Angaok Facebook di sa urang daok di Bắc Giang hu vak yau ini: “Harei halei jeng hu dom pluh urang ruak. Puk palei harei melam iew loa khan brei thau abih. Taong abih njauk nao mek mẫu dut iek saong duh hatai biak rilo dalam tuk daok cang oh thau yau habar”. Daok di bal raya Hồ Chí Minh dalam labaih sa adit mai ini, jit ruak daok rah tabiak srau kadau, manuac urang njauk ruak dak harei dak rilo. Oh ka tuk halei, yaok tuk, yaok minit bhap bani mboh duh hatai tuk pang mahit manuac urang njaom mbak jit ruak dalam harei. Rilo panuac sua tangi hu ba tabiak yau, harei ini hu hadom urang njaom Covid-19 hu duah mboh? Tỉnh, bal halei daok hu jit, tỉnh halei hu urang njauk ruak tagok samar…?

Harei 30/5/2021,tuk Mban tacei jalan pacang caga jit Covid-19 di tỉnh Bình Thuận tabiak panuac samar drah brei duah dom urang hu mai tal Pasak Thánh Mẫu Tà Pao (Đức mẹ Tà Pao), xã Đồng Kho, huyện Tánh Linh, tỉnh Bình Thuận tuk urang ruak ka 6777 di bal raya Hồ Chi Minh hu mai tal kabik ini,  lac brei mboh cambaih abih oh hu kadha hagait bo oh rah tabiak hu. Sa melam oh ndih di oh thau hadom urang piah ieu, piah duah, dut iek saong ba nao brei daok pataom sa labik dom F1 hu peih ngak chip. Bình Thuận khang drei cang bruk dut iek mboh habar dom F1 hu pambuak tal, yaom lac taong abih F1 jeng hu brei nao daok pataom sa labik.

Kreh melam 31/5, tuk bruk dut iek taong abih dom mẫu pambuak pagam tal Pasak Thánh mẫu Tà Pao mboh lac âm tính mbang ka 1, Bình Thuận tuk nan meng mboh ha-njual hatai. Bruk njauk ndom nan lac, F1 ini tuk halei jeng cuk siuk pabang mbaok, taphia di nan hu khan brei ka gah chức năng thau tuk mai tal puk palei piah hu brei daok karei pataom sa labik. Bruk ngak mboh yau biak sit ini, min nyu hu daong ka rilo menuac takik glah.

Tui yaok pataom di dom jabat chuyên môn, tal tukvak ini dom urang njaom Covid-19 meblah tal 80% hu asal njaom mbak meng dom urang dalam sang. Kayua yau nan ye, meyah hu urang halei meng bhum jit mai, yaok urang drei njauk sahneng lac urang akaok mereip meda njauk njom mbak nan lac manuac  dalam sang, blaoh hadei di nan meng tal ayut sahabat, dom urang ngak bruk haong gauk saong bol bhap rah ra. Bruk khan oh tapak di dom urang dalam tukvak tapa lac bruk biak njauk mbuah. Jang tuk halei karei, khaol drei brei hu bruk tapak tape piah ka taong abih bhol bhap rah ra ba gauk ngak. Kayua lac dalam tukvak ini, urang halei daok padauk pacang dom bruk biak piah pacang cakak jit ruak ye meda ba tal bruk trak damak jang.

Anak bruk jit Covid-19 dak harei dak tamuh khang saong kan thau dahlau. Piah ngak brei bhap bani salih jalan saneng, dom jabat truyền thông njauk samar drah ba tabiak dom panuac kakei di gah y tế dalam bruk pacang cakak jit ruak; tacei tabiak dom bruk suan dalam pacang caga jit, piah plaih njaom mbak dalam bol bhap rah ra. Taphia di nan, njauk paglaong bruk ngak di urang dang akaok dom jabat, puk palei. Abih di nyu lac dom puk palei dalam tỉnh njauk peih ngak catang bruk pasang iek, brei thau saong langyah catang dom urang halei ngak suan bruk pacang cakak jit, abih di nyu lac taong phạt chip urang halei oh cuk siuk pabang mbaok di labik công cộng.

Anak meta mboh lac di dom huyện, bal sit, hu rilo menuac oh cuk siuk pabang mbaok di labik công cộng njauk taong phạt meng 1 – 3 triệu đồng. Bruk ngak ini jeng tok mong tal bruk oh daok urang ngak suan, oh iek prong bruk pacang khik siam mekre ka bol bhap rah ra. Meng nan daong ka yaok rahra ngak njauk tui dom jalan pacang caga jit ruak, ngak jeng bruk bhian randap bahrau dalam raidiuk yaok harei./.

 Urang lang: Jasi -  7/6/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân