Patui mbang Nyaom ka klau, Quốc hội mbang XV, harei ini, Quốc hội ginum biai di hội trường piah pang harak pathau khan pasang iek ka bruk pataom iek veik, taong yaom bruk peih ngak Sarak ka 66/2013/QH13 saong jalan peih ngak danak dak jalan Hồ Chí Minh tukvak anak tal; Pathau khan pataom iek veik saong taong yaom bruk peih ngak sarak 42/2017/QH14 harei 21/6/2017 ka bruk ngak iek langyah bruk mesre laba glaong di dom kapul tín dụng saong Harak pathau khan ka bruk dui atah tukvak pandar taong abih dom adat di Sarak ka 42/2017/QH14 harei 21/6/2017 saong ginum biai ka bruk kuhria peih ngak danak dak hukum, sarak thun 2023, ramik veik danak dak padang ngak hukum, sarak thun 2022.

Ban raya HCM daok peih mbang ka 2 klauk vaccine pacang COVID-19 ka uranaih umo meng 5 tal mala 12 thun, tal urak ini klauk hu blaoh ka  15.578 uranaih. Mbang klauk ini dui atah tal harei 12/6/2022. Klauk ka taong abih uranaih umo meng 5 tal mala 12 thun daok diukrai atau daok bac da-a dalam ban raya bo dahlau di nan hu klauk blaoh mbang 1 takik di abih lac 4 adit, kuhria gam uranaih hu klauk bloh mbang 1 di tỉnh, ban karei. Gah y tế kakei lac, dom amaik ame brei anek mbang trei dahlau di tuk nao klauk jru, cuk ao tangin panak. Hadei di tuk klauk bloh, uraniah hu tui iek di labik klauk dalam meteh mon. Hadi di nan, Amaik ame njauk tui iek prein yava di uraniah dalam 28 harei, abih di nyu lac dalam 7 harei camereip.

Piah daong ka anek saih nao tal sang bac dalam jalan kham marat yam tagok di drei. Danak dak daong jien bac ka anek saih kan kathaot di tỉnh Trà Vinh bahrau peih mbang jao jien bac mbang ka 1 brei ka 54 anek saih kan kathaot, jaik kan kathaot di 2 xã Hòa Ân saong Thông Hòa, huyện Cầu Kè, hu taduan jien bac. Dom paok jien bac yaom meng 230.000-300.000 sa bilan meda hu pabak yaok bilan ka dom anek saih kan kathaot kham merat yam tapa kan kandah.

Tỉnh Đồng Nai hu pabak brei 3 labik piah mek haluk duh ka bruk padang ngak jalan nduac samar Phan Thiết- Dầu Giây hu padang ngak njauk tukvak ba tabiak. Ini lac dom labik hu brei adat mek haluk piah pabak ka bruk padang ngak dom labik  jalan nduac samar di jalan Bắc - Nam gah Timur, tukvak 2017 - 2020 di Rajaei piah langyah bruk kurang haluk padang ngak jalan nduac samar Phan Thiết - Dầu Giây.

Dalam bilan 7 anak tal, tỉnh Hậu Giang meda peih jai Mekong Delta Marathon Hậu Giang 2022. Ini lac jai pacacah nduac praong abih hu peih tabiak di Bhum taneran kraong CL, tui kuhria pachreih hu labaih 6.500 urang pacacah hu mbaok tame. Tapa mbang pacacah nduac, Hậu Giang caong mayaih khan  thaot binguk bhum taneh haong anek manuac di pak ini tal saabat dalam saong langiu taneh ia, tapa nan brei mboh ini lac labik mai tal salamat, labik hu langik tasik siam makre, bhum taneh hu dom anek manuac salut mbut, tari tarieng, tapak tapaiy, rap ar tuai damuai.

Harei ini, nyaom biai pakat glaong abih di kapul “Bộ Tứ” hu peih tabiak di ban ine Tokyo di negar Japon. Meng sanya lac ngak ka bhum Ấn Độ Dương - Thái Bình Dương tự do saong peih praong, Nyaom biai pakat glaong abih ini hu rilo bruk “pandiak” meng an ninh tal kinh tế bo dom taneh ia ini hu caik hatai sangka, yau: bruk mesruh di Ukraine, bruk patagok ảnh hưởng di Trung Quốc, bruk tên lửa saong hạt nhân di Triều Tiên, pambuak gauk pacang jit ruak COVID-19, pacang biến đổi khí hậu, khik kajap an ninh năng lượng saong duah labik pabak chất bán dẫn.

        

          Di nyaom biai hu peih tabiak di Nga harei kabroi (23/5), Ngoại trưởng Nga brei thau, “mayah gah phương Tây ba tabiak panuac caong pambuak viek talei pambuak gauk, khol dahlak biak caik hata tal bruk njauk ngak di bruk ini”. Tui urang par akaok ngoại giao Nga, taneh ia ini daok ba tabiak jalan ngak lac padieh abih bruk pagam pambak tame phương Tây piah khik kajap bruk cak rok patagok di dom gah hu makna praong tal gah an ninh, kinh tế atau dom gah xã hội di taneh ia. langiu di nan, daok brei cak rok patagok jang bruk pambuak gauk di dua gah haong Trung Quốc.

Gilang pariak patagok châu Phi hu caik tabiak abih tih 1 tỷ 500 triệu USD jien daong piah pacang bruk kurang pandap mbang  di labik châu Phi. Jalan ngak ini meda ba mai kein laba ka "20 triệu urang ngak nong châu Phi, dom menuac meda taduan hu dom janih pajaih siam saong ilamu lagaih piah samar pala ngak 38 triệu tấn pandap mbang". Langiu di nan jeng daok hu dom pok jien brei sraiy "piah pabak khak drak biak praong ka dom đại lý, dom labik pablei salih", saong piah daong salih bahrau sarak taneh riya di dom taneh ia dalam châu Phi./.

Urang lang: M.P & Thu Thao -24/5/2022

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân