Ngai lơi kung tam gơl mờ bơsir pa: 28/7/2021

VOV4.K’ho- Bơta jal mhar tŭ do pal tàm ntoăt pơrlòng kờp jơh jiơ mờ phuk nàng tam dră mờ kòp. Bol he pal sang tĕ bè lơh sa, làng bol sang tĕ bơta chờ hờp bơh he dê, pal bòl glar kal ke tàm dùl tŭ tơngai nàng tam lơh jai pha mờ kòp. Dilah ƀươn ƀoài, geh lơh hoàc hươr dờng ngan.

Hơ̆ là jơnau đơs nền bơh ồng Vũ Đức Đam- Phó Thủ tướng Chính phủ dê mơkung là Kuang ătbồ Mpồl đơng lam Dà lơgar rơcăng sơndră kòp Covid-19 tàm dơ̆ lòt sền broă lơh rơcăng sơndră kòp mờ sơm kòp ai cau kòp Covid-19 in tàm Hìu sơnơm Ling klàng 175 gơwèt Bộ Quốc phòng tàm ngai 27/7. Tàm dơ̆ lơh broă, ồng Nguyễn Hồng Sơn- Thiếu tướng, Kuang ătbồ Hìu sơnơm Ling klàng 175 dan ai gơnoar hìu sơnơm in lơh ală broă rơndăp lơh sơm kòp Covid-19 tàm ală bơta gơbàn kơn jơ̆ rlau, rơcăng lài khà cau kòp gơguh. Hìu sơnơm kung dan ƀòn dờng Hồ Chí Minh dong kờl măy mok, phan bơna, sơnơm tơm ba, ai bơtơl tai hìu sơnơm in vaccine rơcăng sơndră kòp Covid-19...

Ồng Vũ Đức Đam- Phó Thủ tướng Chính phủ sồr ƀòn dờng Hồ Chí Minh tơrgùm bơta pràn nàng sơm kòp ai cau kòp Covid-19 in, jơnau kờñ dờng ngan rlau jơh là tơrmù khà cau chơ̆t. Poh lài, khà cau bơtờp kòp kờp bal pah ngai tàm ƀòn dờng Hồ Chí Minh kung gam rlau 4 rbô nă, uă ngan rlau jơh tàm gùt lơgar.

Cau mblàng Lơ Mu K’Yến

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định