Pandap mbang di đà điểu rilo meng lac nyam patam, baoh kraoh, ni lac dom pandap hu dalam palei

Hu kapul urang nong ban sit Tân Biên (huyện Tân Biên, tỉnh Tây Ninh) yaih khan ka bruk masraiy jien takik laba di gilang pariak sarak kanja, di puac thun 2019, tapa roh duah saai Giàu mboh lac, dut haong bruk raong pabui, raong manuk ye raong đà điểu mbuan jang. Đà điểu hu prein pacang caga ruak siam, mbuan raong, diuk hu di langik kan kandah saong ba mai kein laba glaong. Saneng ye ngak, saai Giàu trun Long An blei 2 gu đà điểu pajaih praong labaih 1 bilan, yaok gu yaom 6 triệu đồng mai raong iek. Kayua bahrau raong, ka oh hu ilamo, saai Giàu jeng gaok kan kandah. Min meng kham marat abih drei, saai hu thau cambaih ka janih raong ini.  

Pandap mbang di đà điểu rilo meng lac nyam patam, baoh kraoh, ni lac dom pandap hu dalam palei. Tuk brei đà điểu mbang njauk plaih dom pandap mbang haluak, piah takik klauk tame tung pruac, manyum ia hacih, labaih 3 lít sa harei, dom harei langik pandiak meda brei menyum rilo jang. Mayah đà điểu njauk ruak talang brei manyum jru samar chip. Yaok adit brei puh ramik hacih var 2 mbang, kuac hacih khak, plaih ka đà điểu mbang gaok khak ngak gar jalan tung pruac.

Piah caga hu pandap mbang, saai Giàu ramik sa mblang taneh lagaih piah pala pabak njam patam. Tal tukvak ni, đà điểu di saai Giàu yaok drei tagok labaih 10 kg sa bilan. Yaok drei đà điểu tuk pablei bhian trak meng 80 – 90 kg, yaom pablei yaok kg ralaow lac 200.000 đồng. Langiu di ralaow đà điểu, tui kuhria labaih 2 bilan tra, saai Giàu daok hu baoh đà điểu piah pablei ka bhap bini. 

Yaok drei đà điểu binai mebaoh meng 35 - 40 baoh sa thun. Piah trun jien buh tame, tagok jien laba, saai oh padeih bac megru ilamo meng bruk daok raong saong tapa tapuk, báo...piah thau cambaih ka ilamo raong, karam, caih anek đà điểu, piah caga hu anek pajaih.

Amuk Hồ Thị Thuý - Phó akaok kapul urang nong ban sit Tân Biên (huyện Tân Biên, tỉnh Tây Ninh) brei thau, bruk raong đà điểu biak bahrau ka oh bhian mboh di pak ni. Dom siam lagaih tuk camriep meng bruk raong đà điểu di saai Giàu hu brei mboh cambaih ka hatai khin saneng, khin ngak di dom urang daok ranaih umo. Caong lac bruk raong đà điểu di saai meda ba jien tame hu tani tanat, rik daong pagaong raidiuk ka baoh sang./.

Urang lang: Thu Thảo – 14/07

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân