Bộ đội biên phòng, cảnh sát tasik hu nao tal dom pambah lamnge ikan alin rilo paok hadaih ka urang taong ikan gaok kan kandah

Bruk njom mbak jit ruak di ban Phan Thiết biak sarau kadhau, kan thau hu, gam gam hu rilo urang njom bahrau ngak ka adit akaok bilan 10, ban ini brei pandar Sarak 16 di rilo phường - xã hadei di tuk ka oh tal 1 bilan hu pacadu bruk paatah di gauk. Bruk paatah di gauk veik biak catang di jaik abih labik gah maraong kraong Cà Ty ngak ka bruk taong cap kaya ikan padeih veik. Meng bruk yaom pablei kaya ikan trun khang, tal dom harei bilan daok saoh ndih mbang saong pambah lamnge ikan kariek pabah mbang biak joa lange.

Thun ni yaom lac bruk nao tasik gaok kan kandah ginup janih, yaom kaya ikan trun hang dalam tuk jien manyek, ia patau, pandap mbang menyum ka mbang nao tasik tagok glaong, gam haong jien test samar ka urang ngak… min mikva urang taong ikan di Phan Thiết jeng kham marat tabika tasik dalam luac bilan ikan nam. Hu biak rilo urang taong ikan mai sang hadei di mbang nao tasik lavik harei oh tagok baoh taneh nao rivang diuk, anek, dom urang nan eng drei daok karei di gilai piah patui viek bruk nao tasik. Urak ini, rilo urang taong ikan njauk padieh bruk nao tasik, raidiuk di rilo sang urang taong ikan meda gaok kan kandah jang.

Di sa pasak ngak ikan praong karei di Bình Thuận lac ban sit La Gi, hadei di jaik 2 bilan daok di baoh taneh piah pacang caga jit pak di bilan ikan nam, meng harei 9/9 La Gi brei adat ka gilai hu prein praong nao tasik veik. Bmikva urang ngak ikan biak chrieh chrai, ba gauk tabiak tasik taong ikan dalam bilan puac di vụ ikan nam, piah patagok jien mek tame saong parilo kaya ikan ka menuac sia. Bruk taong ikan hu pasiam viek dui tui rilo gah, rilo bruk karei meng taong cap - hậu cần – pataom pablei – ngak ikan – pablei kaya ikan di labik vựa ikan biak chreih chrai ini. Pambah lamnge La Gi chreih chrai viek, urang taong ikan gam nao chap mek kaya ikan gam kuhria pacang caga jit Covid-19, caong maong jit ruak juai tamuh gilac veik piah ka mikva hu sron mbon ngak mbang.

Urang taong ikan lac dom urang njauk kan kandah tapak kayua jit Covid-19, min dalam dom kapul hu daong dalam paok 62.000 tỷ đồng saong 26.000 tỷ đồng di Rajaei (thun blaoh saong thun ini) oh hu urang taong ikan.  “Nao gam haong urang taong ikan dalam jit praong”, bộ đội biên phòng, cảnh sát tasik, haong rilo mban, ngành, kapul nyaom, Mặt trận, urang ngak pahla hu nao tal dom pambah lamnge ikan alin rilo paok hadaih ka urang taong ikan gaok kan kandah.

Dalam mbang taom gaok cử tri di urang Quốc hội tỉnh Bình Thuận dahlau di mbang nyaom ka 2, cử tri di rilo bhum tapen tasik hu panuac caong pasamar bruk klauk vắc xin ka bhap bini, dalam nan hu bhap bini bhum tasik; pasang iek pabak urang taong ikan gaok kan kandah tame dom urang hu mbang tui jien daong di Rajaei… Caong lac dom panuac caong di cử tri samar hu pasang iek piah ka bruk taong ikan di Phan Thiết samar hu pasiam viek, gam haong bruk du lịch hu peih gilac veik piah rik daong tame bruk ngak brei hadah tagok thaot binguk kinh tế di tỉnh Bình Thuận hadei di jit praong./.

Urang lang: Thu Thao – 18/10

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân