Labaih 5 tuk page, baoh sang atah di muk H Djuăn Niê, daok di palei Drai Sí, xã Ea Tar, huyện Cư Mgar, bak manuac chreih chrai. Ong Y Thôn Niê saong dom adei sa-ai dalam but pajaih hu mbaok ginup abih piah gam haong po sang sik ngak rilo pabui tano pasaih trak labaih 30 kilo,  2 drei manuk tano praong saong yaok pluh caik tapai. Ini lac dom pandap hu makna praong hu pandar dalam adat pambuak talei rohim adei sa-ai di muk H Djuăn saong  ong Y Thôn.

Tuk pandap ngak adat hu dak tagok blaoh blai, sap chieng raok tuai yava tagok yau ieu da-a abih gauk samar takai yam tame baoh sang atah piah peih ngak adat pambuak talei rohim. Dom adei sa-ai likei saong tuai damuai daok la di bilik gah anak, daok po sang saong dom adei sa-ai kumei daok di sang ging. Peih ngak adat, gru da-a yang daok la mbaiy mbaok nao gah ia harei tagok, meroi likau khan dom po yang saong da-a muk kei mai hu mbaok haong anek taco. Adat nan peih ngak da-a yang 3 mbang, akok meti da-a ong muk kei; patui di nan lac adat jao kon di 2 urang peih ngak adat saong puac di abih lac adat ngak yang ndua dhar phol, thau dhar phor.

Adat jao kon hu makna biak praong dalam bruk pambuak talei rohim di 2 urang jeng yau 2 baoh sang but pajaih. Kuhria meng tuk ini mbiah tal metai, dua urang nan miat miat lac adei sa-ai haong gauk, diuk metai hu gauk, rambah rambeip atau kaya meda jeng hu gauk. Hadei di yaok mbang meroi da-a yang, gru iew yang padeih veik piah po sang saong dom tuai menyum alak tapai, tadhau ayuh 2 baoh sang anit ranam gauk, pambuak khang kajap ka dua urang pambuak talei rohim ngak adei sa-ai.  Muk H Huyên Ayun, Bí thư chi bộ palei Drai Sí brei thau, biak lavik paje dalam palei meng hu adat yau ini. Bruk peih ngak adat pambuak talei rohim adei sa-ai  meda rik daong bhap bini, abih di nyu lac urang ranaih umo hu duah thau saong khik ramik dom adat cambat, tanarakun meng kan  di bangsa drei.

Daok ong Y Wem HWing, Phaok akaok UB bhap bini huyện Cư Mgar brei thau, pambuak talei rohim adei sa-ai lac sa adat ndung bak hatai anit ranam di urang Ê Đê, ndung bak bruk pato pakai saong pambuak pagam bhap bini. Bruk pambuak talei rohim nan hu daong ka 2 urang karei darah jeng adei sa-ai ralow darah, maong iek gauk yau adei sa-ai sa baoh sang haong gauk, daong ka gauk tuk gaok kan kandah. Kayua yau nan ye, bruk padang ngak veik adat ini haong rilo adat karei di bhap bini 24 bangsa dalam tỉnh oh lac rik daong khik ramik ilamu bo daok ngak jeng bruk jum pataom, pambuak bruk cak rok patagok kinh te - xa hoi.      

Ngan saong urang bangsa Ê Đê, adat pambuak talei rohim adei sa-ai nan lac ilamu siam gheih, brei mboh bruk jum pataom gauk, daong ba gauk yam tapa kan kandah. Harei ini, di rilo puk palei jeng daok khik adat pambuak talei rohim di sa urang saong sa baoh sang, but pajaih. Min binah ngak adat hu ramik veik ka nyu lagaih, pandap ngak adat jeng tui jien ndo hu takik atau rilo di yaok baoh sang, meda lac sa drei manuk, sa caik tapai atau sa var mbang huak sit hu mbaok ginup urang di dua gah baoh sang. Bruk pambuak talei rohim jeng hu makna siam mekre, hu peih ngak tui jalan halan hatian, oh hu bruk urang ini pambak tame urang diah, saong hatai caong khin yaok urang diukrai haong gauk gheih ghang, yau adei sa-ai sa baoh sang, daong gauk yam tapa yaok kan kandah, piah padang puk palei dak harei dak trei sir, kaya meda, siam gheih./. 

Urang lang: Ai Nghiem – 28/5/2022

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân