Akok Quoc hoi Vương Đình Huệ brei panuac di mbang nyaom ka sa, QH mbang XV

 

 

Patui mbang nyaom ka 1, QH mbang 15, harei ini (22/07), dom urang QH pang dom pathau khan praong, dalam nan hu pathau khan ka taong yaom  bruk peih ngak danak dak patagok KTXH, kadung jien karja 6 bilan akaok thun saong dom jalan ngak danak dak patagok KTXH, kadung jien karja 6 bilan puac thun; danak dak patagok KTXH 5 thun 2021-2025. Patui di nan, lac pathau khan di UBTWMT negar Việt Nam pataom veik panuac caong di cử tri haong bhap bini payua tal mbang nyaom ka 1, QH mbang 15; Biar harei, QH ginum biai tui kapul, taong yaom ka bruk peih ngak danak dak patagok KTXH, kadung jien karja 6 bilan akaok thun haong dom jalan peih ngak danak dak patagok KTXH, kadung jien karja 6 bilan puac thun 2021; danak dak patagok KTXH  05 thun 2021-2025.

Harei 21/7, Phó Thủ tướng Vũ Đức Đam ba akaok kapul ngak bruk Trung ương nao ngak bruk di tỉnh Tiền Giang ka bruk pacang caga jit Covid-19. Phó Thủ tướng hu ieu kakei tỉnh Tiền Giang pato tacei biak catang bruk nao tal yaok jalan sit, jalan praong, yaok baoh sang, brei thau cambaih dom menuac meng dom tinh, bal karei mai. Tui jalan ngak lac patakik di abih dom urang njom Covid-19, mayah njom Covid-19 blaoh, ye brei pataom tame pasang iek piah plaih njom mbak tabiak, paglaong bruk dut iek pagam mẫu tui yaok labik mbuan njom glaong. Dom urang F2 bo jeng F0 brei daok karei di sang mayah ginup prein tui panuac pato tacei di Mintri Y tế piah plaih njom mbak tapa gauk.

Meng harei 22/7, Ban raya HCM peih bruk klauk jru vaccine mbang 5 di dom quan, huyen saong Ban Thủ Đức ngan saong labaih 615 labik klauk jru. Yaok phuong, xa brei hu takik di nyu 2 labik klauk jru. Kuhria rah tapa yaok labik brei klauk jru ka 120 urang sa harei. Tui iek bruk klauk jru hu lagaih siam ye brei tagok urang mai klauk jru 200 urang sa labik klauk jru dalam sa harei. Meyah bruk klauk jru hu sumu ye  labaih dua adit , Ban raya klauk hu 930.000 mbang jru. Di dom labik klauk jru brei hu dom kapol nyaom urang hu mbaok piah tui iek caga meyah hu bruk hagait rah tabiak. Di labik pacang veik oh brei klauk jru, min tuk peih veik, brei klauk jru chip ka bhap bini.

Dah page 21/7, di pambah lamnge Bến Nghé, ban raya HCM, Ủy ban Mặt trận negar Việt Nam TPHCM hu peih bruk taduan mek labaih 290 tấn pandap mbang, yaom labaih 6 tỷ 7 rituh trieu đồng kayua Tỉnh ủy, karja haong bhap bini tỉnh Nghệ An daong ka bhap bini ban raya HCM pacang caga jit ruak Covid-19. Meng di tuk mai tal pambah lamnge Bến Nghé, 15 container  pandap, lac pandap mbang, njam patam, baoh kraoh dom janih di bhap bini Nghệ An payua alin brei, hu Mặt trận TPHCM samar drah payua tal dom labik daok njauk pacang veik di dalam ban raya piah payua tal tangin bhap bini daok gaok kan kandah kayua jit Covid-19 saong dom kapul daok pacang caga jit di ban raya HCM.

Tui panuac caong di Mentri jalan mbak pajeng ba, dom hãng kapal haok brei padeih dom jalan par Cần Thơ - Hà Nội, Phú Quốc - Hà Nội meng harei ini. Daok dom jalan par TPHCM - Hà Nội brei par 2 mbang nao mai dalam sa harei. Dom mbang par brei khik hu salamat bruk pacang caga jit di tanut glong abih, tuai damuai ndik kapal haok brei dut iek mbohk âm tính saong SARS- CoV-2.

Harei 21/7, di mbang ginum biai haong dom urang di rajaei, Tổng thống Nga V.Putin ieu kakei jhul samar bruk klauk vắc xin caga Coivid-19 di negar ni. Urang dang akaok negar Nga ndom lac, ni lac sa jalan ngak siam di abih piah pacang caga jit ruak. Nga lac taneh ia brei harak adat ka vắc xin caga Covid-19 camriep abih di dunya ngan haong angan Sputnik V. Tal urak ni, taneh ia ini hu 4 janih vắc xin caga Covid-19. Min, kayua rilo makna, yau sa binah rahra oh pachreih bruk klauk jru, kayua huac lac klauk jru ba tal hagait karei oh siam ka rup pabhap.., ngak ka bruk klauk jru di Nga suai jang dut saong dom taneh ia karei.

Tui kuhria di Pasak pasang iek saong pacang caga jit ruak di Mỹ, umo diuk rai di manuac kuhria rah tapa di negar Mỹ trun meng 78,8 thun di thun 2019 daok 77,3 di thun 2020. Ini lac umo thun diuk rai trun dalam thun rilo abih di taneh ia ini kuhria meng Dunya mesruh metah mbang ka 2. Tui Pasak pasang iek saong pacang caga jit ruak di Mỹ, umo thun diuk rai di urang Mỹ dalam thun 2020 trun ralo nan lac urang metai kayua ruak Covid-19. Urang metai kayua Covid-19 meblak jaik ¾, sumu 74%, ngak trun umo diukrai di urang Mỹ.

Kuhria tal dah page ni, hajan khang saong ia dauk di tỉnh Hà Nam, Trung Quốc ngak ka 25 urang metai, 7 urang jeng daok lahik ka oh duah mboh, 160.000 urang hu ba nao daok di labik karei saong 1 triệu 2 rituh 40 ribau urang njauk kan kandah tal urak ni. Meng harei 17 tal 20/7, ban Trịnh Châu hu hajan khang jaik samu haong dom mbang hajan dalam 1 thun di ban ni./.

Urang lang: A.Nghiem & Thu Thao - 22/07/2021

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân