Rilo harei tapa blaoh, min diuk pasang sa-ai Nguyễn Thị Hương haong sa-ai Kim Văn Chinh, ngak bruk ka  Công ty TNHH Hài Mỹ-sang mac Sài Gòn, daok di ban Thuận An jeng oh var hu tuk taom veik 2 anek sit hadei di 21 harei daok pa-atah labik karei. Dahlau di nan, dalam tuk ngak bruk, taom gaok ayut sahabat, dua diuk pasang jeng F1 saong brei nao daok labik karei. Yaom lac dua anek hu karja palei  saong mikva puk paga  iek glang min lac amaik ame, dua sa-ai ini oh klah di haduh hatai: “ Hu daok dalam labik daok karei meng thau yau hlei, tuk halei jeng mboh haduh hatai oh thau drei ruak atau oh, dua diuk pasang nao yau ini anek bik daok pak sang tahu yau habar. Caong khin Karja samar daong ka bhap bini hu vaccine pacang ruak piah sahanang hatai nao ngak bruk”.

Jit ruak dui atah ngak ka raidiuk rilo sang urang ngak gaok kan kandah trak. Manuac lahik bruk ngak, menuac oh hu tagok mon ngak bruk nan ye jien bilan trun daok takik, dalam tuk raidiuk nao ngak mbang atah palei bruk hagait jeng abih jien. Sa-ai  Nguyễn Thị Ngọc Giàu, palei daok di Cà Mau, urang ngak Công ty TNHH Giày Kim Xương (labik ngak kong Đại Đăng, ban sit Thủ Dầu Một) khan lac: dua thun ini, jit ruak tamuh nao tamuh mai, raidiuk di diuk pasang jeng kan kandah tui. Pasang lahik bruk ngak, diuk oh hu tagok mon ngak bruk nan ye bilan halei jeng nao nyim jien cai. Jit ruak mbang ka 4 ini oh thau tal tuk halei meng abih. Urak ini, tame Cty jeng biak huac kayua oh thau njom ruak tuk halei, min meyah oh tame ngak ye oh hu jien piah mbang.

  “Dalam tuk jit ruak ini khol dahlak oh hu jien ye karja daong brei brah, mì, atau trun jien pah bilik trọ. Hu yau nan biak uan tabuan oh khin ndok urang brei jien. Tapa tukvak kan kandah ini, khol dahlak hu nao ngak veik meda kuhria hu ka raidiuk.”

Oh lac caong khin hu klak rabha dalam tukvak gaok kan kandah kayua jit Covid-19, dom baoh sang urang ngak daok caong khin karja tỉnh Bình Dương saong doanh nghiep hu pabako sarak daong dahlau piah urang ngak blei hu sang daok  yaom lap, atau hu trun jien bac ka anek bhik. Anak dom haduh hatai di urang ngak, rilo doanh nghiep hu daong pandap panda ka urang sahanang hatai. Hu dom doanh nghiep oh hu đơn hàng, urang ngak padeih min daok hu bayar jien bilan; atau daong jien ka sang urang ngak daok dalam labik njauk pacang veik. Rilo doanh nghiep daok hu panuac ieu urang ngak patagok bruk “hala siam papaok hala tahak”  klak rabha haong dom sang urang ngak kan kandah. Ong Hoàng Sỹ Thành- Akok công đoàn Công Ty TNHH Scieltex Tsukasa Việt Nam (Khu công nghiệp VSIP I, ban sit Thuận An) brei thau, sangka tal raidiuk  urang ngak lac jalan di bruk patagok:“ Công đoàn cơ sở pambuak bruk haong Cty sangka, nao ravang, pachreih ba urang sahanang hatai ngak bruk, kak kajap Cty, haong bruk ngak saong tani tanat raidiuk”.

Lac labik njauk sangka, khik caga quyen loi ka urang ngak,  Liên đoàn Lao động tỉnh Bình Dương hu tacei pato dom pakat công đoàn ginum biai saong urang pah manuac ngak piah brei ginup jien bilan ka urang ngak gaok kan kandah kayua jit Covid-19. Gam haong nan, padang angan yaok ribau urang ngak lac F0, F1, F2 saong daok di labik njauk pacang veik piah samu daong. Muk Nguyễn Hoàng Bảo Trân - Phaok akaok Liên đoàn Lao động tỉnh Bình Dương brei thau: “ Ngan saong dom sang hu urang kumei metian, raong anek sit, khol dahlak jak ba đơn vị kaoh tabiak meng kadung jien phúc lợi piah daong ka dom sang nan. Sang hu ame, atau amaik daok dalam labik brei daok karei khol dahlak alin hadiah pandap, nan lac bruk pachreih ba piah urang sahanang hatai jang”.

Daok bruk an sinh xa hoi, urang ngak praong di tỉnh Bình Dương jeng hu kaoh taneh padang ngak sang daok xa hoi yaom lap, sang bac hu padang ngak jaik labik ngak kong piah urang ngak lagaih taduan raok anek bkik. Meng nan, dalam abih tih 1 trieu 200 rabau urang ngak meng dom tỉnh mai Bình Dương ngak bruk, hu biak rilo urang palih ruah Binh Duong piah daok veik suai lavik. Urang ngak praong di tỉnh jeng pachreih doanh nghiep  hu che do phuc loi ka urang ngak piah khik takai urang dalam tuk kurang urang ngak yau urak ini./.

Urang lang: Ai Nghiem - 28/6/2021

  

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân