Danak “Papaok ahar bánh chưng hijao saong urang kathaot mbang Tet” thun 2022

Bruk ngak piah raok Tet Nguyen dan thun anek sak Rimaong saong Danak “Papaok ahar bánh chưng hijao saong urang kathaot mbang Tet” thun 2022 hu peih tabiak di Palei Ilamu –Dulich dom bangsa Viet Nam meng harei 21 – 24/1. Danak ngan saong kadha “ Klah rabha anit ranam – Uan raok xuân thun Rimong”, lac bruk ngak ndung bak makna anit ranam meng paok jien jak ba urang rik daong. Thun ini, kapul peih bruk kuhria caga labaih 700 kadung pandap, yaom labaih 1 trieu dong sa kadung, piah alin brei ka bhap bini dalam sarak karja, urang hu raidiuk kan kandah di huyen Mộc Châu, tỉnh Sơn La; Kapol urang njauk jru mek kalik kruac dioxin huyện Ba Vì, ban Hà Nội…

Di bhum tapen negar Gia Lai, thun ini, rilo sang kan kathaot hu mbang Tết trei sir, haniem phul jang thun dahlau tuk hu daok dalam dom "baoh sang biên cương" kayua Bộ đội Biên phòng tỉnh Gia Lai alin brei. Kuhria meng thun 2016 tal thun 2021, Bộ đội Biên phòng tỉnh Gia Lai hu pambuak haong pakat ủy, karja palei padang ngak bahrau saong ngak pasiam viek jaik 40 baoh sang anit ranam, baoh sang biên cương di labik tapen negar, ngan haong yaom jien abih tih labaih 2,2 tỷ đồng.

Akok mentri Ilamu – Pandih – Dulich Nguyễn Văn Hùng birau mbaoh tangin tame Sarak ba tame angan inem krung ilamu phi vật thể pakat negar ngan saong Rija meng kan Dinh Thầy Thím di tỉnh Bình Thuận. Rija Dinh Thầy Thím xã Tân Tiến, thị xã La Gi hu peih ngak dalam 3 harei lac 14, 15 saong 16/9 saka ia bulan yaok thun ngan saong rilo bruk ngak biak gheih, dui pachreih yaok rituh ribau tuai grauk labik mai hu mbaok.

Meng di tuk jit Covid-19 tamuh tabiak, ban raya HCM hu 3 paok an sinh daong ka urang ngak padieh bruk oh hu mbang jien bilan, bhap bini gaok kan kandah kayua Covid-19…Kuhria gam 3 mbang, Ban raya hu daong ka labaih 10 triệu mbang urang, ngan haong yaom jien abih tih labaih 13.000 tỷ đồng, daong raong 2.200 uranaih matui lahik ame, amaik kayua Covid-19.

Sa-ai Bùi Văn Bằng daok di huyện Cai Lậy, tỉnh Tiền Giang, po di phun mai kiểng rup phun praong labaih 1m, dhar rak tabiak 4 gah, glong labaih 5m brei thau, birau tamat yaom pablei phun mai praong labaih 50 thun ini yaom 4 tỷ đồng. Meng blaoh, sa-ai Bằng ba phun mai parang iek di darak bingu Xuân anek sak Rimong 2022 di Ban Long Xuyên (tỉnh An Giang). Di labik ini, phun mai hu sa urang padauk angan blei 4 tỷ đồng, caik jien takai 2 tỷ đồng. Dom urang main phun kiểng di An Giang mboh lac, jien 4 tỷ đồng bayar ka 1 phun mai lac mbang camereip hu mboh di darak mai Tet labik ini.

Duah mboh 71 baoh mìn saong 38 pandap ka oh patuh dalam luac 5 thun ngak bruk di Campuchia, abih di nyu nan lac di tỉnh Siem Reap saong tỉnh Preah Vihear hu baa nek tikuk Magawa jeng drei tikuk dang akaok ka bruk duah mboh rilo bom mìn di abih. Anek tikuk “anh hùng” ni hu baoh tapuk kỷ lục Guinness di dunya pok angan hadei di tuk metai di umo ka 8.

Ban Cáp Nhĩ Tân, pasak di tỉnh Hắc Long Giang (Trung Quốc) daok yam tame bilan le hoi bilar brak meng bruk padang ngak salah Bein bingu dulich hu angan ieu lac “ Dunya ia khan” ndung bak thaot binguk di Thế vận hội Olympic Bắc Kinh 2022. Bruk praong di bein bingu Dunya ia khan lac patau praong meng ia khan, biểu tượng di Thế vận hội bilan brak mbang ka 24. Labaih 50 nghe si Trung Quoc lahik abih 8 harei piah ngak patau ia khan praong labaih 100 met vuong, glong labaih 30 m ini.

Sa bruk kuhria mboh dahlau di Đại học Washington brei mboh bruk njom mbak biến thể Omicron di virus SARS ngak tabiak jit ruak COVID-19 di Mỹ meda tame tabung glaong di adit anak tal. Tui bruk ni, dom urang njom bahrau yaok harei di Mỹ meda glaong di abih lac 1,2 triệu urang di harei 19/1, hadei di nan meda trun khang, kayua lac tuk nan taong abih dom urang meda njom jeng njom blaoh../.

Urang lang: Thu Thao – Bhumi – 15/01

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân