Ngai lơi kung tam gơl mờ bơsir pa: 29/7/2021

VOV4.K’ho- Tàm ală ngai do, tàm càr Dak Lak sùm geh ală cau bơtờp kòp Covid-19 pa. Mờ nùs nhơm “tiah lơi kờñ den ơruh pơnu geh”, ală đoàn viên ơruh pơnu ƀòn dờng Buôn Ma Thuột, càr Dak Lak gam ngai mang pơgồp bal bơta pràn bal mờ ală mpồl lơh broă ndai dong kờl kơryan kòp Covid-19. Ban Thường vụ Tỉnh đoàn Dak Lak neh sồr ală kấp bộ Đoàn pơn jat tai gàr broă lơh bơh 270 mpồl dong kờl rơcang sơndră kòp Covid-19.

Ơm gròi sền tàm gùng tiah đah jum ƀòn dờng Buôn Ma Thuột, anih gròi sền kòp bơtờp tàm rbàng 14, gùng Hồ Chí Minh (gùng rơndeh 14 gơl lòt gan xã Hòa Phú), dùl ngai mang rò git nđờ rbô dơ̆ cau mut lơh sră nggal yal bè tiah lòt rê. Bal mờ ală mpồl ndai, ală đoàn viên ơruh pơnu lơh broă dong kờl is tus bal sền gròi, pơlam tam pà gùng lòt, dong kờl làng bol lơh sră nggal yal tiah lòt rê mờ tơmut dữ liệu. Bi Y Phong Êban, Bí thư Đoàn xã Hòa Phú, ƀòn dờng Buôn Ma Thuột pà git: “Mpồl ơruh pơnu bơh xã dê tus bal bơh mho ngai 31/5 tŭ sơn đờm geh anih sền gròi kòp bơtờp tàm gùng rơndeh 14 gơl lòt gan xã. Tơnơ̆ tŭ dơ̆ bơtờp kòp pa do ngan rlau jơh gơbàn tàm ƀòn dờng Buôn Ma Thuột kung geh jơnau sồr Thành đoàn Buôn Ma Thuột ai tai 2, 3 nă đoàn viên tàm ală mpồl bơh cụm sồ 1 dê. Tŭ do, tơl mpồl ai 3 nă oh mi rê tus ndo dong kờl, mìng is đoàn xã neh tơnguh bơh 2 nă tus 3 nă cau tàm dùl dơ̆ gròi sền. Tus bal tàm do jơh den ală bơyô hơ̆ kung tam cah is tàm hìu sơl”.

Bal mờ ơruh pơnu tàm xã, tàm anih gròi sền rơbàng 14 gam geh 8 nă ơruh pơnu lơh broă dong kờl is bơh bòn dờng Buôn Ma Thuột dê tus dong kờl. Bi Trần Thị Huyền Thương, đoàn viên Hìu bơsram Cao đẳng Công nghệ Tây Nguyên pà git: “Tài làng bol rê jơh bal tàm trồ mang kung bè trồ ngai sùm den tàng ală bơyô pal lơh broă jơh bal ngai mang mờ pal tam pà gơp ơm gròi sền. Broă sàu sa, ơm rlô bơh ală bơyô dê ndrờm tơrgùm tàm do tơn. Kung gơlơh kal ke ngan, mơya mờ nùs nhơm cau kơnòm să jơh nùs den bol hi sùm lơh ngan dùl nùs bal mờ at tê bal mờ gơnoar atbồ, bal mờ dà lơgar pơgồp bal bơta pràn sơndră kòp mờ kơp kờñ là bol he gơtùi kơryan kòp dờng”.

Mpồl ơruh pơnu tus bal gròi sền tàm anih sền gròi kòp rbàng 14

Tŭ do, jơh 21 xã, sơnah ƀòn bơh ƀòn dờng Buôn Ma Thuột dê ndrờm neh ai lơh broă wơl mpồl ơruh pơnu lam lài, lam lơh broă mblàng yal rơcang sơndră kòp làng bol in, dong kờl ơm gròi sền tàm anih wàng se, anih gròi sền kòp bơtờp tàm ală gơl gùng mờ dờp, tam pà phan ngui sa pal geh pah ngai dong làng bol mờ ală mpồl tàm tiah gơtìp wàng se. Bi Nguyễn Tuyết Sinh, Phó Bí thư Đoàn sơnah ƀòn Thành Công, ƀòn dờng Buôn Ma Thuột pà git: “Bol hi kung kờñ lơh gơ rề dùl bơta là tŭ do, kòp bơtờp gơlik geh kal ke ngan den tàng ală bơyô đoàn viên ơruh pơnu tàm ƀòn dờng geh nùs nhơm tus bal lơh broă dong kờl is nàng mut tàm mpồl ơruh pơnu lam lài bơh ƀòn dờng dê, tŭ mờ ƀòn dờng hòi den he gơtùi tus bal niam rlau”.

Jat bi H’ Hương BKrông, Phó Bí thư Thành đoàn Buôn Ma Thuột pà git, tàm tơngai kòp gơlik geh kal ke, bơh lồi nhai 5 tus tŭ do, Thành đoàn Buôn Ma Thuột kung hòi jà tă pơgồp phan ngui sa pal geh pah ngai dong kờl ai làng bol tàm ală anih tam cah is, tiah wàng se in mờ pơn jờng ală mpồl gam lơh kơnòl broă. Geh bal nùs nhơm “Sơndră mờ kòp bè dră wơl bol sò tơm”, cau kơnòm să ƀòn dờng Buôn Ma Thuột neh tơnguh gơnoar broă lam lài, dong kờl is, ngai mang lòt bal mờ gơnoar atbồ mờ ală mpồl lơh broă geh gơnoar nàng lam lơh broă kờp sền, jòi cau ơm rềp, tam cah is, đal git tiah geh kòp nàng kơryan kung bè mblàng yal, lam sồr làng bol lơh jat nền nòn ală broă lơh rơcang sơndră kòp bơtờp: “Mờr tus do den Ban Thường vụ Thành Đoàn kung bè Mpồl tam klac ơruh pơnu Việt Nam ƀòn dờng geh lam lơh ală mpồl lơh broă dong kờl. Lài ngan là hòi jà ală mpồl ơruh pơnu lơh broă dong kờl is tàm anih gròi sền Hòa Phú, tơrgùm jơh khà đoàn viên ơruh pơnu mờ kơnòm dềt geh mat tàm ală tiah wàng se tàm ƀòn dờng, kờp dŭ nàng hòi jà dong kờl. Dơ̆ 2 là hòi jà nàng lơh wơl “Hìu ƀềp mang”. Dơ̆ bơtờp kòp nam 2020 den mpồl “Hìu ƀềp mang”  do kung lơh broă geh cồng nha ngan tàm broă trŭ gơm phan sa mang ai ală mpồl lơh broă tàm ală anih wàng se tàm ƀòn dờng in”.

Đoàn viên ơruh pơnu tus bal dờp mờ tam pà phan ngui sa pal geh pah ngai ai ală tiah wàng se in

Lòt bal mờ cau kơnòm să ƀòn dờng Buôn Ma Thuột, pa do, Đoàn ơruh pơnu Kuang àng càr Dak Lak pơgồp bal mờ Thành đoàn Buôn Ma Thuột bal mờ ală cau geh nùs nhơm niam lam lơh còp, pơn jờng mờ jàu pà git nđờ rbô khàr dà, git nđờ jơt hùng ƀung mi, git nđờ rhiang nai tap mờ phan glòm muh mat rơcang sơndră kòp ai mpồl lơh tơn kơnòl broă rơcang sơndră kòp tàm 4 anih gròi sền kòp tàm xã Hòa Phú, Cư Êbur, anih tam cah is tơrgùm bal tàm Hìu ơm bal Hìu bơsram Cao đẳng Công nghệ, gùng dềt  Hà Huy Tập mờ kuang àng sơnah ƀòn Tân An, ƀòn dờng Buôn Ma Thuột.

Tềng đap broă gơlik geh kal ke bơh kòp Covid-19 dê, Ban Thường vụ Tỉnh đoàn Dak Lak neh sồr ală kấp bộ Đoàn pơn jat tai gàr broă lơh bơh 270 mpồl dong kờl rơcang sơndră kòp Covid-19; lơh jat jơnau đơng lam bơh Ủy ban Nhân dân càr Dak Lak dê tàm broă lơh jat ală broă lơh rơcang sơndră kòp. Tàm hơ̆ tơrgùm tơnguh broă lơh mblàng yal, lam sồr làng bol lơh jat ală broă lơh rơcang sơndră kòp Covid-19 mờ ală broă lơh bè: pà chèu glòm muh mat, dà ràu tê ờ sa priă ai anih tam cah is, tiah geh gal cau in; dong kờl priă jền, phan ngui sa pal geh pah ngai drơng ai kuang bàng cau ling mờ ală cau tàm anih tam cah is in; dong kờl làng bol yal tiah lòt rê, phàt sră cih jơnau tơnggit mblàng yal, dong kờl yal tiah lòt rê, sền gàr lơngap lơngai ờdo ờdă tàm ală anih gròi sền kòp.

Cau mblàng K’Duẩn

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định