Ngai lơi kung tam gơl mờ bơsir pa: 14/5/2021

VOV4.K’ho- Ngai 13/5, Mpồl duh broă tĕ khà dà lơgar tus sền broă lơh tĕ khà tàm uă tiah tàm gùt lơgar, nàng kờñ sền gàr ngai chờ tĕ khà geh lơh ờdo ờdă mờ niam bơnĕ. Mpồl gròi sền, lòt sền bơh Ủy ban Thường vụ Quốc hội, Mpồl duh broă tĕ khà dà lơgar dê bơh mò Võ Thị Ánh Xuân- Phó Chủ tịch lơgar, Phó Kuang ătbồ Mpồl duh broă tĕ khà dà lơgar lơh kuang ătbồ mpồl neh lòt lơh broă tàm càr Dăk Nông.

Ồng Nguyễn Văn Được- Thượng tướng, Kuang ătbồ Mpồl cau ling yau Việt Nam, Kuang geh jơng tàm Mpồl duh broă tĕ khà dà lơgar đơs tàm dơ̆ lơh broă

Kung dùl ngai bal, mpồl gròi sền, lòt sền bơh Ủy ban Thường vụ Quốc hội, Mpồl duh broă tĕ khà dà lơgar dê bơh ồng Nguyễn Văn Được- Thượng tướng, Kuang ătbồ Mpồl cau ling yau Việt Nam, Kuang geh jơng tàm Mpồl duh broă tĕ khà dà lơgar lam bồ neh geh dơ̆ lơh broă mờ Ủy ban Tĕ khà càr Dăk Lăk bè broă lơh tĕ khà. Ồng Nguyễn Văn Được đơs niam ngan ală cồng nha mờ Ủy ban Tĕ khà càr Dăk Lăk dê neh lơh geh.

Mơkung sồr, càr Dăk Lăk pơn jăt tai lơh jăt wil tơl ală sră nggal, sră bơto pơlam, jơnau sồr bơh Dà lơgar, bơh càr, bơh kơnhoàl mờ bơh xã dê bè broă lơh tĕ khà. Sền gròi broă lơngăp lơngai rơndăp tăp sèng ờdo ờdă, di tŭ kơryan ală broă lơh tam dră lơh aniai tĕ khà; rơcăng lài jòi gĭt broă gơlik geh, kơryan jơnau jòi kai kờñ lơh aniai geh mpồl; sền dờng màng sền gàr lơngăp lơngai rơndăp tăp sèng ờdo ờdă tàm ală ƀòn lơgar kuơmàng. Ală kấp, ală gah pal pơgồp bal dùl ròt bal, tam jàu broă lơh, kơnòl broă pal loh làng nền cê; sền gàr dơ̆ tĕ khà geh lơh làng bol lơh tờm, di mờ adat boh lam, ờdo ờdă rơcăng sơndră kòp.

Cau mblàng Lơ Mu K’Yến

 

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định