TS-BS Lê Quốc Hùng brei thau, janih jru halei jeng meda hu dom bruk rah tabiak oh yau hatai caong khin tuk pandar. Anak meta brei mboh, oh lac jru, vaccine bo dom janih pandap mbang, pandap menyum yaok harei jeng meda ngak ka anek manuac drei njauk dị ứng. Pagap yau dom urang njauk dị ứng, katal hadei di tuk mbang kaya ikan dalam aia. Kayua yau nan ye tuk pandar vaccine ye khaol drei jeng meda hu dom bruk rah tabiak oh yau hatai caong khin.

Bruk rah tabiak tuk klauk vaccine rabha jeng dua janih.Janih ka sa nan lac bruk bhian mboh, oh jhak hagait. Nan lac khaol drei meda mboh pandiak, pandik di labik klauk, glaih glar yau cảm cúm bhian mboh. Min dom bruk ini oh jhak tal urang klauk jru, nyu meda abih hadei di 2-3 harei klauk vaccine.

Dom bruk ka dua lac jhak. Nan lac sốc phản vệ trak, lac bruk rah tabiak oh yau hatai caong khin mbuan ba tal metai lahik. Dom urang klauk vaccine njauk sốc phản vệ atau gaok dom phản ứng phản vệ trak rilo atau takik ye urak ini yaok janih vaccine hu sa tỷ lệ karei di gauk. Min urak ini bruk nan hu biak takik.

Piah plaih phản ứng phản vệ tuk klauk vaccine ye urang hu klauk njauk pambuak bruk ka nyu siam haong urang y tế. Urang y tế dahlau di tuk klauk njauk tangi sua urang nao klauk vaccine dom panuac sua tangi tui bảng sàng lọc. Pagap yau urang nao klauk vaccine hu dị ứng hagait halei oh, mbang kaya ikan dalam aia hu katal halei ohi, urak ini hu ruak cấp tính atau daok iek ruak hagait piah iek hu laghaih haong janih vaccine ini halei oh.

Yau nan min, bruk sàng lọc ini oh meda taong yaom  ginup hu abih kayua lac hu dom urang dahlau diah biak khang kadang, oh ka tuk halei dị ứng haong pandap mbang, jru, klauk jru pacang caga min jeng meda mbuan njuak phản vệ hadei di tuk klauk vaccine. Kayua yau nan ye hadei di tuk klauk jru pacang caga, urang ngak gah y tế pandar urang klauk jru pacang caga njauk daok veik 30 minit tal 1 tuk di labik klauk piah meyah rah tabiak bruk hagait,urang meda daong cấp cứu chip di labik.

Tal harei ini angaok dunya jeng bahrau hu dom dom urang phản ứng phản vệ khang ba tal ruak trak oh daong hu. Daok binah prong dom phản vệ nan lac daong hu.

Jeng tui TS Lê Quốc Hùng, hadei di tuk klauk vaccine, hu dom urang hu bruk oh siam rah tabiak suai jang, min bruk ini biak takik. Nan lac phản vệ hadei 2-3 tuk atau 2-3 harei hadei min bruk ini biak takik, 1 triệu urang meng hu sa urang. Hadei di 3 harei klauk vaccine, meyah urang klauk mboh hu bruk hagait nan oh laghaih ye njauk mai veik labik y tế saong pal tui harak klauk jru piah ka uang y tế thau, meng nan hu jalan iek ruak ka nyu siam laghaih di abih./.

Urang lang: Jasi -  24/6/2021

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân