Akaok adit dahlau, tuk tame mon ngak bruk, dom blah khau tin di dom adei sa-ai urang vak dom tỉnh bhum kreh negar payua mai, daok la ramik pasiam veik bo haok ia meta: mikva Quảng Bình, Quảng Trị, Đà Nẵng… rik pataom pandap mbang daong ka dom labik pacang veik di ban raya HCM. Jang urang halei karei, menuac di bhum kreh negar thau cambaih dom kan kandah bo bhap bini dalam dom labik pacang veik di ban raya HCM daok gaok.

Nan ye, menuac rik baoh paloi, baoh kadaoh, pok njam, pok ratak, menuac nduac nao duah blei ikan tasik mai caik ia patau… piah ba pandap tame gah Meraong. Dom sruh radaih nan oh lac pajeng pandap mbang, bo daok ba tui hatung hatian di urang bhum kreh negar mai haong ban raya HCM, pasak kinh tế praong abih di taneh ia, saong jeng lac labik daong ba, pato pakai dom rai urang bhum kreh negar jeng menuac jeng urang.

Dom pluh thun tapa, tuk rabuk ia sua tuh tame bhum kreh negar, rahra dauk dalam kan kandah. Ia sua ka oh trun, rabuk ka oh abih, dom sruh radaih pandap meng TPHCM, Đà Nẵng… pajeng nao daong ka bhap bini bhum ribuk, ia sua. Anait ranam gauk lac yau nan.

Urak ini, ban raya HCM jit ruak rah tabiak srau kadau, dom tỉnh bhum kreh negar daok kuhria jalan ba menuac di bhum kreh negar mai veik palei, patrun naong trak ka ban raya HCM. Harei 14-7, urang pan akaok tỉnh Quảng Nam tacei pato dom huyện, ban sit dalam tỉnh tapa Hội đồng hương Quảng Nam ba dom sruh radaih hu urang jakar y tế tame ban raya HCM pajeng mikva nao palei daok pa-atah di gauk.

Harei 15-7, dalam blah thư payua  Hội đồng hương  ban Đà Nẵng  daok di ban raya HCM, ong Lê Trung Chinh, Akaok UB bhap bini ban Đà Nẵng, vak lac: “Tapa Hội đồng hương Đà Nẵng di ban raya HCM, kol dahlak payua tal mikva, adei sa-ai panuac pachreih ba abih hatung hatian meng Đà Nẵng. Gam haong nan, hu panuac caong Hội đồng hương tui iek, duah thau piah pambuak bruk haong ban raya kuhria jalan ba rahra hu hatai caong mai veik Đà Nẵng. Kol dahlak ba mbuan lagaih di abih brei ka rahra Đà Nẵng hu mai sang veik”. Panuac sanya brei ka rahra “hu mai sang veik” di ong Lê Trung Chinh tuk ini, lac sa bruk kham merat praong, kayua Đà Nẵng jeng daok khang drei pacang jit.

Dalam mesup harei 15-7, UBMT negar Việt Nam ban Đà Nẵng jeng hu daong 500 triệu đồng brei ka Hội đồng hương Đà Nẵng di ban raya HCM daong ka rahra saong peih bruk ba urang nao palei. Gam haong labaih 500 triệu đồng bo doanh nghiệp, menuac sia di Đà Nẵng daong brei, Hội đồng hương Đà Nẵng samar kuhria jalan ba 1.000 menuac Đà Nẵng meng ban raya HCM nao palei.

Tapa pasang iek, urak ini rahra Đà Nẵng, dalam nan rilo meng lac menuac ngak bruk meng tangin takai, anek saih, sinh viên daok di ban raya HCM caong khin nao palei. Kayua yau nan ye, Hội đồng hương Đà Nẵng di ban raya HCM dang tabiak, peih bruk pachreih ba, daong dom menuac daok veik saong peih tabiak dom sruh radaih hu ginup pandap mbang, menyum piah ba rahra mai veik Đà Nẵng. Nao tal palei, rahra hu brei daok pa-atah di sa labik praong pataom gauk oh abih jien kayua ban Đà Nẵng daong. Daok Hội đồng hương ye kaoh tabiak meng kadung jien daong yaok urang 500.000 đồng jien cai tui jalan.

Dalam kan kandah, meng thau cambaih jang hatai gauk. Dom hatung hatian nan, dom bruk ngak siam mekre nan, daok pabak prein khang piah ka kol drei samar jhul kadun likuk jit ruak./.

Urang lang: M.Phuong-24/7/2021

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân