Bruk tame tabiak di rahra brei ngak catang piah khik ka bhum hijao

Huyện An Phú, sa dalam 2 palei hu dom labik pandiak ka urang njaom mbak Covid-19 di tỉnh An Giang. Pak ini urak ini hu 3 sruh jit daok tamuh khang lac ban sit Long Bình saong xã Khánh An. Tui UB bhap bani huyện An Phú, kuhria meng harei 15/4 tal 16/9, dalam huyện hu jaik 1.000 urang njauk Covid-19, dalam nan hu jaik 530 urang dalam bol bhap rahra; ini jeng lac labik hu urang njauk Covid-19 glaong abih dalam tỉnh. Makna caik ka jit ruak njaom mbak khang dalam huyện, urang pan akaok huyện jeng mboh lac kayua bruk pacang caga jit dalam tukvak tapa oh siam, takik caik hatai sangka. Ong Trần Hòa Hợp, Akaok UB bhap bani huyện khan lac: 

“Mai meng rilo makna, dalam nan hu dom makna lac: Jalan pacang caga jit di baoh sang, bhap bani oh ka njauk tui bruk ba tabiak, sang danaok jaik taphia gauk, labik palei bè jeng jaik gauk… nan ye bruk njaom mbak nyu biak prong. Langiu di nan, lac hatai saneng, bruk kham merat di Mban tacei pato di gah la oh ka glaong; dalam tuk peih ngak dom jalan ngak pacang caga jit ruak, daok  kurang caik hatai sangka… ”.

Daok di huyện Phú Tân, ini lac labik ka dua di tỉnh daok hu labik pandiak ka manuac urang njaom mbak dalam bol bhap rah ra. Meng 5 urang mboh njauk Covid-19 harei 13/9 di ban sit Phú Mỹ, huyện peih bruk mek mẫu test samar taong abih labik hu sruh jit, mboh hu yaok rituh urang njaom mbak. Urak ini, puk palei daok duah piah ba F0 tabiak truh bol bhap rah ra. Ong Huỳnh Thành Danh, Bí thư huyện ủy Phú Tân brei thau.

“Ban sit  Phú Mỹ brei patagok bruk pa-atah di gauk meng Sarak 15 tagok sarak 16 chip dalam melam. Saong tabiak bruk pacang veik catang ka urang jakar nao mong iek di 13 tổ. Ieu pataom dom kapul urang jakar y tế di 9 xã dalam huyện piah daong ka ban sit Phú Mỹ test samar taong abih bhap bani dalam ban sit, piah duah mboh dom F0”

Bruk peih ngak dom jalan pacang caga jit hu bhap bani pachreih hatai ngak tui. Ong Hồ Anh Dũng, sa urang daok di bal sit  Phú Mỹ brei thau. 

“Karja brei ngak yau nan lac biak siam, nao pasang iek… blaoh urang ini daok atah urang diah, labik ini atah labik diah, biak uan tabuan, uan kayua bhap bini ngak tui. Ngak siam yau nan, caong khin lac jit ruak meda trun samar piah ka bhap bani ngak mbang, cak rok patagok kinh tế gilac veik ”.  

Anak bruk jit ruak daok tamuh khang, abih di nyu lac di huyện An Phú, Công an tỉnh An Giang hu brei 500 urang jaka, urang lin parabha jeng rilo tổ, khik catang gah langiu saong gah dalam labik pacang veik, khik kajap an ninh trật tự, pataom duah, padam jit. Langiu di nan, Công an tỉnh daok ba tame pandar 2 balai iek ruak lưu động di dua 2 labik pandiak dalam huyện  An Phú piah samar daong ka bhap bani hu iek glang prein yava samar di abih tuk caong khin.

Hu thau, meng harei 7/9, tỉnh An Giang hu peih ngak bruk brei daok atah di gauk dalam tỉnh tui Sarak 15. Dalam nan, tok hu dom xã, phường, ban sit daok dalam “Bhum kanyik”, “bhum bhong” daok brei pa-atah di gauk tui sarak 16.

Ong Nguyễn Thanh Bình, akaok UB bhap bani tỉnh An Giang ndom lac, tapa 10 harei peih bruk brei daok atah di gauk tui Sarak 15, dom puk palei dalam tỉnh mboh lac takik sangka, iek njuan; kurang pathau khan, pasang iek; hu dom bhap bani oh ngak njauk tui dom jalan pacang caga jit ruak; di dom labik pacang veik daok hu mboh “catang gah langiu, cadu gah dalam” nan ye jit ruak mbuan tamuh khang saong njaom mbak prong dalam bhap bani.

“Yaom lac hu mai veik haong Sarak 15, min khaol dahlak oh iek hanjun. Jeng brei giới nghiêm meng mon 6 melam tal mon 5 page mesup. Mboh hu sruh jit ye khaol dahlak brei pacang veik, duah thau labik halei lac pasak jit piah pacang veik, piah dut iek, pataom mek F0 tabiak truh bol bhap rahra. Tuk pacang veik yau nan njauk pasang iek biak catang meng gah dalam saong gah langiu. Taong yaom labik halei lac bhum hijao, labik halei lac bhum kanjik, katam, bhum bhong… piah khik iek saong hu jalan ngak ka nyu hijao veik”.

Piah oh tamuh tabiak sruh jit bahrau, urak ini An Giang daok kham merat haong dom jalan peih ngak siam Sarak 15 di Thủ tướng Raja-ei; patagok bruk pasang iek, taong phat, ieu kakei bhap bani ngak njauk tui 5 paka di Mentri Y tế, pambuak haong bruk klauk vaccine pacang caga Covid-19 tuk hu parabha brei; kham merat khik kajap saong peih prong “bhum hijao”, khang hatai jhul kadhul likuk jit ruak dalam tukvak samar di abih, yam tal dak padang rai diuk siam mekre bahrau yau di tuk oh ka hu jit ruak./. 

Urang lang: Jasi -24/9

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân