Di dom labik padang ngak hu dom pandap kandaong ia, lac labik siam ka jamaok caih mebaoh

Dalam bilan 4/2022, di Labik chung cư Green Town daok dalam phường Bình Hưng Hòa B, quận Bình Tân, TP.HCM hu menuac metai kayua ruak pandiak tabiak darah. Min jaik taphia labik ini, sa block sang daok hu padang ngak saong bak pandap panda, hareik hareim, abih di nyu lac dom chậu, thùng sơn pandar blaoh caik klaak saoh meda kandaong ia, lac labik lagaih ka jamaok caih, mebaoh. Gam haong nan, móng di labik ngak hu padang ia, dalam tuk dom harei tapa, TP.HCM gam gam hu hajan. 

Dalam bilan 4, quận Bình Tân hu abih tih 1372 labik mbuan hu ruak pandiak tabiak darah, nan lac: dom labik taneh klaak saoh, dom labik padang ngak, dom cống rãnh, jalan tathuak ia di labaih 100 sang bac, dom labik raong menuk, mblang radaih, dom labik pablei pasei pasiak.. Di dom labik mbuan tamuh ruak ini, quận hu langyah saong pasang iek gam gam. Bình Tân lac quận hu menuac ruak glaong abih dalam ban raya, tok dang hadei huyện Bình Chánh. Min tui amuk Lê Thị Ngọc Dung,  Phaok akaok UB bhap bini quận Bình Tân ye meng akaok thun tal ini, quận pataom tame ka bruk pathau khan, ieu kakei dom labik ngak suan, oh ka ngak catang bruk taong phạt: "Tapa tukvak pathau khan blaoh, quận meda pataom tame taong phạt tui Sarak 117 ka bruk taong phạt hành chính gah y tế. Saong brei pataom tame dom labik mbuan tamuh ruak, dom Cty xí nghiệp ka oh ngak njauk bruk pacang caga jit. Bahrau ini, quận hu ngak bruk haong dom  đơn vị praong ka bruk pacang caga jit dalam mblang bein saong pathau khan, pato kakei công nhân, urang ngak ".

Bác sĩ Lê Hồng Nga, Phaok Yam ndok Pasak Pasang iek ruak kik  TP.HCM (HCDC) brei thau, 4 bilan akaok thun, dalam ban raya hu 4.700 urang ruak pandiak tabiak darah, dalam nan hu 109 urang ruak trak, meblah 2%, glaong jang jaik 4 mbang duk haong dom thun dahlau. Tui kuhria dahlau di dom chuyên gia brei mboh lac dalam thun ini, pandiak tabiak darah meda ba tal jit praong. Kayua yau nan ye, gah y tế ieu kakei dom puk palei brei ngak ka nyu tal labik tal dhua, patagok pasang iek aval dom urang ruak pandiak tabiak darah. Gam haong nan, UBND dom quận huyện, phường xã brei thau cambaih, pathau khan piah ka bhap bini tuk mboh pandiak ye khan brei bilai y tế phường samar trun duah thau, piah langyah, pacang cakak sruh jit. Bác sĩ Lê Hồng Nga, Phaok Yam ndok HCDC lac:“Ngan saong bruk pacang caga pandiak tabiak darah ye bruk ngak di bhap bini hu makna biak praong, kayua lac sruh lăng quăng daok pak dalam sang di drei. Ruak ye drei ruak dahlau di abih, drei ruak saong nao tal bác sĩ. Gah y tế hu kakei taong abih dom urang praong atau uraniah meyah mboh pandiak glaong chip njauk samar nao tal bilai y tế piah ka bác sĩ tui iek saong tacei pato jalan langyah siam lagaih”.

Tui dom chuyên gia y tế, pandiak tabiak darah Dengue jeng lac sa ruak njaom mbak biak kan kandah saong meda ngak brei metai. Dalam tukvak urak ini, tuk dom urang ruak pandiak tabiak darah Dengue trak daok tagok glaong jang ye bruk mbuan tamuh jit ruak pandiak tabiak darah Dengue tuk halei jeng lac bruk di anak meta. Bhap bini njauk pandiak tabiak darah njauk tui iek prein yava, abih di nyu lac meng harei ka 3 tal harei ka 5 di ruak piah samar taong ruak, plaih ruak trak tagok./.

Lang sap: Mousa Phương – 16/05

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân