Ngai lơi kung tam gơl mờ bơsir pa: 15/5/2021

VOV4.K’ho- Drim ngai 14/5, tàm kơnhoàl Củ Chi, ƀòn dờng Hồ Chí Minh, ồng Nguyễn Xuân Phúc Chủ tịch lơgar mờ ală cau tơlik mat tĕ khà Kuang bàng Quốc hội khóa 15 tìp mat mờ cau tĕ khà jat broă lơh pờ tơlik tơn tàm internet.

                                     Chủ tịch lơgar tìp mat mờ cau tĕ khà tàm kơnhoàl Củ Chi

  Đơs tàm dơ̆ tìp mat, ồng Nguyễn Xuân Phúc đơs nền: dilah là Kuang bàng Quốc hội den lài ngan là pal iăt, kơno jơnau kơ̆p kờñ bơh cau tĕ khà dê, đơs di tŭ tus mờ Quốc hội, Đảng, Dà lơgar, anih lơh broă geh gơnoar bơsong ală jơnau đơs, jơnau dan di pal bơh cau tĕ khà tiah he tơlik mat tĕ khà. Chủ tịch lơgar pà gĭt, geh rcang lài lơh ngan tă pơgồp tơnguh uă cồng nha lơh broă bơh Kuang bàng Quốc hội ƀòn dờng Hồ Chí Minh dê, mpồl dờng ngan rlau jơh gùt lơgar.

Chủ tịch lơgar sền gròi tus lam lơh 4 broă lơh bơtàu tơnguh ƀòn dờng Hồ Chí Minh neh ai tơlik, tàm hơ̆ geh broă tơnguh uă bơta niam ală tiah gơtìp ngơr bam dà, trồ tiah lơh aniai mờ tơnguh uă bơta pràn tàm pơrlòng bơh ƀòn dờng dê, gàr niam tiah ơm kis tơlir, ờdo ờdă. Jơh ală Kuang bàng Quốc hội bơh ƀòn dờng dê đơs bal pal geh kơnòl broă bơt bơtàu ƀòn dờng Hồ Chí Minh ngăc ngar, pa - geh nùs nhơm, bơt bơtàu bơhiàn niam chài rơgơi.

Cau mblàng K’Hạnh

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định