Urang pakacah njauk caik hatai tal dom mã tut angan ini piah plaih labaih kurang

Mintri Pato magru bahrau brei thau angan di 20 jalan pilih ruah saong mã số di yaok jalan pilih ruah đại học thun 2022. Tui nan, urang pakacah njauk caik hatai tal dom mã tut angan ini piah plaih labaih kurang. Urang pakacah njauk duah thau cambaih khau tin di mã sang bac, ma pilih ruah, ma jalan pilih ruah, mã tổ hợp hu labik pato pakai dalam danak dak pilih ruah di mangaok blah khau tin online di labik pato magru piah vak tame ka nyu njauk.

Kuhria tal abih harei 24/6, dalam taneh ia hu jaik 77.000 mbang urang ruak pandiak tabiak darah (rilo jang labaih 10.000 urang duk haong adit dahlau di nan, dalam nan hu 30 urang metai. Mintri Y tế kuhria mboh dahlau lac, dom menuac njauk ruak pandiak tabiak darah anak tal daok hu rilo jang saong meda tamuh tabiak di labik praong meyah oh ngak khang dom jalan pacang caga jit ruak. Piah khik caga pren yava ka rup drei, ka sang drei saong ka menuac sia daok jaik taphia drei, Mintri Y tế hu panuac ieu rahra yaok adit caik tabiak 10 minit piah pametai bọ gậy, lăng quăng.

Sở Y tế Bình Dương hu panuac likau biyar veik tame Gilang di Mintri Y tế yaok pluh ribau mbang jru taong ruak Covid-19 kayua oh pandar tal saong caik suai meda abih tukvak. Tui urang par akaok Sở Y tế Bình Dương, makna di bruk likau biyar veik jru taong ruak Covid-19 lac kayua jit ruak dalam tỉnh trun khang, dom urang njauk ruak Covid-19 yaok harei biak takik saong dom urang njauk taong ruak jeng trun biak rilo, yaok adit dom labik taong ruak Covid-19 oh daok pandar dom janih jru ini.

Tui Sở Padang ngak TP Hồ Chí Minh, thun 2015, TP ba tabiak bruk lac panduan ba 20.000 baoh sang daok mangaok saong daok tapen ribaong. Min tal harei ini, bahrau panduan ba hu jaik 2.500 baoh sang. Meng ini tal thun 2025, TP meda panduan ba 6.500 baoh sang daok mangaok saong daok tapen ribaong haong yaom jien abih jaik 18.500 tỉ đồng. Ban raya hu dom jalan ngak piah peih ngak, yau ye ramik veik quy hoạch piah pandar taneh tapen ribaong, to yaom mek jien piah ngak, oh daok la cang kadung jien karja.

Hadei di jaik 3 bilan ba tabiak bruk darak pasa 4.0 – nan lac biyar oh meng jien mbaok di dalam ban Vũng Tàu, tỉnh Bà Rịa – Vũng Tàu jeng ka oh ngak hu bruk ba tabiak yau hatai caong, kayua rilo urang pablei salih oh mbak carak haong jalan ngak ini. Tapa pasang iek di darak Vũng Tàu brei mboh, labaih 400 urang pablei salih min bahrau hu jaik 100 sang tải APP biyar jien oh pandar jien mbaok. Bruk biyar jien jeng ka oh njauk tui jalan ba tabiak, kayua menuac nao darak rilo meng lac praong thun, urang pablei salih di darak jeng daok takik thau ka công nghệ.     

Hadei di 1 bilan pataom mek panuac, duah thau hatai sahneng di bhap bini ka Nyaom roya mbang ka 20 di Đảng Cộng sản Trung Quốc, taneh ia ini pataom mek hu labaih 8 triệu 500 rabau panuac caong khin. Tổng Bí thư, Chủ tịch Trung Quốc Tập Cận Bình hu ndom tal yaom glaong di bruk caik hatai tui pang panuac di bhap bini siam jang tapa bruk pandar Internet saong dom jalan karei, hadei di tuk yaok triệu panuac caong di bhap bini hu ba tabiak ka nyaom roya Đảng mbang ini. Nyaom roya 20, tui kuhria hu peih tabiak di tuk jiak puac thun ini. Ini lac mbang camereip abih dalam sajarah di Đảng Cộng sản Trung Quốc, dom bruk pambuak tal Nyaom roya Đảng hu ba tabiak  ka bhap bini brei panuac.

Dalam adit ini, Mỹ meda pabak brei ka Ukraina dom tên lửa đất đối không meng mbaih tal atah. Tui panuac khan pakat glaong di Mỹ, Mỹ jeng kuhria brei thau dom paok daong an ninh karei ka Ukraina dalam nan hu gam đạn pháo pabak saong ra-đa đối kháng. Dalam bilan ini, Tổng thống Mỹ njauk hatai brei pabak ka Ukraina 700 triệu đô la daong quân sự, dalam nan hu gam dom tên lửa bahrau meda taong njauk tame dom labik daok atah.

Thái Lan hu ba tabiak bộ dut iek camereip abih di taneh ia ini piah dut iek dom janih pambak tal thần kinh, lac tetrahydrocannabinol (THC), dalam menyek cần sa saong dom janih chiết xuất karei meda yam tapa tanut brei adat lac 0,2% halei oh. Bruk dut iek cần sa hu brei mboh 1 atau 2 vạch dreih yau dut iek Covid-19. Bộ dut iek bahrau nan, hu caik angan ieu lac “Test Kann” saong hu yaom oh ka tal 3 USD, ba tal bhap bini jalan mbuan lagaih piah dut iek dom pandap ngak meng cần sa nyu tapa tanut brei adat halei oh, salih ka bruk payua mẫu tal bilik dut iek abih rilo tukvak./.

Urang lang: Thu Thao & M. Phuong – 27/06 19:00:00

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân