BIDV hu peih bruk alin hadiah sổ tiết kiệm ka yaok kamuan 20 triệu đồng

Công đoàn Gilang paraik BIDV pambuak haong Sở LĐTBXH dom tỉnh, ban saong Kapul urang kumei Việt Nam daong ka 112 kamuan matui kayua jit ruak COVID-19 gaok kan kandah ngan haong paok jien abih tih jaik 3 tỷ đồng. Langiu di nan BIDV hu peih bruk alin hadiah sổ tiết kiệm, jien mbaok ka 48 kamuan daok di TPHCM, Đồng Nai, Bình Dương, An Giang, Đồng Tháp, Tiền Giang yaok kamuan 20 triệu đồng. Gam haong nan jeng hu daong veik 12 kamuan daok di Đồng Tháp, yaok kamuan 10 triệu đồng.

Sở jalan mbak pajeng ba TP.HCM hu harak payua dom sở, mban, ngành, UB bhap bini dom quận, huyện saong ban Thủ Đức ieu daong pambuak gauk peih bruk pathau khan, jak ba công chức, viên chức, urang ngak nao radaih buýt saong tame pandar ứng dụng "Ba gauk nao radaih buýt". Bruk ini piah peih ngak danak dak patagok pajeng ba tuai pambuak haong patakik radaih di urang peih angaok jalan saong rik daong patrun ô nhiễm môi trường, takik gar jalan dalam ban raya HCM

Tỉnh Trà Vinh hu mblang taneh raong hadang labaih 25.000 ha. Tỉnh daok kuhria peih praong mblang taneh raong hadang thâm canh tal thun 2025 lac labaih 15.000 ha; dalam nan, hu 1.100 ha raong công nghiệp pandar công nghệ glaong ngan haong hadang sú, hadang thẻ takai putih. Tui jalan ba tabiak di tỉnh tal thun 2025, bruk raong pala bhum tapen tasik mek hu labaih 200.000 tấn sa thun. Yaom laba tagok veik di gah kaya tasik di tỉnh mek hu tanut tagok tui kuhria lac 5% sa thun.

Lambaok Gah Kỷ lục Việt Nam haong Kapul Kỷ lục dunya bahrau jao harak brei angan kỷ lục ka bimaong Cam Phú Diên (xã Phú Diên, huyện Phú Vang, Thừa Thiên Huế) ngan saong 2 kadha lac: "Bimaong Cam klak daok mala mbon cuah tapen tasik hu kuac raok saong khik ramik camereip abih di Việt Nam" saong "Bimaong Cam klak meng kiak daok mala mbon cuah tapen tasik hu kuac raok saong khik ramik camereip abih di dunya". Dom urang roh duah kuhria mboh lac bimaong Cam Phú Diên hu padang ngak di abap VIII saong daok dalam kapul inem mek padang ngak aval abih di Việt Nam hu duah mboh kuhria tal urak ini.

Dalam dom bruk ngak piah salam uan pahadar 200 thun harei ndih tapui urang ilamo dane angan dunya Nguyễn Đình Chiểu (1822 - 2022), UBND tỉnh Bến Tre hu peih bruk ngak saong parang tabiak 222 pandap mbang meng li-u. Tapa nan, 222 pandap mbang hu ngak meng li-u hu ngak biak tani tanat, biak siam makre meng pilih ruah pandap piah ngak tal tanek ngak, hu dak ramik gheih mekre, ngak jeng dom pandap mbang ndung bak ilamo di bhum taneh baoh li-u Bến Tre hu ngak meng 55 đầu bếp gam hu mbaok tame ngak. Ini lac bruk hadah mbaok mata saong jeng lac prein khang ka Bến Tre patui veik mayaih khan ilamo, du lịch tapa pandap mbang ngak meng li-u.

Kapul ginum biai di Iran hu nao tal ban ine Doha di  Qatar piah ginum biai ka bruk pasiam veik thỏa thuận hạt nhân hu angan ieu lac Jalan ngak haong gauk abih gah di dom taneh ia praong-khang haong Iran thun 2015. Bruk ginum biai hu peih tabiak meng bilan 4/2021 di Vienna min nyu njauk padeih veik meng bilan 3 thun ini kayua Iran haong Mỹ hu rilo jalan sahneng karei gauk. 

Jit laka cambuai, tapaok kakau daok njom mbak tabiak 19 tỉnh ban di Indonesia ngak kan kandah tal labaih 232 ribau trang trại raong athur. Jit tamuh tabiak tukvak dahlau di harei ngak Kur’ban di urang Islam ngak ka yaom dom janih ralaow tagok khang. Dom kapul Islam saong dom urang dang akaok Islam brei thau lac, ngak Kur’ban  lac bruk oh pandar ngak mayah athur oh hu, atau oh lagaih piah ngak, njauk ngak catang tui dom adat piah pacang cakak jit ruak pambak praong.

Hu takik di abih 40 urang “di cư” oh hu harak gar tui rup mboh lac metai saong 12 urang njauk rambus di gah dalam thùng 1 sruh radaih dui katung di ban San Antonio dalam bang Texas, Mỹ harei 27/6. Urak ini oh ka hu panuac khan cambaih ka dom menuac metai min tui Hạ nghị sỹ Tony Gonzales – lambaok bang Texas, dom menuac metai urak ini tagok tal 42 urang. Ini meda lac sa binah di dom bruk pablei salih menuac suan hukum di labik taphia negar Mỹ haong Mexico./.

 Urang lang: Thu Thao & M. Phuong – 28/06

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân