Akaok Quốc hội Vương Đình Huệ brei panuac peih mbang nyaom ka 3, Quốc hội mbang XV

Brei panuac peih mbang nyaom ka 3, Quốc hội mbang XV rah tabiak tuk mesup ni, Akaok Quốc hội Vương Đình Huệ brei thau, di mbang nyaom ni, Quốc hội hu pasang iek dom pathau khan di rajaei ka tong yaom pabak bruk peih ngak danak dak patagok kinh tế - xã hội song kadung jien karja thun 2021; bruk peih ngak danak dak patagok kinh tế - xã hội song kadung jien kajra thun 2022; pasang iek brei adat quyết toán kadung jien karja thun 2020. Gam song nan, hu panuac ieu dom urang Quốc hội langyah, tong yaom ka nyu njauk, abih gah ka dom harak pathau khan di rajaei. Ngan song tong yaom pabak thun 2021, njauk pataom tame dom bruk prong, hu salih karei dut song pathau khan di rajaei hu pok tagok Quốc hội di mbang nyaom ka 2, tapa nan, tong yaom chất lượng song dom bruk njauk bac megru dalam khik ramik, tacei ba, abih di nyu nan lac bruk kuhria mboh dahlau, caga dahlau kadung jien karja.

Di mbang nyaom ka 7, HĐ bhap bini tỉnh An Giang bahrau brei tapa Sarak pandar caga haong gauk saong trun meneing phun jien dom danak di bruk buh jien tame ngak di karja tukvak 2021 – 2025 phun jien kadung jien puk palei kayua pakat tỉnh khik ramik, dalam nan njauk gauk brei kaoh tabiak 1.380 tỷ đồng ka danak dak jalan nduac samar Châu Đốc – Cần Thơ – Sóc Trăng. Jalan nduac samar nan tuk ngak blaoh, nyu pabak hu bruk pajeng ba ka jalan kinh tế Tây Bắc - Đông Nam, lac jalan pajeng ba hu makna praong abih di pasak bhum taneran kraong CL, duh ka bruk cakrok patagok KTXH ka abih bhum..

Dalam kham merat dong ka anek di đoàn viên Công đoàn metui amaik ame dalam jit ruak Covid-19, Liên đoàn Lao động TPHCM bahrau jao sổ tiết kiệm Công đoàn Việt Nam ka 110 kamuan, yaok sổ yaom 10 triệu đồng; hu 4 kamuan njauk kan kandah rilo di abih hu brei 20 triệu đồng/sa sổ. Langiu di nan, Gilang pariak Thương mại cổ phần Ngoại thương Việt Nam hu dong ka 4 kamuan hu rai duik biak kan kandah, sổ tiết kiệm yaom 5 triệu đồng song 110 kamuan dok veik taduan hu jien mbaok yaom 1 triệu đồng/sa kamuan. Sổ tiết kiệm hu peih, hu jao veik ka dom kamuan tuk ginup umo 18 thun.

Piah hu rilo janih taginui (nho) that pabak ka darak pasar, rilo sang pala taginui di tỉnh Ninh Thuận daok jhul khang bruk pala pambak praong dom pajaih taginui mbang that bahrau, taginui oh hu asar chất lượng glaong. UB bhap bini tỉnh Ninh Thuận jeng hu pandar ilamu kỹ thuật ngak taginui tui tanut VietGAP; pambuak haong cakrok bruk ravang iek bein taginui, yaih khan angan dom janih taginui siam, hu chất lượng glaong di tỉnh.

Urak ni, dom urang ruak pandiak tabiak drah di tỉnh Vĩnh Long gam gam tagok. Meng akaok bilan 5 tal ni, tui kuhria yaok adit dalam tỉnh hu labaih 15 urang ruak pandiak tabiak drah, tagok jang 2 mbang dut song dom adit di bilan dahlau. Bruk njauk duh hatai nan lac, urang prong njauk ruak pandiak tabiak drah meblah biak glong jiak 50% urang ruak. Urak ni, langik tuk pandiak tuk hajan, lagaih ka jamuk, lac janih ba tal ruak pandiak tabiak darah caih mebaoh. Kayua yau nan ye, bhap bin brei pametai jamuk song lăng quăng song pacang jamuk kaik piah khik caga pren yava ka rup drei.

Tổng thống Mỹ Joe Biden daok peih mbang ravang 2 harei tal negar Japon. Dalam mbang ravang ini, Tổng thống Mỹ hu ginum biai haong Thủ tướng Ki-si-đa Phu-mi-ô ka bruk peih praong gah quân sự di Japon piah pacang caga prein khang daok tagok di Trung Quốc. Dua gah jeng kuhria brei thau veik talei pambuak bruk khang kajap di dua taneh ia dalam tuk bruk srau kadau U-krai-na, saong njauk gauk lac, ngak brei salih karei bruk hu meng lavik mai tui hatai di drei saong tapa kateik greik meng prein khang lac bruk oh hu chấp nhận. Triều Tiên saong dom bruk dalam bhum jeng daok dalam asal kadha ginum biai.

Ribuk, gam song hangin khang di 2 bang hu rilo menuac abih di Canada dalam dom harei tapa, ngak ka 8 urang metai song meteh triệu urang oh hu điện pandar. Ribuk ngak jaleih rilo phun hajao song gieng điện, gam song nan, ngak khut rilo tháp ba điện. Dom công ty pabak điện, urak ni, dok duah jalan ramik veik dom bilac ba điện, piah dong ka bhap bini hu điện pandar veik.

Thượng Hải (Trung Quốc) hu peih veik meneing dom tàu điện ngầm hadei di tuk brei kreik pabah mbang dalam jaik 2 bilan tapa. Ini lac bruk peih jalan ka ban Thượng Hải klaak bruk pacang cakak kayua COVID-19 di adit tal. Jaik abih menuac sia di Thượng Hải oh brei tabiak truh sang saong dom bruk pacang veik hu ngak catang di dom labik dalam ban rilo menuac abih di Trung Quốc. Dalam harei kabroi, Thượng Hải hu jaik 700 urang njaom COVID-19. Bruk njauk biai nan lac, oh hu urang halei njaom ruak di gah langiu labik pacang veik./.

Urang lang: M. Phương & Hani Pha – 23/05

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân