Sa-ai Võ Thiên Vũ hu 27 mbang halain hatain brei nao dom tanjaok darah di drei dalam tukvak urang gaok kan kandah di abih

Thau cambaih ka yaom glaong di bruk alin brei darah daong manuac, nan ye sa-ai Võ Thiên Vũ tuk halei jeng ba akaok nao dahlau dalam bruk halain hatain brei darah di pak ni. Tal urak ni, saai hu 27 mbang halain hatain brei nao dom tanjaok darah di drei dalam tukvak urang gaok kan kandah di abih.

Ndom ka makna halain hatain brei darah, Võ Thiên Vũ brei thau: “ngan haong drei, halan hatian brei darah ngak pahla lac sa sarak praong, lac hatung hatian siam mekre di bangsa. Abih di nyu lac ngan haong dom sang kan kandah, nan lac sa bruk ngak siam makre bo thei jeng meda ngak hu. Yaok harei, yaok maon di pak palei drei daok, hu yaok ribau urang oh patuah, caong hu tame darah piah diuk. Lac sa rahra, drei brei hu trách nhiệm, saong haniem phul kayua ngak hu bruk hagait nan”.

Lingiu di bruk hu mbaok tame halan hatian alin brei darah daong menuac rilo mbang, meng bruk ngak lac akaok kapul Chữ thập đỏ huyện Tuy Phong – akaok ban pato tacei jak ba halan hatian alin brei darah di kapul, saai hu patagok bruk pathau khan, jak ba manuac urang tame bruk halain hatain alin brei darah, daong ka rilo urang hu ginup darah piah taong ruak saong iek glang prein yava. Meng kham marat nan, bruk alin brei darah di huyện Tuy Phong tagok biak khang, dalam 3 thun min saai jak ba hu labaih 2.200 mbang urang hu mbaok tame alin brei darah, tapa nan, dom urang alin darah di Tuy Phong yam tapa tanut 160%.

Dalam rilo thun gam hu mbaok tame bruk hatain halain alin brei darah, Võ Thiên Vũ hu jeng sa kreih camin hadah ka urang đoàn, dam dara ngak tui. Urang dam ni hu hadah mbaok meta lac sa dalam dom urang alin brei darah hu angan di tỉnh Bình Thuận hu mbaok dalam bruk pok mayaom urang alin darah hu angan dalam taneh ia. Rik daong ka bruk kapul Chữ thập đỏ huyện hu rilo harak mayaom di Trung ương kapul chữ thập đỏ Việt Nam dalam rilo thun tapa. Saai jeng hu Mintri y te, UBND tỉnh alin harak pok mayaom dalam rilo thun gam.

Raidiuk di anek manuac yaom lac daok di tukvak halei jeng pagam pambak tame langik tasik, labik daok. Bala, khat lahik atau kan kandah langiu hatai caong, ngak brei oh takik urang ngak kan kathaot, jeng yếu thế, eng drei anak dom kan kandah. Jang urang halei karei, dom menuac nan biak caong dalam dom tuk nan, hu urang daong piah yam tagok. Võ Thiên Vũ khan lac: “alin brei darah lac sa bruk ngak hu makna, meda ieu lac hu makna praong abih dalam raidiuk di dahlak, oh ngak kan kandah hagait tal prein yava mayah khol drei ngak njauk tui bruk ba tabiak. Abih di nyu nan lac, khol drei brei nao hatai anit ranam saong diukrai hu trách nhiệm haong bol bhap rahra, taneh ia meda cak rok patagok siam lagaih jang. Dahlak jeng caong lac kapul chữ thập đỏ di pak ni hu dom jalan ngak karei lagaih haong kapul di drei, padang ngak dom kalup kapul alin darah atau kalup kapul dom urang hu sa janih darah, piah meda langyah saong daong dom tukvak urang gaok kan kandah di abih caong hu darah chip”./.

Urang lang: Thu Thảo – 14/06

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân