Tapon nyaom bol pan phao kraong Quân khu 7

 

Thường vụ Đảng ủy Quân khu 7 hu tabiak harak tacei pato, ieu dom gah di tapon nyaom bol pan phao kraong Quân khu 7 peih bruk tabung glaong daong ka bhap bini dalam QK7 yam tapa dom kan kandah meng jit COVID-19. Tui nan, Thường vụ Đảng ủy Quân khu 7 ieu dom gah dalam QK7 daok hu mbaok dalam labik daok ngak tui Sarak 16 di Thủ tướng Rajaei, brei padeih dom bruk pato pasram piah pataom tame daong ka bhap bini; caga caik doanh trại, labik di drei piah padang dom labik brei daok karei, sang iek ruak dã chiến; peih bruk iek ruak dalam siam mekre, salamat, pambuak bruk khang kajap haong dom gah, hu mbaok tame bruk pruh jru, pametai anek ruak, daong ka bhap bini paik, mek, pajeng ba  kaya nong; anak meta njauk peih tabiak dom bruk yau “ATM brah anit ranam”, “Labik pablei 0 đồng” di labik saong nao mai di dom labik, dom puk palei dalam Quân khu, brei pandap mbang menyum yaok harei tal tangin bhap bini, abih di nyu lac di labik pasak jit ruak.

Piah klah rabha haong ban raya Hồ Chí Minh dalam bruk mesuh pacang  jit COVID -19,  gah y tế Đắk  Lắk hu ba 3 sruh radaih cấp cứu haong 4 urang peih radaih di gah y te tame daong bruk pajeng urang ruak di dom sang iek ruak Dã chiến di ban raya Hồ Chí Minh. Abih tih jien ndo dalam tuk ngak bruk di ban raya HCM hu gah y tế  tỉnh Đắk Lắk biyar. Dahlau di tuk tame ban raya HCM, dom urang peih radaih hu test samar kháng nguyên brei mboh âm tính saong hu pabak ginup pandap daong khik rup pabhap dalam tuk ngak bruk.

Sở Pato Megru ban raya HCM bahrau hu Harak pathau khan payua tagok UBND ban raya HCM ka bruk likau Mintri Pato Megru pasang iek, brei tamat  Trung học Phổ thông thun 2021 ka dom anek saih ginup kadha piah tame pakacah mbang 2; saong khik kajap bruk pilih ruah tame đại học, cao đẳng ka dom anek saih hu brei tamat dalam mbang 2. Tui nan, urak ini ban raya HCM hu 3.234 anek saih tut angan tame pakacah mbang 2. Min kayua jit ruak tal tukvak pakacah mbang 2 meda daok rah tabiak khang, bruk pakacah mbang 2 kan khik hu siam mekre salamat, kan khik hu bruk pacang caga jit ruak. Dahlau di nan, ban raya HCM hu peih pakacah tamat Trung học Phổ thông mbang 1, hu 85.927 anek saih tame pakacah, samu 96% dalam abih tih dom anek saih tut angan pakacah.

Pasak pasang iek bruk salamat mạng pakat negar kakei lac hu bruk pachot pambuak tal covid -19, yau ye mek angan lac ngak pahla. Kol nan nyu pachot urang rik jien tame kadung jien ngak pahla kayua kol nyu padang tabiak, mek angan lac piah daong dom menuac urang, bhapp bini, atau dom labik gaok rilo kan kandah, rik tame ka bruk cak rok patagok vắc xin pacang caga virut atau brei saoh pataih pacang mbaok hu luk jru me … Langiu di nan daok hu jalan pachot tapa dom phần mềm ứng dụng saong giao dịch điện tử yau ye ngak tabiak dom phần mềm ứng dụng ka phone tangin, bahrau maong tame mboh drieh yau dom ứng dụng bhian pandar piah tui iek bruk njom mbak di jit COVID-19 min tuk  tải mai phone di drei meda njauk dom mã độc piah mek khau tin di drei, thau hu jien drei caik dalam gilang pariak, thau cambaih ka thẻ tín dụng di drei.

150 menuac di Tập đoàn Công nghiệp - Viễn thông Quân đội (Viettel) daok caga daong ka ban raya HCM pandar Nền tảng Khik iek klauk jru vaccine pacang COVID-19 pakat negar dalam mbang klauk jru praong abih di pak ini. Nền tảng khik iek klauk jru pacang COVID-19 pakat negar kayua Tập đoàn Viettel padang ngak saong cakrok patagok, hu 4 hệ thống lac: Sổ prein yava điện tử, Blah web brei thau ka bruk klauk vaccin pacang COVID-19, Hệ thống daong bruk klauk jru pakat negar, Pasak pabak bruk. Nền tảng ini hu ba tame pandar di taong abih 63 tỉnh ban dalam taneh ia saong daok hu peih praong dalam negar di tukvak anak tal.

Dalam 2 adit akaok bilan 7, hu 108 bác sĩ Indonesia metai kayua Covid-19, rilo jang 2 mbang dut saong bilan dahlau. Abih tih hu 545 bác sĩ Indonesia metai dalam jit praong. Oh lac hu dom bác sĩ, kapul Y tá negar Indonesia brei thau lac hu labaih 7.300 y tá saong urang ngak gah y tế karei njom Covid-19 saong 445 urang metai kuhria tal harei 18/7. Yaom lac abih tih dom urang y tế jeng hu klauk ginup 2 mbang vaccine Covid-19, min kayua urang ruak biak rilo, ngak ka dom bác sĩ tapa prein ngak bruk saong patrun prein pacang caga ruak. Tui roh duah di Khoa Y, Đại học Indonesia bahrau ni brei mboh, hu labaih 83% dalam abih tih 1.461 urang ngak gah y tế tapa pasang iek mboh lac lahik prein meng mbiah tal trak.

Sa kapul dom urang roh duah di Mỹ kuhria mboh lac, dom urang njaom bahrau daok hu rilo di Mỹ kayua biến chủng Đen-ta (Delta) meda daok tagok samar dalam bilan pandiak saong bilan thu, tabung glaong lac kreh bilan 10 tuk dom menuac metai meda glaong jang 3 bang duk haong urak ini. Tapa nan brei mboh lac anak tal daok jhak nao, dalam tuk rahra Mỹ daok caong raidiuk hu siam mekre veik tuk jaik abih dom mbang brei klaak dom bruk brei takik ngak dalam tuk hu jit ruak.

  Sa mbang pagam baoh tai kayua menuac ngak hu 4 buồng saong ngak bruk meng điện di gah langiu bahrau ngak hu jak jeng mbang camriep di Mỹ, peih tabiak jalan siam mekre ka rilo urang ruak. Baoh hatai TAH hu Cty CARMAT di France ngak, hu 2 buồng tâm thất saong 4 van tim sinh học daong ka baoh tai kayua menuac ngak ini, dreih yau baoh tai biak di anek manuac, saong ngak bruk jeng dreih yau nan. Urak ni, urang ruak hu tani tanat prein yava saong daok hu tui iek di sang iek ruak. Baoh tai menuac ngak di Cty CARMAT./.

Urang lang: A.Nghiem & Thu Thao -24/7/2021

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân