Ngai lơi kung tam gơl mờ bơsir pa: 24/7/2021

VOV4.K’ho - Tàm ală nam do, cau kơnòm să càr Dak Lak neh lơh broă bal mờ broă bơ̆t bơtàu ƀòn lơgar pa mờ uă broă lơh mùl màl. Tŭ do, cau kơnòm să càr Dak Lak gam chồl pràn broă tam chi sền gàr tiah kis, ai khà tam pa geh 120 rơbô tờm chi-dờp jơnau hòi jà tam 1 tơmàn tờm chi bơh Thủ tướng Chính phủ. Bal mờ hơ̆ là uă broă lơh sền gàr tiah kis, pơgồp bal tàm broă bơ̆t bơtàu ƀòn lơgar pa.

Tàm ală broă lơh ngai rơlô tơlir pa geh bơyai lơh, Huyện đoàn Cư̆ Mgar neh pơgồp bal mờ UBND thị trấn Quảng Phú mờ hìu yàng phờk Hoa Nghiêm lơh jăt broă “Tơlăk tờm chi – Tài dùl lơgar Việt Nam tơlir". Bal mờ broă lam sồr hòi jà làng bol tus bal sền gàr, sơnka mờ tơnguh bơtàu tờm chi, lơh geh wơl brê bồ tô dà, ơruh pơnu tàm gùt kơnhoàl neh lĭt lơh broă pơs wàs kloh niam tiah kis, mus pès chi che rŭ rơm, toah wàs rơbòng dà jăt gah ală gùng lòt mờ tam pa gĭt nđờ rơhiang tờm chi.

                              Cau kơnòm să càr Dak Lak neh tam geh 60 robô tờm chi tàm nam do

Bi Y Wal Mlô, Bí thư Huyện đoàn Cư̆ Mgar pà gĭt, bŭ lah gơtìp aniai bơh kòp Covid-19 lơh ală broă lơh pal lơh tam cah is, lơh dềt, mơya gùt kơnhoàl neh tam pa geh mờr 14 rơbô 600 tờm chi ală bơta. "Tàm tơngai pa do den kung hòi jà gùt mpồl ală bơyô đoàn viên ơruh pơnu tàm kơnhoàl ai tơngŏ gơnoar, kơnòl bơh să tờm tàm broă sền gàr tiah kis mờ broă lơh mùl màl. Tàm hơ̆, bol añ lam sồr tơl nă bơyô đoàn viên ơruh pơnu, tơl nă oh mi tàm mpồl đơng lam ală xã mờ kơnhoàl tam mờ sền gàr 1 tờm chi nàng lài ngan là lơh geh uă broă lơh tam 1 tơmàn tờm chi bơh Chính phủ, dơ̆ 2 là lơh nàng geh jơnau gĭt wă bè sền gàr tiah kis tàm ală bơyô đoàn viên ơruh pơnu mờ làng bol in".

Gùt càr Dak Lak, tàm nam do, đoàn ơruh pơnu ai tơngu me geh tam pa 120 rơbô tờm chi. Ală cấp, mpồl đoàn neh geh ală broă lơh krơi is nàng gàr niam lơh geh tơl khà geh ai mờ ală tờm chi geh tam ndrờm kis mờ hòn gơs niam. Bi Nguyễn Văn Hà, Bí thư Huyện đoàn Krông Păc đơs bè boă lơh bơh đoàn ơruh pơnu kơnhoàl Krông Păc bè do. “Jào ai ală mpồl xã đoàn dờp nàng pơgồp bal mờ broă tam mờ hơ geh sền gàr niam. Mờ lơh jăt bè jŏ jòng den bol añ gam geh ală rơndăp broă lơh tơl kuang bàng, đoàn viên ơruh pơnu, kơnòm pa tào 1 tờm chi nàng jào tam mờ sền gàr, ai geh ală ù tiah niam geh is tơlir kloh niam mờ kuơ màng là pơgồp bal mờ hơ̆ là sền gàr tiah kis”.

                                                  Tus bal lơh kloh ală gơl gùng mŭt tàm ƀòn, tàm xã

Bal mờ broă tam tờm chi, cau kơnòm să càr Dak Lak neh mờ gam tơnguh gơnoar, kơnòl bơh să tờm tàm broă sền gàr tiah kis bơh ƀòn drà tus ƀòn lơgar. Cau kơnòm să ală tiah tàm càr Dak Lak ndrờm geh uă broă lơh bơceh lơh, cèng geh bơta kuơ mùl màl. Bè Huyện đoàn Cư̆ Mgar neh lơh jăt rơndăp broă “Wăc rùp gùng ƀòn – Bơta niam chài rơgơi Tây Nguyên”  nàng lơh niam tiah kis tàm kơnhoàl, tơn jơh ală “tiah ƀơ̆” bè siồ siă, mờ tơnguh uă jơnau gĭt wă sền gàr tiah kis làng bol dê. Rơndăp broă lơh geh ală tơngu me: wăc rùp 3D mờ 30 pang rùp geh tơngu me “Lơh geh wơl chi che” tàm hìu bơsram Mầm non Hoa Hồng, thị trấn Quảng Phú; sơng niam wơl 150 ñjrong đèng, bơnơ̆p bơtô jăt gah gùng lòt tàm kơnhoàl. Tàm ƀòn dờng Buôn Ma Thuột, Đoàn sơnah ƀòn Thống Nhất neh lơh jăt broă lơh “Suơn bơkào ơruh pơnu” nàng tơn jơh broă tuh siồ siă lềng làng, pơgồp bal tàm broă lơh niam tiah kis. Tơnơ̆ mờ tŭ broă lơh “Suơn bơkào ơruh pơnu” geh lơh, lơh tiah tuh siồ siă lài do gơs dùl tiah tam chi tơlir niam, mờ uă bơta bơkào geh lì uă ngan. Bal mờ hơ̆, Đoàn sơnah ƀòn gam lơh ală broă lơh bè: gri bơkào geh lơh bơh phan lơh wơl, wăc rùp tềng kơl lĭk bè broă lam sồr sền gàr tiah kis... ai geh ù tiah geh is kloh niam, lơh làng bol kis gùt dar tiah do chờ hờp ngan.

Bi Y Lê Pas Tơr, Phó Bí thư Thường trực Tỉnh đoàn Dak Lak pà gĭt, broă sền gàr tiah kis đơs bal, tus bal bơ̆t bơtàu ƀòn lơgar pa đơs is là kơnòl bơh đoàn viên-ơruh pơnu dê. Pah nam, đoàn ơruh pơnu càr ndrờm geh khà broă lơh mùl màl mờ geh sền wơl broă lơh tàm lồi nam bè broă tam pa mờ sền gàr tờm chi. Kuơ màng tàm nam do khà broă geh lơh gơguh uă rơlao mờ ală nam lài. Broă tam mờ sền gàr tờm chi geh ală mpồl lơh jăt nền nòn, bơh bồ nam tus tŭ do neh tam pa geh rơlao 60 rơbô tờm chi ală bơta, mìng là tam tờm chi tam cah is. “Nàng lơh jăt broă tam mờ khà uă den pal geh dùl khà bă ù mờ pal geh lơh uă sră nggal gơrềng bal tus mờ broă tam chi, tam brê niam ù tiah. Tŭ do, ală cấp bộ đoàn bơdìh mờ ờ uă tiah geh tam uă den geh uă tiah ală bơyô tam tàm ƀlàng nhơl, tam jăt gah gùng lòt, tam tàm ƀlàng hìu lơh broă, ƀlàng nhơl. Bơh tŭ do tus nam 2022, tus jơh tơngai lơh broă do geh lơh ngan hòi jà, kơlôi sơnơng mờ sền gròi nàng tam geh 1 tiah brê geh ù tiah niam”.

Kung jăt bi Y Lê Pas Tơr yal, nàng ală rơndăp broă tam mờ sền gàr tờm chi cèng geh cồng nha, pal geh ngan broă ring bal bơh cấp ủy, gơnoar atbồ mờ broă tus bal pơgồp bal bơta pràn bơh làng bol dê tai kung bè broă pơgồp bal bơh ală mpồl lơh broă, cau dùl nă să. Ờ mìng pơgồp bal jơh jăt khà 1 tơmàn tờm chi bơh chính phủ geh ai, broă tam tờm chi geh pơgồp bal tàm broă sền gàr tiah kis sinh thái, lơh niam ù tiah mờ rơcang sơndră mờ tam gơl trồ tiah, tơnguh uă jơnau gĭt wă bơh làng bol, tàm hơ̆ uă ngan là rơnàng kơnòm să dê tàm broă sền gàr tiah kis mờ ală phan geh is tàm ù tiah dê.

Cau cih H’ Xíu-Cau mblàng Ndong Brawl

 

GAH PỜ TƠLIK JƠNAU ĐƠS DÀ KÒN CAU VOV4 TÀM TÂY NGUYÊN
Hìu lơh broă : 19A, Lê Duẩn, Buôn Ma Thuột, Daklak.
Kuang atbồ: Vũ Hải Định