phan geh lơh bơh broă lơh sa suơn sre. Tŭ do priă geh bơh tăc phan mờ lơgar bơdìh bơh mpồl phan geh lơh bơh broă lơh sa suơn sre dê geh di pơgăp 80%. Kuang đơng lam Sở Công thương càr Gia Lai pa lơh broă mờ ală mpồl lơh sa kă bro nàng sền wơl broă tăc phan mờ lơgar bơdìh nàng di tŭ gĭt ală kal ke, broă lơh ờ pràn tàm broă lơh jăt ală cơ chế, broă lơh bơh Dà lơgar gơwèt mờ gah tăc phan mờ lơgar bơdìh.

Cau mblàng Ndong Brawl

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định