Hadei di 6 bilan brei padeih nduac, gilai cao tốc jalan Cần Thơ – Côn Đảo tui kuhria hu nduac gilac meng harei 21/4

Mesup ini (19/4), UB bhap bini tỉnh Long An peih bruk ndom biai “jalan patagok bhum kinh tế công nghệ glaong”. Mai pataom mbaok hu ong Trương Hòa Bình, Phó Thủ tướng Thường trực Rajaei. Tapa nan, hu rilo panuac lac, bruk KTXH di tỉnh Long An daok tagok khang, patagok hu labik dang lac pambuak bhum, peih tabiak jalan dui pachreih urang buh jien tame ngak mbang, patagok jien tame kadung jien karja. Min jeng daok rilo bruk njauk pasiam veik piah dui pachreih urang tame ngak mbang. Phó Thủ tướng Trương Hòa Bình ndom lac, Rajaei daok daong ka Long An patagok njauk jalan, pandar dom prein khang di tỉnh, kham merat tal thun 2030 jeng tỉnh tagok rilo dalam bhum kinh tế praong gah meraong negar.

Mintri ilamo, Thể thao saong rivang main brei thau: danak dak taom gaok anek saih, sinh viên bangsa takik dom sang bac ilamo, Thể thao saong rivang main bhum gah maraong thun 2021 meda peih tabiak di tỉnh Bình Phước dalam 2 harei 28-29/5/2021, hu mbaok di 380 urang lambaok. Langiu dom bruk cắm trại saong pacacah thể thao, daoh tamia, Ban peih bruk daok hu rami ramik brei dom kapul nao ravang iek, duah thau dom inem krung sajarah di dalam tỉnh Bình Phước saong pala phun pahadar di labik inum krung pakat negar Tà Thiết.

Pamaong tal bruk pahadar Harei peih paha gah Meraong negar, yasa taneh ia (30/4/1975-30/4/2021), Pasak Roh duah ilamu Cam di Sở Ilamu, Padhih saong Du lịch tỉnh Ninh Thuận pambuak saong Muyim tỉnh Quảng Nam peih bruk parang iek pandap panda ngan saong kadha “ Drap ar ilamu Cam Ninh Thuan – Quảng Nam”. Di labik ini hu parang tabiak 80 pandap panda lac thaok binguk, lan am, rup patau pambuak tal ilamu Cam saong labaih 1.500 pandap lac dom pandap pandar piah pala drak, pandar dalam raidiuk, pandap ngak tabiak saong pandap piah menyim, ngak lan meng tangin, alat ragam, baoh tapuk saong dom pandap yao klak gam saong 1.400 baoh tapuk, tư liệu roh duah.

Hadei di 6 bilan brei padeih nduac, gilai cao tốc jalan Cần Thơ – Côn Đảo tui kuhria hu nduac gilac meng harei 21/4. Anak mata meda hu dua mbang nduac yaok harei. Gilai meda nduac meng pabha lamnge tuai rivang main Ninh Kiều (ban Cần Thơ) tal pabah lamnge Bến Đầm (huyện Côn Đảo, tỉnh Bà Rịa - Vũng Tàu). Jalan nao saong mai jaik 200km lahik jaik 3 maong mateh tal 4 maong mateh yaok mbang. Ni lac gah jalan di mbaok ia hu makna praong, ba mai kein laba nao mai siam lagaih ka bhap bini, tuai damuai ngan haong yaom biak lagaih.

Tui Pasak Kuhria mboh dahlau bruk langik tasik negar, bilan hajan thun ini meda mai aval jang di bhum Tây Nguyên saong Nam bộ, meng kreh bilan 4 tapa meteh akaok bilan 5 thun ini. Tui nan, bruk La Nina daok meng ini tal bilan 5, ngan saong labaih 60%. Dalam bilan 4 saong bilan 5, kuhria abih tih hajan glaong jang tukvak ini meng rilo thun mai meng 10% tal 20%. Ta-eng bilan 8 saong bilan 9, hajan kuhria abih tih kurang meng 10 tal 20% dut saong tukvak nan rilo thun tapa.

Tui panuac sanya di dua gah rajaei Australia saong New Zealand, camriep meng harei ni (19/4) bhap bini dua negar meda hu nao mai bo oh njauk brei daok karei y tế atau njauk klauk tiêm vaccine caga Covid-19. Piah tal Australia atau New Zealand, tuai rivang main njauk khik ginup prein yava saong pathau khan y tế haong urang jakar dahlau di tuk nao. Bhap bini dom negar karei daok di dua negar ni saong hu ginup harak gar tui adat hukum jeng hu nao mai yau bhap bini daok pak ni. Tui kuhria yaok adit hu labaih 300 mbang par meng Australia tapa New Zealand saong labaih 300 mbang par meng News Zealand tal dom labik di Australia.

Tỉnh trưởng Osaka Hirofumi Yoshimura harei 19/4 brei thau tỉnh ini meda pok panuac likau Rajaei Japon tabiak bruk samar drah piah pacang bruk urang njom Covid-19 daok tagok khang. Urak ini Osaka haong dom tỉnh karei di Japon daok dalam meteh samar drah dalam 2 adit blaoh, ngan saong dom jalan ngak piah pasang iek bruk njom mbak di jit praong. Urak ini dom bruk y tế di Osaka daok tapa prein biak rilo.

Ribuk Surigae hu hangin khang tagok tal 250 km/ sa maong jaik tuh tame gah kreih negar Philippines, nan ye negar ni njauk panduan ba labaih 5.100 baoh sang nao labik karei. Surigae lac ribuk nhiệt đới mbang ka dua dalam thun ni di Philippines. Negar ni bhian gaok 20 mbang ribuk nhiệt đới yaok thun, ngak kan kandah trak ka manuac urang saong jien padai. Thun dahlau, ribuk Goni – ribuk khang abih di dunya dalam thun 2020 tuh tame Philippines, ngak brei yaok piluh bhap bini metai, ngak ka yaok ribau urang lahik sang daok, ngak khat lahik labaih 370.000 USD di negar ni./.

Urang lang: Ái Nghiêm – Thu Thảo – 19/04 16:07:43



HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân