Doanh nghiệp hu ginup tanut ka bruk 3 di labik 

Jalan ngak “3 di labik” hu dom DN hu urang ngak ala 100 menuac palih ruah. Dom cty hu urang ngak rilo jang, ka oh khik hu dom bruk “3 di labik” ye brei menuac nao ngak salih gauk, trun meteh urang ngak. Bruk pandar rilo jalan pacang caga jit, takik rilo jeng ngak kan kandah tal bruk sản xuất, min biak njauk ngak dalam tukvak urak ni, piah khik caga prein yava ka urang ngak.

Rik prein, nao gam haong abih gauk dalam tỉnh jhul kadun likuh jit  Covid-19, Cty Cổ phần Thực phẩm Cánh Đồng Việt hu peih bruk  “3 di labik”. Dahlau deih, cty hu 350 urang jakar, urang ngak bruk, min urak ni trun dok 180 urang, dom jalan pacang caga jit hu peih ngak catang, pandap panda, pandap tamo piah ngak hu jao, mek song pruh jru pametai anek ruak dahlau di tuk ba tame sang mac …  

Piah pacang caga jit Covid-19, Công ty TNHH Việt - Úc Phước Dinh lac labik ngak hadang pajaih takai mbong patih di  xã Phước Dinh (Thuận Nam) brei padang labik ngak siam mekre, salamat, gam khik kajap pren yava ka urang ngak, gam pabak ka drak pasa dom pajaih hadang siam. Cty hu padang mban tacei pato pacang caga jit  kayua  Yam ndok dang akaok; peih bruk tong yaom dom labik mbuan si njom ruak, pruh jru pametai anek ruak 2 mbang sa adit; uak hacih yaok harei 2 mbang di dom labik tangin pan pabah mbang, công tắc điện balik ngak bruk… Cty hu blei pabak 150 bộ khan aow khik rup pacang jit, 200 kit test samar drah, nhiệt kế oh taom gaok song caga balik brei dok karei, pagam pabak camera, lagaih ka bruk pasang iek, duah thau tuk hu bruk.

Ong Phan Thủy, Akaok Jabat Lao động - Thương binh song  Xã hội huyện Thuận Nam brei thau: Jabat hu pambuak bruk song UBND dom xã peih  pasang iek bruk pacang caga jit di 20 DN dalam huyện, mboh lac dom DN jeng  ngak siam. Anak tal, Jabat daok brei patagok pasang iek catang bruk ngak tui dom jalan pacang caga di DN dok dalam huyện, khik oh caik ka jit njom mbak dalam dom sang mac, labik sản xuất pablei salih.

Di  labik ngak cong Thành Hải hu labaih 10 DN ngak bruk gam haong labaih 2.000 urang ngak. Piah khik ka bruk ngak hu siam mekre dalam tuk vak urak ni, Cty TNHH Thông Thuận hu peih bruk pruh jru pametai anek ruak di labik ngak pandap, labi ging mbang huak, pasang iek dom janih radaih song menuac tame tabiak labik ngak. Kayua urang ngak rilo, mai meng rilo labik, Cty hu parabha jeng dom  kapul sản xuất, padang angan urang ngak, pambuak bruk song karja pak ni song mban khik ramik  labik ngak cong pasang iek menuac meng bhum jit, peih bruk mek mẫu test samar ka dom urang mbuan si njom mbak glong.

Tui urang pal akaok Sở Công Thương, kan kandah abih urak ni di dom DN dalam tỉnh Ninh Thuận lac bruk peih ngak tui jalan “3 di labik” song peih ngak “2 labik tal, sa jalan nao”, kayua labik ngak, abih di nyu nan lac oh rami ramik hu siam labik dok ka urang ngak. Dalam dom labik ngak cong, urak ni bahrau hu 4 labik meda peih ngak hu dom bruk ba tabiak ini, min, tuk peih ngak tamuh tabiak phun jien rilo nan ye, dom  DN jeng dok kuhria jalan ngak lagaih atau brei padeih ngak sa tuk vak  piah khik siam mekre, pacang jit .

Daok dom sang mac năng lượng tái tạo, lagaih di labik lac takik urang ngak, labik ngak peih ngak hu bruk “3 di labik” nan ye dok khik hu bruk sản xuất siam mekre. Dom urang ngak bruk dok veik dalam sang mac oh tabiak gah langiu, bhian pathau khan y tế, takik taom gauk, parabha jeng dom nyaom sit dalam tuk mbang menyum saong ngak bruk. Gam haong nan, brei padeih dom bruk oh samar drah, patrun bruk pataom rilo urang ngak song patagok bruk khik iek catang dom bruk pacang jit di labik ngak./.

Urang lang: Hanipha- 30/7 

 

 

 

 

 

 

 

 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân