Ban raya hu rilo sang njauk brei dok karei di sang 

Ong Hồ Duy Tân, umo 58 thun, daok di quận Phú Nhuận lac F1, hu brei dok karei di sang hu sa adit hadei di tuk karja pak ni taong yaom lac pabak hu ginup dom bruk ba tabiak di mintri  Y tế. Urang y tế hu tacei pato ong bruk klaak nerak  (patiah pacang mbaok, khan ba-ar uak mbaok, cambuai...) tame kadung katam hu vak haroh “janih nerak mbuan hu SARS-CoV-2”, caik di labik karei mbiah tal tuk abih vaktu brei dok karei. Nerak ni hu urang y tế mai mek nao. Hu brei dok karei dalam sang di drei, hu tacei pato tantu, cambaih laih, njauk ilamu khoa học, ong Tân mboh biak sahnang hatai :

"Dok di sang mboh sahnang hatai jang, hu urang jakar y tế tacei pato ginup nan ye mboh lagaih jang nao daok di labik karei. Pren yava meng tuk njom ruak tal ni jeng oh mboh hu hagait karei . Urang jakar  y tế phường hu tangi sua, tacei pato jalan khik eik pren yava khik ka sang danaok laneng lahei, kakei ginup abih nan ye mboh sahnang hatai"  .

Di quận Phú Nhuận hu 50 sang hu 174 F1 brei dok karei di sang. Bác sĩ Phạm Tấn Hoan, Akaok Jabat Y tế quận brei thau, bruk brei dok karei hu ngak tui  tacei pato di mintri  Y tế song Sở Y tế TP, nan lac dom sang karei di gauk...Dalam tuk tui iek, tapa dut iek mboh F1 jeng F0 ye hu ba nao, dok dom urang karei dalam sang lac  F1, y tế pak ni peih bruk brei dok karei di sang  ka F1:

"Dom urang F1 bo sang hu urang taha, urang ruak mãn tính, uranaih atau urang kamei metain ye njauk ba nao, yaom lac sang labik daok karei…. Kayua F1 mbuan jeng  F0 meyah njom mbak ka dom urang mbuan si njauk ruak nan, ye bruk iek ruak biak kan kandah"  .

Dok di  phường Linh Trung, ban Thủ Đức, ban raya HCM, hu labaih  20 urang  F1 daok hu brei dok karei di  chung cư Phúc Lộc Thọ. Tui ong Trần Quốc Hưng, akaok  UB bhap bini phường Linh Trung, bruk brei dok karei di sang lac sa jalan ngak biak njauk piah XHH bruk pacang caga jit . Dom F1 dok karei di sang  hu balik karei, phường hu kakei oh brei taom gaok gauk, meyah oh ngak tui ye ba nao dok di labik dok karei praong pataom gauk. Bahrau ni, hu po sang trọ likau brei F1 dok karei dalam balik trọ, oh dok hong urang halei karei dalam sang.

Tui ong Trần Quốc Hưng, bruk brei dok karei F1 di sang hu daong patrun biak rilo kan kandah ka labik daok karei praong pataom gauk, ka jien padai di karja saong ka menuac ngak di gah y tế: 

"Tuk taong yaom ye phường ndom biai hong po sang trọ, pathau khan ka  urang thau ni lac F1. Drei brei dok karei di sang piah daong ka urang nan hu sahnang hatai , hu daok pak sang di drei ye pren yava meda hu siam jang" .

Urak ni, ban ray HCM hu labaih  2.000 urang  F1 daok hu brei dok karei di sang  di  15 quận huyện, dalam nan hu  125 urang brei pandar  phần mềm VHD piah pasang iek tapa định vị song mboh mbaok meta  bo ban raya bahrau ba tame pandar piah khik iek urang brei dok karei di sang  .

Tui pasak pasang iek ruak kik ban raya HCM (HCDC), bruk ngak di kapul Covid cộng đồng biak prong dalam bruk pasang iek  F1 dok karei di sang. Yaok harei kapul Covid cộng đồng hu taduan panuac khan brei thau song pasang iek pren yava di F1, urang iek glang F1; dong dut iek pandiak rup pabhap meyah urang nan oh eng drei dut iek hu. Gam haong nan, Kapul Covid cộng đồng dok taduan tui iek, peih ngak catang bruk brei dok karei di sang, pasang iek y tế ka F1 dalam tuk daok karei saong hadei di tuk abih tukvak brei dok karei tapa dom pandap pasang iek, saong hu panuac ieu urang dok dalam song  F1 oh taom gaok menuac daok jaik taphia , oh tabiak gah langui  tuk oh hu bruk hagait song brei cih vak ginup dom mbang taom gaok./.

Urang lang: Hanipha- 28/7

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân