Ong hu pok brei angan urang siam hatai 

Yaom lac oh menek tabiak di bhum taneh Cà Mau min ong Đặng Phụng Tâm palih ruah Cà Mau ngak labik kak kajap haong raidiuk di drei. Hadei di harei taneh ia sron mbon, tabiak truh di mblang mesruh, urang lin Wa Ho palei daok di Vĩnh Long ba diuk anek trun tal Cà Mau piah padang mbang angui. Tapa rilo tukvak kan kandah, tuk hu kandaong labaih drap ar, jien padai, diuk rai dalam trei sil, ong jeng oh var hu dom harei rambah rambup dahlau diah, nan ye, ong tuk halei jeng halan hatian klah rabha, daong ka dom urang hu rai diuk kan kandah. Ong bhian jak ba gauk gar, diuk anek di drei pachreih tui dom bruk ba-yar dhar phon, pachreih bac, pachreih megru, brei ka urang kathaot, abih di nyu lac bruk rik prein tame padang ngak palei pala bahrau.

Tuk hu thau labik sinh hoạt ilamo di ấp Khai Hoang Vàm mbaih mbaoh caong hu padang ngak bahrau bo oh hu taneh piah padang ngak, nan jeng lac tukvak karja palei daok nao jak ba, pathau khan bhap bani piah alin brei taneh padang ngak veik labik ngak bruk bahrau, ong Tâm halar hatian alin brei labaih 360 m2 taneh bein. Tal harei ini, labik ngak bruk di ấp hu padang ngak siam gheih, bruk pataom gauk ginum biai, sinh hoạt di mikva hu mbuan laghaih jang biak rilo.

Ong Nguyễn Minh Thống, Phaok akaok UBND xã Quách Phẩm, brei thau: oh njauk lac harei ini ong Tâm meng rik daong prein haong puk palei, bo ong daok jak ba ayut sahabat, gauk gar, abih di nyu lac dom anek kamuan di Cà Mau rik daong prein yava, jien padai piah ngak tatua, jalan palei, palaghaih ka dom anek saih saong bhap bani nao mai, pajeng ba pandap panda. Ong Tâm tuk halei jeng saneng lac: “Karja buh jien tame ngak hạ tầng palei pala, dahlak lac sa rahra hu mbang tui dom kein laba meng bruk ngak ini, nan ye njauk rik daong jien padai saong prein yava piah ka dom danak dak phúc lợi di puk palei samar hu ngak salah blaoh saong ba tame pandar duh ka mikva”.

Dak iek prong jang hatung hatai di ong Đặng Phụng Tâm tuk thau lac dalam angan Phaok akaok Kapul urang taha umo di xã, ong bhian daong ka dom urang taha daok sa drei, njauk ruak kik, kan kandah dalam rai diuk. Tal harei ini, ong oh kanar hadar abih drei hu daong ka dom urang rambah rambup, ruak kik pandik harao. Tok thau lac tuk mahit thei laik tame cuang kandah ye ong samar duah jalan daong. Blaoh tal tuk dom urang nan yam tapa kan kandah, ong meng mboh sahanang hatai, bui hatian.

Urak ini umo 81 thun, min yaok harei ong Tâm jeng daok tari tareng daong diuk anek ngak bruk sang, mong iek paga phun hijao, pabam pajaih phun bingu alin brei ka mikva puk paga pala anak sang piah ngak mekre mbaok meta palei pala, khik ramik hacih sa-at alam môi trường. Sang ong Tâm oh njauk lac hu thau tal lac sa baoh sang ilamo hadah krah, anek taco jeng manuac jeng urang bo daok hu biak rilo manuac sia daok jaik taphia anit ranam kayau diuk rai siam mekre, abih hatung hatai haong puk paga.

Dalikan ka baoh sang ong Đặng Phụng Tâm alin brei taneh padang labik ngak bruk ka ấp oh lac tok ndom tagok hatung hatai brei ka kein laba di rahra, bo daok lac bruk hu meng jak ba, ieu pataom prein di bhap bani tame padang ngak dom danak dak ka bhap bini, duh ka bruk cakrok patagok kinh tế - xã hội di puk palei./.

Urang lang: Jasi -27/6

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân