Phó Thủ tướng Vũ Đức Đam kakei lac, bruk pacang veik labik praong atau sit brei ngak catang

Phó Thủ tướng Vũ Đức Đam hu taong yaom glaong dom tỉnh dalam bhum taneran kraong Cửu Long dalam tukvak tapa hu khik iek siam jalan tapen negar, pacang cakak jit ruak njom tame. Min, meng bruk hu rilo urang njom COVID-19 dalam bhap bini, dom tỉnh, ban njauk paglaong sangka, oh iek lap, njauk patagok bruk ngak di puk palei, paglaong bruk jak ba, pasang iek catang manuac mai meng bhum hu jit…

Taong abih menuac mai meng bhum hu jit njauk pathau khan y te ka nyu njauk piah ka dom kapul pasang iek dịch tễ, dut iek, brei daok karei ka nyu lagaih. Tui kuhria mboh dahlau, jit ruak daok rahtabiak sarau kadhau, Phó Thủ tướng hu panuac kakei yaok tinh, bal brei pasang iek bruk ngak, dom jamraik, jru tavao, panda y tế, labik brei daok karei pataom gauk, labik taong ruak, kapul urang mek mau, dut iek.

Phó Thủ tướng kakei lac, bruk pacang veik labik praong atau sit brei ngak catang, oh caik rahtabiak bruk “langiu catang, dalam cadu”, ba tal njom mbak tapa gauk, oh pasang iek hu, saong brei khik ka pahu dom labik salamat.

Tuk mboh urang njom COVID-19 brei samar pacang veik labik ka nyu lagaih di abih. Dalam tuk ka oh thau cambaih,, meda pacang veik labik praong, samar duah thau labik pambak ruak piah pataom sit veik min ngak catang bruk pacang veik labik, oh iek lap, ngak cadu.

Meng dom ilamo pacang caga jit dalam tukvak tapa, dom tinh, bal hu padang ngak saong brei thau gam gam ka jit ruak di mangaok dom jalan khau tin, dữ liệu; meng nan, piah langyah, duah thau labik pambak ruak, tacei labik njauk pasang iek, dut iek jang yau bruk pato tacei, ba jalan pacang caga jit.

Min, urak ni bahrau hu 2 tinh, bal peih hệ thống khau tin ni, Phó Thủ tướng ieu dom tinh, bal daok veik dalam bhum taneran kraong Cửu Long samar peih ngak piah caga ka bruk jit tamuh tabiak khang.

Phó Thủ tướng ndem lac, bruk peih ngak iek brei daok karei urang F1 di sang hu peih ngak tui jalan salamat. Taphia di nan, Phó Thủ tướng jao ka Mintri Y tế pataom veik dom panuac caong di dom tinh, bal dalam bhum taneran kraong Cửu Long ka sinh phẩm, jamraik, pandap panda, panda y tế, pandap khik pacang rup pabhap… piah hu jalan daong rilo di abih. Tui jalan ngak lac khik ka pahu salamat ka dom sang iek ruak, Phó Thủ tướng ieu kakei dom tinh, bal patagok bruk dut iek pilih ruah di pak ni; samar peih hệ thống tui iek, thau cambaih bruk urang hu triệu chứng piah nao tal sang mek mẫu dut iek, pataom  prein tame paglaong bruk dut iek rilo mẫu pagam veik.

Phó Thủ tướng caong lac, langiu di khik kajap bruk pacang caga jit dalam ban, Cần Thơ caga bruk daong dom tinh, bal dalam bhum pacang caga jit. Mintri Y tế pato tacei dom sang iek ruak di Trung ương pambuak haong Cần Thơ, padang pasak piah daong ka dom tinh, bal tuk hu bruk caong khin./.

Urang lang: Thu Thảo – 19/07

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân