Brei klauk vaccine Covid-19 dahlau ka dom urang ngak di dom sang mac daok ngak bruk tui jalan “3 di labik”

Bruk 19 tỉnh ban bhum gah meraong daok brei dui atah tukvak pa-atah di gauk tui Sarak 16 daok ba tal bruk pandap panda kaya nong pataom pambuk di rilo labik. Anak bruk yau nan, Mintri ngak nong saong patagok palei pala haong Mintri Công thương hu ba tabiak rilo jalan ngak piah pambuak pagam bruk pabak – pablei kaya nong ka mikva urang ngak nong. Piah khik bruk ngak nong yau urak ini saong dom bilan anak tal, Kapul ngak bruk di Mintri ngak nong saong patagok palei pala pok panuac tagok Rajaei daong palagaih saong brei klauk vaccine Covid-19 dahlau ka dom urang ngak di dom sang mac ngak kaya ikan, raong glang, sik ngak ralow daok ngak bruk tui jalan “3 di labik”; patui bruk peih praong sarak pablei pandap tani tanat yaom ka dom menuac lac urang ngak, menuac ngak bruk di dom ban praong dalam 19 tỉnh, ban gah meraong daok brei pa-atah di gauk tui Sarak 16.

Mesup ini (4/8), Pasak pasang iek ruak kik (CDC) tỉnh Đồng Nai brei thau, dalam tỉnh hu veik 292 urang dương tính haong SARS-CoV-2, tui nan hu abih tih menuac njom Covid-19 lac 5.791 urang. Meyah dom puk palei oh pataom tame tui iek, rami ramik, pasang iek doanh nghiệp daok ngak bruk dalam labik di drei, ye mbuan tamuh tabiak dom sruh jit bahrau saong praong dalam palei, blaoh tui nan ba njom mbak tame labik daok trọ di urang ngak saong bol bhap rahra. Anak bruk yau nan, urang pan akaok gah y tế tỉnh Đồng Nai hu panuac ieu dom puk palei, pataom tame pasang iek dom labik ngak pandap daok ngak bruk, peih bruk dut iek di dom labik ini piah samar mboh menuac dương tính, sruh jit bahrau.
Mesup ini, tỉnh Bình Định hu gac 22 urang njom Covid-19, dalam nan hu 13 urang lac menuac pablei salih saong menuac dalam sang dom urang nan jeng gam tal darak pasar Gò Bồi di xã Phước Hòa, huyện Tuy Phước.  UBND tỉnh Bình Định brei pa-atah di gauk tui Sarak 16 di Thủ tướng Rajaei meng mon 12 melam 3/8. Patui di nan, meng mon 12 melam ini (4/8) brei pa-atah di gauk tui Sarak 16 di ban sit Cát Tiến, huyện Phù Cát. Yau nan, tal tukvak ini, tỉnh Bình Định daok pa-atah di gauk tui Sarak 15, hu dom labik daok brei pa-atah di gauk tui Sarak 16.
Piah patrun glaih glar kayua hu rilo urang ruak di dom labik taong ruak, patakik bruk njom mbak nao mai dalam labik brei daok karei, tỉnh Bà Rịa - Vũng Tàu brei ka dom F1 daok karei di sang. Bruk brei F1 daok karei di sang brei khik catang, samar drah, plaih tamuh tabiak dom kan kandah tavak tavaiy. Ong Phạm Minh An, Yam ndok Sở Y tế tỉnh Bà Rịa – Vũng Tàu daok brei thau lac, bruk brei F1 daok karei di sang hu Mintri Y tế brei ka TP.HCM ngak iek, hadei di nan ba tabiak ngak di 63 tỉnh, thành. Di Bà Rịa – Vũng Tàu, gah y tế jeng hu padang jalan piah ngak.

Mesup 3/8, angaok facebook hu kadha vak di urang angan "Quốc Nguyên" hu asal kadha ndom puac oh njauk ka sarak di Karja daong ka menuac lahik bruk ngak dalam tukvak pa-atah di gauk tui Sarak 16, saong pacuh pajarah menuac sia palai tayah paga pacang pasang iek jit, oh siam ka bruk an ninh trật tự, jhak tal bruk pacang caga jit Covid-19 di dalam tỉnh. Kadha vak ini  hadei di nan hu rilo menuac mek ba tagok angaok blah facebook di drei, ngak brei menuac sia mboh suh sah. Hadei di tuk duah thau, mboh lac menuac vak kadha nan, lac Trần Trọng T. (umo 32 thun, daok di phường Mỹ Xuân, ban sit Phú Mỹ - tỉnh Bà Rịa - Vũng Tàu), Công an ban sit Phú Mỹ hu da-a T. tagok ngak bruk. Di jabat Công an, tuk camereip T oh taduan lac drei ngak bo tuh lac kayua fb di drei njauk urang hack, min hadei di nan, T nyu taduan bruk ngak suan di drei. Urak ini, Công an ban sit Phú Mỹ daok ngak harak gar piah langyah bruk nan tui adat hukum.

Tui harak brei thau harei 03/08 di Nhà Trắng, tal urak ini, Rajaei Mỹ hu alin hadiah abih tih 111 triệu 701 rabau mbang vaccine pacang Covid-19 brei ka labaih 60 taneh ia angaok dunya, meng Afghanistan tal Zambia tui danak dak COVAX saong tui jalan di dua taneh ia. Indonesia lac taneh ia hu taduan rilo abih lac 8 triệu mbang saong Việt Nam dang ka 7 taduan hu 5 triệu mbang. Jeng tui harak brei thau di Nhà Trắng, kuhria meng puac bilan ini, Karja Tổng thống Biden daok brei parabha 500 triệu mbang vaccine di hãng Pfizer bo Mỹ hu sanya blei saong alin hadiah brei ka 100 taneh ia hu jien mek tame biar saong mbiah, gaok kan kandah dalam bruk blei vaccine.

Jit ruak jeng daok rah tabiak srau kadau di dom taneh ia Đông Nam Á. Mintri Y tế Lào brei thau, taneh ia ini harei kabroi hu 250 urang njom bahrau, dalam nan hu 13 urang njom dalam bhap bini, brei mboh bruk njom mbak tagok veik dalam taneh ia. Abih tih dom urang njom Covid-19  di Lào tal urak ini tagok tal 7.015 urang, dalam nan hu 7 urang metai. Rajaei Lào daok brei dui atah tukvak pacang veik, dui atah meng harei 4 - 18/8. Ini lac mbang ka 7 Lào brei dui atah tukvak pacang veik hu ba tabiak pandar meng harei 22/4 tal harei ini.

Dom menuac njom Covid-19 dalam bhap bini di Trung Quốc daok tagok, hu 71 urang hu khan brei thau dalam mesup 4/8, pambuak tal 7 tỉnh, dalam nan  Giang Tô hu 35 urang, lac rilo di abih. Tal urak ini, labaih 1.500 urang y tế hu samar ba nao tal labik patagok Kinh tế saong Công nghệ Vũ Hán, lac labik hu menuac njom ruak dalam bhap bini camereip abih hadei di labaih 1 thun Covid-19 lahik nao di labik dahlau daih lac pasak jit ruak di dunya, piah daong ngak dom bruk dut iek praong.

Urang lang: M. Phương – 04/08 15:25:56

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân