Covid-19 daok ngak ka bol bhap rahra laik tame kan kandah. Tuk oh ka hu vắc xin, bruk pacang caga ruak tok pambak tame gah y tế, pambak tame hatai saneng saong tui pren yava di yaok urang. Yau nan min, bruk brei takik nao mai, brei daok atah di gauk daok ba mai rilo kan kandah ka bruk pathram rup pabhap jeng yau bruk mbang menyum ginup pandap siam. Mbang hagait saong pathram rup pabhap yau habar piah ginup pren pacang caga jit ruak, lac panuac sua tangi di jaik abih manuac sia.

Bruk siam lagaih mboh lac, di dom labik brei daok atah di gauk, dom "urang lin blouse mbong" njauk caik hatai tal bruk pathram rup pabhap, sangka tal bruk mbang menyum, piah hu prein yava siam piah ngak bruk, plaih njaom mbak meng urang ruak. Y bác sĩ jeng pachreih urang ruak pathram rup pabhap, kham merat mbang menyum piah hu prein pacang caga jit ruak.

Tui Phaok Giáo sư, Tiến sĩ Trần Đắc Phu, dahlau diah dang akaok Cục Y tế Dự phòng, hu dua janih “vắc xin” biak hu yaom glaong ka pren yava bo yaok manuac urang drei thei jeng meda eng drei ngak piah pacang caga jit ruak min khaol drei oh thau atau takik sangka tal, nan lac mbang menyum saong pathram rup pabhap. 

Bruk mbang menyum siam, ginup, meda daong ka rup pabhap khang kadang, pacang hu rilo ruak, dalam nan meda patagok prein pacang Covid-19. Bhian pathram rup pabhap meda ngak brei siam bruk ngak di baoh hatai, trun cholesterol dalam darah, darah nduac nao mai siam, glaow akaok hadah krah, patagok nội tiết tố hu kein ka prein yava…

Phaok Giáo sư, Tiến sĩ, Bác sĩ Lê Bạch Mai – dahlau diah ngak phaok akoak Viện Dinh dưỡng negar, hu panuac lac: "Meyah Covid-19 taong tame bo bruk pacang veik di rup pabhap drei laman lamuac ye kan si pacang hu. Nan lac sa dalam dom makna ngak ka dom manuac njaom nCoV trak jang di dom urang hu ruak dalam rup, urang hu pren yava oh khang kadang."

Bruk mbang menyum oh siam, oh ginup mbuan ba tal rilo ruak, abih di nyu lac dom ruak mạn tính oh njaom mbak yau ruak baoh hatai, me-ik saradang, tagok darah, ung thư...  Yau nan min oh njauk lac thei jeng sangka tal bruk mbang hagait, pathram rup pabhap yau habar ka nyu hu pren yava siam piah pacang ruak.

Ngan haong urang prong saong urang taha umo, takik nao mai, takik ngak bruk, atau nao mai, ngak bruk oh njauk nan lac makna ngak ka pren yava trun, pren pacang ruak trun, bruk pacang caga ruak kik oh daok khang saong meyah daok njauk dom ruak karei dalam rup ye ruak mbuan si trak jang.

Tui dom chuyên gia, gam haong bruk mbang menyum siam, ginup, pathram rup pabhap, klauk vắc xin ginup meda ngak jeng paga pacang ruak khang kajap pacang veik virus, vi khuẩn. Tuk oh ka hu vắc xin Covid-19 piah klauk, ye bruk klauk vắc xin pacang dom ruak njaom mbak karei meda lagaih ka bruk pacang ruak hu "pathram", caga piah pacang dom hagait ba tal ruak./.

Urang lang: Jasi -22/7/2021

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân