Urang bac megru bruk ngak hu tame ngak pak di labik 

Piah daong ka urang ngak hu bruk ngak tani tanat hadei di jit COVID-19, tukvak tapa, tỉnh An Giang hu peih rilo tal bac bruk ngak brei saoh, pambuak bruk ngak haong dom doanh nghiệp. Dalam nan, njauk ndom tal di abih lac tal bac kayua Nhà Văn hóa Lao động An Giang (Liên đoàn lao động tỉnh An Giang) pambuak haong Sang bac Cao đẳng Nghề An Giang saong Kapul GIZ peih tabiak. Tui danak dak ini, anak meta, urang bac hu pataom tame bac dom bruk ngak daok caong hu urang ngak, yau ye: Điện radaih, điện sang, điện lạnh dân dụng...

Ini lac tal bac biak karei meng danak dak tal jalan pato pakai. Tui nan, urang bac hu pato brei saoh, hu daong jien mbang jala pandiak, jien radaih nao mai saong jien bac meyah bac tamat danak dak khóa bac saong hu brei harak Chứng chỉ. Yaom lac tukvak bac dalam 14 - 23 harei, yaok harei bac meng 6 - 8 mon, min meng 30% tukvak bac lý thuyết saong 70% tukvak bac ngak tapak, khóa bac hu pabak ka urang bac rilo ilamu ngak bruk. Nan ye rilo urang bac meda peih labik ngak chip hadei di tuk tamat khóa bac.

Ong Nguyễn Hữu Trí, Phaok Yam ndok Nhà Văn hóa Lao động An Giang brei thau: Hadei di tuk bac blaoh, urng bac hu Sở Lao động, Thương binh saong Xã hội, Pasak yaih khan bruk ngak tacei jalan piah urang ngak meda ngak hu bruk bahrau dalam mbuan lagaih saong samar di abih. Kayua yau nan ye, Danak dak oh lac dui pachreih urang ngak pak di labik, bo daok khik takai rilo urang mai veik palei plaih jit. Tui kuhria, danak dak meda hu khik veik tal thun 2023. Dalam thun 2021, peih hu 6 tal pato bruk ngak ka 120 urang bac.

Tui ong Châu Văn Ly, Yam ndok Sở Lao động thương binh saong xã hội tỉnh, hadei di jit COVID-19 An Giang hu jaik 65 rabau urang ngak mai veik palei. Tukvak tapa, Sở hu pasang iek, duah thau ilamu ngak bruk di dom urang ini piah pasiam veik darak pasar urang ngak, ba bruk ngak ka urang ngak. Ngan saong urang ngak khin daok veik palei ngak bruk, jeng hu daong pato bruk ngak, pambuak haong doanh nghiệp yaih khan bruk ngak. Gam haong nan, dom gah chức năng meda jak ba doanh nghiệp hu dom sarak phúc lợi piah khik takai urang ngak daok veik palei ngak bruk suai lavik. Kayua lac dom urang ngak mai meng dom labik ngak kong, labik chế xuất di ban raya HCM saong bhum Đông Nam Bộ, lac dom menuac ngak meda pabak hu bruk ngak saong ilamu ka puk palei./.

Urang lang: Mousaphuong -22/1

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân