Ong Nguyễn Văn Phương ngak bruk daong ka urang

 

Meng tuk jit ruak Covid-19 tamuh khang, ong Nguyễn Văn Phương biak thuvi thuvar saong dua bruk ngak nan lac: Akok Kapol chữ thập đỏ xã saong urang di Pasak tacei ba pacang caga jit Covid-19 xã Mỹ Đức Đông.

Ngan saong ong Phương, langiu di kham merat dalam bruk pathau khan, jak ba urang hoi saong bhap bini dalam xã paglong jhatai sahaneng pacang caga jit ruak, ngak njauk tui 5 paka di Mintri Y tế, urang jakar nan daok kham merat nao jak ba hu 250 paok pandap saong jien alin hadiah ka urang kathaot dalam labik daok karei, labik pacang veik. Abih di nyu nan lac, dalam dom harei camereip di mbang jit ruak ka 4 ini, ong Phương sami samar ngak bruk duah urang F1, F2 di dom sruh jit ruak. Ong Nguyễn Văn Phương khan lac:“Jit ruak ini biak mbuan metai lahik min dahlak oh huac kayua dahlak mboh bhap bini dalam bhum jit biak anit, nan ye ba drei tame kham ngak bruk. Tuk halei dahlak jeng ngak njauk 5 paka di Mentri Y te, dahlak tacei pato, pathau khan ka bhap bini brei ngak siam; gam jak ba urang rik jien daong ka dom labik daok karei piah daong mikva halei gaok kan kandah”.

Ong Nguyễn Văn Phương lac dược sĩ, dahlau diah ngak phaok akaok balai y tế xã Mỹ Đức Đông. Meng sami samar, abih hatai haong bruk daong ka menuac sia, nan ye thun 2004, ong hu Đảng ủy- UB bhap bini xã Mỹ Đức Đông ba mai ngak  akaok Kapol chữ thập đỏ xã. Dalam 17 thun ngak akok Kapol, ong paglong asar bruk ngak di Kapol. Tal urak ini, Kapol  hu labaih 100 urang, ngak bruk di 4 chi hoi; padang kapol dam dara xung kích, kapol dam dara hlan hatian hu 35 urang. Yaok thun, Kapol chữ thập đỏ xã jak ba urang rik tame kadung jien hu labaih 200 trieu dong piah ngak bruk pahala, daong ka urang kathaot. Rilo thun gam Kapol hu dak angan xuất sắc. 

Ong Nguyễn Văn Phương tuk halei jeng sangka tal raidiuk, bruk mbang ngui, daok dang di yaok urang hội saong bhap bini, dom urang kan kandah, ong jak ba rik jien tame daong. Ong Đặng Văn Bình, Akok Kapol Chữ thập đỏ huyện Cái Bè brei thau:“Sa-ai Phương biak abih hatai ka bruk Kapol nyaom. Thun ini, Kapol cơ sở di sa-ai jeng hu dak angan xuất sắc. Birau ini, sa-ai tame bruk pahala, pacang caga jit covid-19 biak siam. Vaktu tapa, sa-ai mek hu angan xuất sắc, dalam 5 thun ye sa-ai hu tal 4 mbang xuất sắc. Sa-ai Phương ngak lavik thun hu rilo  ilamu dalam bruk Kapol, sa-ai biak abih hatai tuk Kapol pakat huyen khin bruk hagait ye sa-ai jeng ngak siam hu abih”. 

Lac sa urang hu 30 thun Đảng, ong oh huac kandah hatai urang halei, brei thau dom bruk urang jakar, urang đảng karei ngak suan atau mbuan ba tal ngal suan piah pasiam veik, langyah chip, rik daong dak padang Chi bộ, Đảng bộ hacih sa-at – khang kajap.

Meng dom kham merat oh padeih dalam bruk ngak di xã Mỹ Đức Đông, huyện Cái Bè, tỉnh Tiền Giang, ong Nguyễn Văn Phương hadah mbaok meta hu Kapol Chữ thập đỏ Việt Nam pakat negar, Ủy Ban Mặt trận Negar Việt Nam alin brei 2 kỷ niệm chương “ Kayua bruk chữ thập đỏ saong Kayua bruk praong jum pataom bangsa”; hu alin rilo Harak meyaom.

Urak ini, jien bilan, phụ cấp ngan saong urang jakar Kapol chữ thập đỏ xã tok takik, min ong Nguyễn Văn Phương daok takre ba abih hatai ngak bruk pahala, bruk puk paga. Ong brei thau, hu kak mkajap saong Kapol chữ thập đỏ, hu ba bui sambai mai ka urang karei nan lac haniem phul di drei./.

Urang lang: Ai Nghiem -29/11/2021

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân