Harei 5-12 ginum biai ka “Kinh tế Việt Nam 2021: pasiam veik song patagok khang kajap” hu peih tabiak tui jalan online. Ủy ban Kinh tế di Quốc hội, Mban Kinh tế Trung ương, Viện Hàn lâm Khoa học xã hội Việt Nam pambuak gauk peih tabiak. Dalam tuk kinh tế di taneh ia drei jeng dok kan kandah kayua  jit Covid-19,  bruk ginum biai pamong tal salih bahrau, patagok siam lagaih bruk ngak di Quốc hội; dom jabat di Quốc hội dalam patagok pasang iek bruk peih ngak Hukum negar, adat, sarak; paglaong siam mekre ka dom bruk ngak prong  di taneh ia,pren kuhria mboh dahlau haong jalan maong atah dhua, abih gah, abih di nyu nan lac bruk kinh tế vĩ mô, jien ndua, kadung jien karja, đầu tư công, drap ar, alam langik tasik, urang ngak, bruk ngak…

Công đoàn dom Labik ngak kong tỉnh Tiền Giang bahrau peih bruk nao rivang saong alin hadaih pandap ka 4.190 urang lac F0, F1 di dom doanh nghiệp dalam dom labik ngak kong di tỉnh.Tui nan, yaok urang ngak njom ruak thit ruak blaoh hu daong 3 triệu đồng; dom urang F1 hu brei daok karei pataom gauk di mangaok 14 harei hu daong 1,5 triệu đồng; F1 brei daok karei ala 14 harei hu daong 1 triệu đồng. abih tih yaom jien daong ka dom urang ngak lac F0, F1 blaoh, dalam mbang ini lac labaih 4 tỷ đồng, mek meng kadung jien bruk ngak di thun 2021 di Công đoàn di dom Labik ngak kong tỉnh Tiền Giang. Langiu di nan, Công đoàn dom labik ngak kong daok peih bruk jao jien bac ka anek di 7 công đoàn viên njom ruak saong metai.

Ủy ban bhap bini tỉnh Bình Thuận bahrau patabiak bruk peih ngak danak dak khik ramik song patagok khang kajap  inem krung ilamu Việt Nam tuk vak 2021- 2025 di dalam tỉnh. Danak dak piah khik ramik song patagok khang kajap inem krung ilamu hadah krah di  Bình Thuận dok mbuan si lahik, daok khut, tayah, rik dong tame bruk patagok khang kajap ilamu bangsa Việt Nam, pamong tal yaih khan thaot binguk di taneh ia, anek menuac Việt Nam song patagok du lịch. Tuk vak 2021- 2025, tỉnh jhul phang bruk parang iek, yaih khan, pathau khan dom yaom glaong inem krung ilamu hadah krah ka bhum taneh, anek menuac Bình Thuận.

Bier harei 2/12, Công an huyện Kông Chro, Gia Lai hu cap khik Trần Văn Quy (ndik tapui thun 1984, daok di tổ dân phố Play Pyang, huyện Kông Chro, tỉnh Gia Lai)- lac urang khik glai di Công ty TNHH MTV Lâm nghiệp Ia Pa piah pasang iek bruk oh ngak njauk bruk di drei ba tal khat lahik trak dalam bruk jah tak glai praong di xã Chư Grey, hu mboh di puac bilan 11/2021. Dahlau di nan, saai Quy hu brei bruk khik iek glai di Tiểu khu 734 (dalam xã Chư Krey, huyện Kông Chro). Min, saai Quy luai caik ka dom urang kaoh mek 12 phun kayau bời lời, kháo, xoan mộc... abih tih dom kayau nan, lac jaik 85 m3. Công an huyện Kông Chro, Gia Lai brei khởi tố bruk nan, daok duah thau, ngak brei cambaih lai.

Jiak sa bilan tra meng tal Noel min di ban raya.HCM, dom labik pablei pandap ngak makre Giáng sinh daok chreih chrai tagok. Min, tui rilo po labik pablei, urang blei dok takik dut song tuk vak ni thun dahlau.  Jalan Hải Thượng Lãn Ông, quận 5 lac labik pablei praong pandap ngak mekre ka harei Noel. Bilan  Noel thun ni, dom labik pablei di pak ni jeng daok pablei dom pandap meng kan  yau phun thông katak, khan aow, tamo, cầu thủy tinh, talei kim tuyến…Rilo po labik pablei brei thau, meng bruk kan kandah kayua jit ruak,  pandap panda thun ni siam mbiah song yaom kaom lagaih haong kadung jien di rilo menuac.

Liên hợp quốc bahrau ini hu ba tabiak pathau khan brei mboh bruk eih lipa di dom taneh ia Mỹ Latinh daok tagok tal 9,1%, glaong di abih dalam 15 thun ini mai. Makna lac kayua jit praong COVID-19 ngak tayah darak pasa bruk ngak, ngak ka rilo menuac laik tame bruk eih lipa. Pathau khan jeng ndom lac bruk srau kadau gah pandap mbang di tanut mbaih atau trak damak daok ngak kan kandah tal 267 triệu urang Mỹ Latinh dalam tuk jit praong tagok tal tabung glaong, glaong jang labaih 60 triệu urang dut saong thun 2019, ngak ka Mỹ Latinh jeng sa bhum taneh hu tanut tagok bruk srau kadau gah pandap mbang glaong abih di dunya.

  Roh duah "COV-Boost" hu urang jakar Anh ba tabiak khan brei thau di  harei 2/12 tong yaom siam lagaih di 7 janih vaccine lac:  vaccine di  AstraZeneca, Novavax, Johnson & Johnson, Curevac, Valneva, Pfizer song  Moderna. Tui nan, vaccine pacang COVID-19 di dom hãng Pfizer song  Moderna pandar  công nghệ mRNA dong jhul pachreih kháng thể khang di abih meyah hu pandar piah klauk pabak hadei di  10 tal 12 adit kuhria meng di tuk klauk bloh mbang klauk ka 2. Bruk di roh duah ni, lac duah thau janih vaccine halei piah ngak mbang klauk ka 3 piah khik caga anek menuac siam di abih anak bruk njaom mbak di COVID-19. 

Na Uy daok peih viek dom bruk brei takik ngak di dalam taneh ia piah pacang cakak bruk njom mbak di jit COVID-19 hadei di tuk hu biến thể Ô-mi-crôn, dalam tuk taneh ia ni hu urang ka 5njom biến thể bahrau. Taong abih dom tuai mai tal Na Uy, kuhria gam urang hu klauk blaoh saong ka oh klauk vaccine, njauk dut iek dalam 24 maong hadei di tuk tame negar. Di dom bhum hu manuac njom glaong yau ye ban ine Oslo, bruk cuk pataih pacang mbaok di labik hu rilo manuac meda lac adat njauk ngak, gam haong panuac pachrieh ngak bruk di sang./.

Urang lang: H.Pha – 4/12/2021

 

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân