Brei panuac di mbang nyaom rajaei bilan 11 rah tabiak harei 2-12, Thủ tướng Phạm Minh Chính ieu kakei pataom tame lang talaih dom kan kandah tavak tavaiy, piah jhul khang bruk peih brei phun jien đầu tư công. Patui jalan jhul khang salih bahrau thủ tục hành chính, dong ka doanh nghiệp; khik kajap an sinh xã hội, iek glang ka urang kan kathaot, kuhria caga ka bhap bini raok Tết siam mekre, bui sambai, salamad. Samar ngak salah danak dak ka jalan  pacang caga jit Covid-19 abih gah haong danak dak pasiam veik song patagok  kinh tế-xã hội piah pok tagok pakat hu thẩm quyền. Thủ tướng ndom lac: Pathau khan biak siam ka pacang caga jit, paglong hatai sahneng ka bhap bini lac jalan ngak lac pren khang, lac pasak, lac bruk ngak prong dalam pacang caga jit.

Rilo harei tapa, hajan ia sua khang, ngak khut tayah biak trak dom tinh Nam Trung bộ saong dom khut tayah ini daok tagok glaong tapa yaok harei. Langi di hajan khang, rilo thủy điện di gah mangaok dom kraong praong jeng rilo mbang tathuak ia ngak ka yaok pilih ribau baoh sang njauk kan kandah meng 2 bruk haong gauk lac ia tathuak meng thủy điện saong ia sua. Tapa nan brei mboh, bruk khik ramik binek thủy điện oh ka lagaih. Rilo panuac di dom urang ilamu gah thủy lợi brei thau lac, dom po thủy điện khin khik piah ia rilo di abih piah tal bilan thu daok hu ia piah peih điện. Tal tuk hajan biak khang, langiu bruk kuhria dahlau ye ba gauk tathuak ia tabiak piah khik salamat ka binek.

Ban Bến Tre lac sa dalam  4 labik di  tỉnh Bến Tre hu urang njom ruak tagok glong di abih dalam  7 harei tapa  song daok di tanut pakat  4 di jit. Ong Huỳnh Vĩnh Khánh, Akaok  UBND ban  Bến Tre brei thau, ban hu ba tame pandar  3 labik taduan menuac tame taong ruak min urak ni tong abih dom labik ni jeng bak abih. Meng harei 23/11, ban hu peih bruk khik ramik, iek glang urang njom COVID-19 di sang.Min, urak ni ban Bến Tre dok gaok kan kandah dalam tuk peih bruk brei dok karei, iek ruak di sang kayua menuac daok di ban biak rilo. Menuac daok haong gauk dalam 1 baoh sang biak rilo, nan ye bruk brei dok karei oh ka khik hu siam mekre tui bruk ba tabiak…

Dom harei jaik di ini, baoh kayau ba nao pablei tabiak negar langiu gaok kan kandah nan ye rilo janih kaya nong di tỉnh Tiền Giang kan pablei, yaom trun khang. Tiền Giang lac pasak bein phun mbang baoh di dalam taneh ia, ngan haong jaik 80.000 ha, hu 11 janih baoh kayau đặc sản. Bruk baoh kayau kan pablei tabiak jeng ngak kan kandah tal bhap bini. Tui dom doanh nghiệp saong urang blei, yaom baoh kayau trun khang lac kayua dom pabah mbang negar di Trung Quốc kariek atau brei takik radaih pajeng baoh kayau nao tapa, ngak gar radaih, labaih pandap panda.

Bier harei 2/12, Jabat  An ninh mạng song pacang caga kol tội phạm pandar  công nghệ glong - Công an ban raya  Hồ Chí Minh brei thau, Jabat ni  hu pambuak bruk song dom gah pambuak tal, tong tayah jalan main mbia  song peih bruk main mbia tapa mạng internet – lac jalan main mbia prong abih kuhria meng dahlau mai kayua Công an ban raya Hồ Chí Minh duah mboh. Công an chap hu urang pal akaok lac Huỳnh Long Bạch song Nguyễn Đắc Quý dok nduac dauk di  Quận 7 di bier harei  1/12. Công an ngak biên bản pataom mek pandap tui kuhria yaom labaih  20tỷ 900 triệu  đồng. Tapa duah thau tuk camereip mboh lac, jalan main mbia ni hu pok jien  giao dịch samu  87.600 tỷ đồng (bahrau kuhria jien di dom urang hu mbaok, oh ka kuhria jien đối ứng di po pal akaok).

Dom urang ilamu Anh saong Mỹ bahrau ini hu duah mboh makna ba tal bruk khal darak kan gaok hadei di tuk klauk vaccine caga Covid-19 kayua AstraZeneca ngak tabiak. Tapa roh duah, dom urang ilamu brei mboh cambaih jalan bo protein dalam darah njauk njuk tame sa janih dalam vaccine. Dom urang nan brei thau, ini lac makna ngak brei pachreih tagok dom chuỗi phản ứng hu mbaok di hệ miễn dịch, meng nan jhul tagok bruk ngak tabiak dom cục darak khal. Dalam tuk nan, urang brei panuac di gah AstraZeneca ndom lac bruk rahtabiak di dom cục darah khal meda lac kayua njom Covid-19 oh lac kayua klauk vaccine, min urak ini jeng ka oh hu panuac langyah ginup ka makna ba tal bruk ini. 

Dom urang njom biến thể Omicron  di  Mỹ daok tagok tuk negar Mỹ tal urak ni hu  10 urang, dalam nan hu 5 urang dok di New York. Urang jakar y tế Mỹ urak ni dok caga ka bruk daok hu dom urang njom bahrau meng di tuk urang cemereip njauk ruak hu duah mboh di harei but meng bloh. Dom urang ruak njauk  biến thể Ô-mi-crôn di  Mỹ bahrau ni hu tal gah merong châu Phi song dom urang ni hu klauk jru ginup.

Hadei di labaih 100 harei peih bruk trun manieng bài tập ba mai sang ngak saong bruk pato pabak, sarak pato magru “trun gam dua bruk” hu ngak brei salih bahrau raidiuk di yaok rituh ribau anek saih, gru pato saong amaik ame anek saih di Trung Quốc. Bruk peih ngak sarak “Trun gam dua bruk” gam haong dom bruk pato magru, pahat rup hadei di tuk bac daong ka bruk pato magru di Trung Quốc hu salih karei, siam tagok. Tui pathau khan di Mintri pato magru Trung Quốc, kuhria tal puac bilan 10/2021, dalam 143.000 urang, hu tal 99% sang bac ba tame viek dom bruk pato magru, pahat rup, pasram ilamo diukrai hadei maong bac saong hu jaik 90% anek saih hu mbaok tame./.   

Urang lang: Thu Thao & H.Pha -3/12/2021

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân