Tui danak dak mbang nyaom ka 3, Quốc hội mbang 15, dah page ini, Quốc hội ginum biai di hội trường ka bruk kuhria Danak dak peih ngak hukum, sarak thun 2023, ramik pasiam Danak dak padang ngak hukum, sarak thun 2022. Bier harei ini, Quốc hội ginum biai tui kapul ka bruk: Dự thảo Sarak ka bruk ngak iek dom jalan ngak, sarak karei piah cak rok patagok tỉnh Khánh Hòa; Pataom iek veik, taong yaom taong abih gah bruk peih ngak Sarak ka 66 thun 2013 di Quốc hội saong Jalan peih ngak Danak dak jalan HCM  tukvak anak tal.

Bảo hiểm xã hội ban raya HCM brei thau, hadei di jaik 1 bilan peih bruk daong jien pah sang ka urang ngak tui Sarak 08 di Thủ tướng Chính phủ, tal urak ini, hu 21.116 urang ngak di 1.855 labik likau daong jien pah sang. BHXH TP.HCM jeng hu panuac kakei brei caik hatai tal tukvak nộp harak gar, meyah urang ngak daok ngak bruk ye labik ngak bruk meda nộp harak tui bilan atau pagam veik 2 bilan atau 3 bilan min suai di abih lac harei 15/8/2022. Ngan saong dom urang ngak mai ngak bruk veik, harak gar brei nộp suai di abih lac harei 15/8/2022.

Peih ngak sarak ka bruk daong jien pah sang ka urang ngak, dom labik dalam tỉnh Cà Mau hu yar jien daong ka labaih 2.600 urang, tanut daong tui kuhria lac meng 1-3 bilan jien pah sang, samu meng 500 ribau tal 1,5 triệu đồng. Hadei di tuk pasang iek, tỉnh Cà Mau hu labaih 9.800 urang lac urang ngak hu mbang jien daong. Urak ini, UBND tỉnh Cà Mau hu brei jien daong pah sang ka urang ngak, hong yaom jien abih tih tui kuhria lac labaih 16 tỷ đồng.

Di ban Cần Thơ, urak ini hu 23 labik glut jaleih khang. Dalam nan hu dom labik glut jaleih dui atah labaih 5 km. Meng phun jien di pakat negar saong di puk palei, Sở ngak nong saong patagok palei pala hu padang 4 ar pacang haong yaom jien abih labaih 600 tỷ đồng. Taong abih brei ngak salah dalam thun 2023. Tal urak ini, 4 jalan ar pacang glut jaleih ngak hu labaih 30%, njauk tukvak ba tabiak. Tuk ngak salah, yaok rabau baoh sang bhap bini oh daok huac glut jaleih. Bruk padang ngak nan jeng hu ngak brei mekre mbaok meta ka bhum kraong ia Cần Thơ.

Harei tamat Đại hội Thể thao Đông Nam Á mbang ka 31 (SEA Games 31) hu peih tabiak dalam praong prang, ndung bak ilamo bangsa di Cung điền kinh Hà Nội  di melam kabroi (23/5). SEA Games 31 jak jeng hadah hadai hu tamat bloh. Việt Nam, taneh ia dang tabiak peih đại hội thể thao Đông Nam Á hadei di 19 thun hu ngak salah bruk ba tabiak. Ngan haong 205 huy chương ameh, 125 huy chương praik saong 116 huy chương ban, kapul Việt Nam hu dang dhi 1 di mangaok bảng tổng sắp huy chương SEA Games 31. Thun 2023, Campuchia meda lac po sang peih tabiak SEA Games 32.

  Triều Tiên daok dang anak bruk trun hu siam dalam mbang tamuh jit COVID-19 camereip abih hu khan brei thau di taneh ia ini. Dom menuac njaom bahrau mboh pandiak dalam rup daok trun mala 200 rabau urang dalam harei ka 3 gam gam. Kuhria tal urak ini, taneh ia ini hu labaih 134 rabau urang bahrau njauk ruak, patagok abih tih dom urang njauk ruak lac jaik 3 triệu urang kuhria meng di tuk tamuh ruak di bilan 4 meng bloh. Hàn Quốc saong Mỹ bahrau ini hu panuac caong daong Triều Tiên pacang jit praong, dalam nan hu gam bruk daong vắc-xin, min jeng oh ka taduan hu panuac javap jalei di Bình Nhưỡng.

Mbao Le Monde di France brei thau, Liên minh châu Âu (EU) daok gaok kan kandah dalam bruk duah jalan salih ka dom pandap hydrocacbon di Nga, abih di nyu nan lac janih cuh. Dom taneh ia EU hu blei manjek saong khí đốt meng dom gah karei di Nga yau ye Na Uy, Hà Lan, Algeria. Min, kayua sản lượng daok biak takik nan ye dom taneh ia ini daok kan piah salih taong abih gah pabak khí đốt di Nga dalam dom thun anak tal. Dalam tuk nan. Mỹ meda pandar kein laba ini saong kham marat salih ka dom pandap hydrocacbon di Nga di darak pasa châu Âu. Piah ngak hu yau nan, dom taneh ia EU meda njauk ngak biak catang buh tabiak kadung jien kanja piah padang ngak bilai trung chuyển janih cuh hóa lỏng LNG meng Mỹ.

Gah Y tế dunya (WHO) ndom lac, urak ini oh ka mboh hagait brei thau lac vi-rút ba tal ruak đậu mùa khỉ nyu salih karei. Dom urang njauk ruak bhian mboh lac di bhum Tây saong Trung  Phi ini daok tagok samar di châu Âu saong Bắc Mỹ dalam dom adit jaik ini. Dom urang ilamu daok duah thau asal di dom urang ruak, saong duah thau vi-rút nan nyu salih karei halei oh. Urak ini mboh lac dom urang mbuan njauk ruak di abih, lac dom urang taom gaok jaik dom menuac njauk ruak đậu mùa khỉ tuk urang daok hu triệu chứng./.

 

Urang lang: M.P & Thu Thao – 24/5/2022

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân