Tapon pabe ,kubo di Ninh Thuận 

Dalam tỉnh Ninh Thuận urak ini hu labaih 17.300 ha padai, 1.260 ha nho, 1.012 ha medar, 4.728 ha pa-aok blait, 3.345 ha njam patam dom janih. Langiu di nan, tỉnh daok hu cak rok patagok bruk raong athur, ngan haong tapon limo 120.120 drei, pabui labaih 114.000 drei, pabe 123.120 drei, pabo labaih 107.000 drei. Min kayua darak pasar pablei kaya nong jeng daok gaok kandah,  nan ye gah ngak nong haong dom puk palei daok duah jalan pablei kaya nong ka nyu khang kajap.

 Anak meta mboh lac, 2 thun jaik di ini, tỉnh Ninh Thuận oh lac gaok kan kandah meng jit COVID-19 bo tuk tame bilan paik, mek, rilo urang nong laik tame bruk pala njauk ye laik yaom, oh pambuak bruk hu haong dom gah pablei tabiak, njauk pok sap iew daong pablei brei yau tamekai, akaok lasun ngù … Makna lac kayua pala, ngak sit sot, prai rài. Bruk pataom taneh piah ngak jeng labik pala prong di dom doanh nghiệp, HTX, tổ pambuak bruk daok gaok rilo kan kandah. Sa makna tra nan lac kayua bruk ngak nong oh ka tui bruk caong khin di darak pasar, rilo urang nong oh ka randap ngak dom adat hukum ka bruk hacih sa-at pandap panda, oh ka pandar dom ilamu - kỹ thuật tame bruk pala drak piah paglaong chất lượng pandap panda. Kayua yau nan ye oh ka padang hu talei pambuak bruk di urang nong saong Doanh nghiệp dalam bruk pala drak saong pablei kaya nong, nan ye dom janih kaya nong kan duah hu labik pablei.

Tukvak tapa, Sở Công Thương hu peih ngak rilo jalan piah daong ka dom doanh nghiệp, HTX, sang urang nong dalam bruk pambuak gauk pablei dom janih kaya nong. Gam haong nan, daok peih praong bruk pambuak pagam “labik pablei – labik blei” pandap panda, pambuak pagam jalan pabak pandap panda piah palaghaih ka bruk pablei pandap panda, kaya nong di tỉnh tapa dom jalan pablei meng kan saong jalan bahrau urak ini.

    Amuk Nguyễn Thị Ánh Đào, Phaok Yam ndok iek gah Siêu thị Co.opmart Thanh Hà, brei thau: Gam haong Sở Công Thương saong dom jabat karei dalam tỉnh, Co.opmart Thanh Hà hu pambuak bruk dahlau haong dom HTX, labik ngak, sang urang nong di puk palei, urak ini siêu thị pablei dom janih njam patam, baoh karaoh di dom labik ngak, lac: Nguyễn Đức Ngà, Nguyễn Văn Trinh, baoh sang urang nong Nguyễn Linh, daok di phường Văn Hải (bal Phan Rang – Tháp Chàm). Piah ka dom janih kaya nong dalam tỉnh hu urang blei rilo jang saong ngak jeng pren meriak gauk haong dom tỉnh ayut ye dom labik pabak, HTX, baoh sang urang nong njauk hu jalan ngak, pandar ilamu khoa học - kỹ thuật dalam bruk ngak tabiak, tame paok pandap panda, piah khik kajap chất lượng, paglaong yaom di pandap panda saong ngak brei urang blei sahanang hatai. Gam haong nan, jhul khang bruk pambuak gauk haong dom doanh nghiệp pablei chip meng tuk camereip.

Tui Sở Ngak nong saong patagok palei pala, dom janih kaya nong dalam tỉnh rilo meng pablei dalam negar, ta-eng asal pa-aok blait ye hu pablei tabiak negar langiu, daok nha đam pablei takik tapa dom negar jaik taphia. Kayua jit COVID-19 nan ye urak ini gaok kan kandah dalam bruk pajeng ba pandap panda saong pablei kaya nong suai jang dut haong quý I-2021; yaom pablei dom janih kaya nong yau: Nha đam, măng tây hijao, madar nyu trun, dom janih pandap ngak tabiak yau: alak vang nho, nho bluh thu, madar bluh thu, mật nho pren pablei trun. Yau nan min, di tukvak urak ini, bruk ngak nong oh ka tame bilan paik, mek nan ye kaya nong oh ka hu rilo, nan ye oh hu kaya nong kandaong labaih. Taphia di nan, dom janih pandap meng menuk ada, athur raong tok pablei dalam negar hu yaom grap tanat; yaom trun tagok hasit ngan haong ralow limo, pabe, pabo, menuk ada min oh trun tagok rilo. Daok ralow pabui meng hu pandar rilo jalan ngak grap tanat yaom kaom, ralow pabak hu ginup nan ye yaom pabui diuk takik trun tagok. Tui nan, oh hu kandaong labaih dom janih pandap meng athur raong.

Ong Đặng Kim Cương, Akaok Sở Ngak nong saong patagok palei pala brei thau: dalam tukvak ini, dut haong dom tỉnh bal karei dalam negar ye bruk pablei kaya nong di tỉnh Ninh Thuận oh ka tal tanut piah daong. Pandap panda kaya nong oh ka tame bilan paik, mek nan ye oh hu kandaong labaih. Min bruk pambuak gauk ngak lac kadha prong dalam tukvak ini piah cak rok patagok bruk ngak nong tui jalan khang kajap; pataom tame pambuak pagam “labik pablei – labik blei ”, paglaong chất lượng, paglaong yaom kaya nong daong ka urang nong yam tapa kan kandah di urak ini… Piah pataom tame peih talaih dom kan kandah, dalam tukvak anak tal, gah ngak nong tỉnh Ninh Thuận meda pasang iek veik bruk pala drak tui bilan piah pagam haong bruk pablei kaya nong, abih di nyu lac ngan haong dom janih kaya nong hu rilo, daok caga tame paik, mek. Pambuak bruk haong dom sở, ban, ngành, puk palei daong brei, tacei pato urang nong peih bruk pala drak saong ngak jeng jalan pambuak bruk haong dom doanh nghiệp piah blei abih pandap panda kaya nong, grap tanat labik pablei. Gah ngak nong meda pambuak bruk haong Sở Công Thương saong dom mentri, dom gah di trung ương dalam peih ngak dom bruk pambuak gauk, jhul patagok bruk pablei kaya nong./.

Urang lang: Jasi -25/7

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân