Rilo janih njam hu palih ruah payua ka ban raya 

Sa-ai Nguyễn Văn Kiều brei thau, bilan 5 meng blaoh, sa-ai haong sa ayut sahabat jak gauk buh jien tame jaik 100 triệu đồng piah pala 2, 5 ha baoh pau. Urak ini tal tuk puac mek, njauk di tuk jit ruak covid-19 daok tamuh khang di dom tỉnh gah meraong. Sa-ai ginum hong ayut alin hadiah brei abih, payua tal mikva dalam labik daok njauk pacang veik di bal raya Hồ Chí Minh. Kayua sa-ai sahneng lac jien drei meda duah hu tuk karei, daok tuk ini mikva daok gaok kan kandah ye drei njauk daong. Sa-ai khan lac: “Dahlak oh hu jien bo hu kaya nong nan ye dahlak daong kaya nong brei ka mikva daok dalam bhum jit. Taong abih manuac dalam sang thei jeng pachreih tui bruk ngak ini di dahlak”.

Anak bruk ngak biak hu makna di sa-ai Kiều, kapul dam dara xã Quảng Sơn saong dom klup, kapul halar hatian hu daong pren haong sang sa-ai buac mek kaya nong payua tame ka mikva daok di bhum jit. Sa-ai Nguyễn Tiến Thịnh, Bí thư Đoàn xã Quảng Sơn, huyện Đắk G’Long brei thau: “Dom harei tapa, Đoàn xã yaok harei hu brei jaik 20 urang đoàn hu mbaok tame haong dom kapul urang ngak pahla buac mek baoh pau samar drah piah pajeng trun daong ka bhap bani di bal raya Hồ Chí Minh pacang jit”.

Gam haong nan, dom kapul urang ngak pahla samar pambuak haong dom mbang radaih anit ranam piah ba dom janih kaya nong nao tal mikva bal raya Hồ Chí Minh. Sa-ai Bùi Thanh Danh, sa urang halan hatian daok di bal Gia Nghĩa, khan lac: bruk ngak biak hu makna di sa-ai Kiều daok pambak khang bruk sa hatung hatai haong gauk pamong tal bhap bani daok njauk pacang veik kayua jit ruak covid-19.

Piah samu dom mbang radaih, kapul hu pambuak bruk haong dom po radaih hu hatai ngak pahla, dom sruh radaih pajeng oh mek jien. Langiu di nan, dom urang dalam kapul daok hu pambuak bruk haong dom po radaih daok gaok kan kandah kayua jit ruak, daong brei jien xăng, menyek piah ka dom po radaih ini hu jien tame, jien tabiak, pajeng ba kaya nong tame ka mikva bal raya Hồ Chí Minh.

Bal raya HCM daok dalam dom harei khang drei pacang jit. Mai meng dom hatai anit ranam klah rabha di bhap bani dalam taneh aia bo bhap bani bal raya hu pabak pren khang piah yam tapa kan kandah, kham merat jhul kadul likuk jit ruak piah ka rai diuk hu siam mekre veik yau dahlau daih./.

Urang lang: Jasi -26/7

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân