Njam patam hu pablei di rilo labik dalam ban

Tukvak ini, bruk blei kaya nong abih di nyu lac baoh kayau, njam patam di dom puk palei gah Meraong jeng daok gaok dom kan kandah, ba tal pataom pambuk di dom labik. Di Long An, bruk pajeng ba kaya nong jeng daok tavak dom kadha. Cambaih laih, kayua tok hu  1 dalam 3 dom sruh radaih di dom hợp tác xã hu brei nao mai nan ye bruk blei padai, kruac aia, njam patam daok hu takik, urang blei huac bruk pajeng ba. Gam haong nan, urang blei di dom tỉnh karei oh tame Long An hu kayua bruk pacang caga jit. Dom doanh nghiệp, labik ngak pandap jeng daok cang taong yaom, brei adat ka jalan ngak "3 di labik" nan ye daok padeih ngak bruk. Taong abih bruk nan daok ngak ka pandap panda kaya nong pataom mbuk di dom puk palei.

Daok di huyện Xuyên Mộc, tỉnh Bà Rịa- Vũng Tàu, dom sang bein daok paik baoh darang min kayua gaok kan kandah dalam bruk pajeng ba, nan ye pablei tabiak yaom biak biar, oh ka tal 16.000đ đồng sa kg piah mek veik meneing phun jien buh tame. Yau nan min, baoh darang hu blaoh, urang paik jeng hu min urang blei jeng oh mbak carak haong bruk blei. Yaom lac hu dom tỉnh, ban daok kakei blei min urang nong oh hu ilamu paraba, pajeng ba nao dom tỉnh Tây Nguyên, gah kreh negar, nan ye tukvak ini tok thau pambak tame pren blei di darak pasar ban raya HCM. Min ban raya HCM pakauk taong abih bruk ngak meng 18 tuk tal 6 tuk page mesup, radaih pajeng ba oh nao mai hu, langiu daih radaih cấp cứu, nan ye urak ini biak kan kandah dalam bruk pajeng pandap tuk melam.

Tui Sở Ngak nong saong patagok palei pala ban raya HCM, urak ini bruk ngak nong di ban raya tok pabak hu 10 tal 20% bruk blei mbang di bhap bani, daok veik jeng blei meng dom tỉnh. Min dom darak prong saong darak meng kan jeng kreik pabah mbang nan ye pandap hu takik. Gam haong nan, prein blei di bhap bani daok trun, abih di nyu lac bruk blei baoh kayau. Ong Đinh Minh Hiệp– Akaok Sở Ngak nong saong patagok palei pala bal raya HCM brei thau:

"Pandap di dom tỉnh biak prong, bo bruk blei di bal raya trun nan ye nyu pambak tal biak rilo. Min njauk kham merat pa-yeng pandap dalam 19 tỉnh bal daok hu bruk pa-atah di gauk. Kadua tra nan lac salih jalan pabak pandap tabiak bhum kreh negar saong gah Barak". 

Tui Tổ ngak bruk 970 di Mentri Ngak nong saong patagok palei pala, piah pabak ginup pandap panda, kaya mbang, gah ngak nong brei khik ramik bruk padang hu rilo labik pabak brei, lingiu di nan jeng daok pataom tame langyah bruk pandap panda pataom pambuk. Tal tukvak ini, hu jaik 400 labik, hợp tác xã ngak pandap, doanh nghiệp di 19 tỉnh gah meraong hu Tổ ngak bruk 970 pambuak pagam. Dalam nan, tapa bruk pambuak pagam, parabha, tỉnh Long An urak ini duah hu labik pablei jaik 200 tấn njam saong daok hu labik kakei blei yaok rituh triệu đồng, hu labik pablei tani tanat.  

Tui Thứ trưởng Mentri Ngak nong saong patagok palei pala, Trần Thanh Nam: dalam tuk taduan mek thong tin, Tổ ngak bruk 970 daok hu mbaok di gah Meraong jeng hu ngak bruk haong dom labik blei praong, labik parabha piah ba pandap tabiak bhum kreh negar saong gah Barak, langyah bruk pataom pambuk pandap panda. Ong Trần Thanh Nam daok brei thau lac:

"Urak ini brei salih darak pasar tabiak bhum kreh negar saong gah Barak, kayua urak ini Hà Nội jeng daok peih bruk pa-atah di gauk,, meda hu bruk kurang pandap di dom labik. Abih di nyu, khaol dahlak jeng daa akaok Sở Ngak nong, Sở Công thương saong dom doanh nghiệp Hà Nội piah ngak habar khaol drei pambuak bruk haong gauk ba pandap panda nao tal grauk labik dalam negar, patrun bruk kurang pandap di dom labik saong jeng langyah hu bruk kandaong labaih pandap di dom labik".

Tui Tổ ngak bruk 970,  Tổ meda pambuak haong dom tỉnh ban kham merat lang talaih tavak tave dalam bruk pajeng ba piah ba pandap panda kaya nong nao tal darak pasar dom tỉnh, ban daok peih bruk pa-atah di gauk, gam haong nan, peih prong bruk pablei di dom darak pasar karei. Gah ngak nong caong khin urang nong, doanh nghiệp patui veik pambuak bruk, daong gauk piah yam tapa kan kandah anak meta kayua jit ruak Covid-19./.

Urang lang: Jasi -3/8

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân