Taha Lường Văn Thương, umo labaih 90 thun, urang taha abih di Kim Nọi khan ka asal di puk palei:Kim Nọi lac angan meng kan urang Thái caik ka puk di drei. Kim lac Mường Kim, Nọi lac sit. Meng kan bhum taneh ini daok dalam Mường Kim (Than Uyên harei ini), min pasak Mường Kim daok atah di ini dom pluh baoh ceik. Hu dom urang Thái meng Mường Kim tagok ini padang puk palei. Piah kanar hadar halau gha di drei, urangcaik angan puk lac Kim Nọi, nan lac puk  Kim sit”.

Taha Thương ndom lac, puk Kim Nọi daok di tapen craoh Kim ini hu meng labaih 300 thun ini mai. Taha brei thau, taha lac urang rai ka pak kak kajap haong bhum taneh ini.

Dalikan meng dom rituh thun, min tuk ndom ka sajarah puk palei drei, sap taha Thương ladam trun. Puk palei sit sot ini, meng kan diah hu tuk lac taneh kubo di yaok rituh urang metai meng bruk mesruh meblah gauk biak pandik harao. Tal harei ini, lavik lavik urang Kim Nọi tuk kuac takac taneh ngak sang, ngak bein jeng daok mboh dom hủ sành caik menuac metai meng kan diah.

Blaoh taha khan ka rai diuk harei ini: puk Kim Nọi urak ini lac puk cak rok patagok abih di bhum taneh ini. Urang Thái bhian saneng tal harei hadei rilo jang. Dalam palei, anek likei anek kumei meng kan mai thei jeng tari taring li-ua taneh, pala njam, raong ikan nan ye rai diuk di mikva tuk halei jeng tani tanat. Taha Lường Văn Thương ndom lac :“Urak ini karei jang dahlau. Urang Thái, urang Mông jeng lac adei sa-ai, abih gauk gul pataom lo. Nao mai rivang gauk miat”.

Yaom lac daok pablak haong palei di urang Mông, min urang Thái di Kim Nọi tuk halei jeng saneng tal bruk khik ramik ilamo, adat cambat tanarakun di bangsa drei. Ong Tòng Văn Dơn, urang daok di Kim Nọi brei thau, tal harei ini yaom lac rai diuk hu karei jang dahlau biak rilo min sang sa-ai jeng oh van hu adat ngak vía tuk sang hu bruk prong yau akaok thun bahrau, sang hu menuac bahrau palang lahik atau urang halei nan dalam sang bahrau abih ruak trak.v.v. Tui ong Dơn, ngak vía oh njauk lac bruk ngak oh siam bo nyu brei mboh bruk sangka di dom urang dalam sang ngan haong amaik ame atau gauk gar dalam sang.

Urang Thái meng kan mai ini jeng daok khik ilamo daa adei sa-ai dalam but pajaih mai sang tuk sang hu ngak talam salao paling yang. Angaok talam salao paling yang oh caik hagait rilo, tok hu ralaow menuk, jam sara mbong, tacao ndiuk, klau panjin alak. Tui ong Tòng Văn Dơn, urang Thái daok di puk Kim Nọi ini yaom lac rai diuk hu salih bahrau, puk palei hu salih bahrau, rilo yaom glaong meng kan jeng hu salih tui, yau bruk tok hadiuk tok pasang, anek bhik urak ini eng drei nao ngak randap duah thau gauk, amaik ame oh daok kateik greik; yau bruk ranaih kumei nao bac, urak ini anek kumei jeng yau anek likei, tal thun umo nao bac ye amaik ame brei nao tame sang bac. Min hu sa yaom glaong oh salih hu, nan lac adat kak talei marai di takoi tangin. Urang Thái tuk halei jeng sahneng lac, kak marai di takoi tangin nan lac kak suan yava daok veik haong rup pabhap, suan yava oh daok nao ma-in ban glai ban klo. Anek manuac brei hu ginup 80 suan yava mai meng hu khang kadang. Khik hu ilamo ini, khik hu dom yaom glaong urang Thái meng daok.   

Di puk Kim Nọi, dom urang taha yau taha Thương, ong Dơn jeng daok jia saong ngak tui jalan saneng, jalan ngak klak. Yau nan min, ngan haong dam dara urak ini, rilo hatai saneng, jalan ngak klak oh daok hu iek prong, dak harei dak salih karei. Ini lac bruk daok ngak duh hatai dom urang taha dalam puk ini. Ngan haong amuk Lường Thị Thinh, bruk caik lahik dom ragu daoh “khắp”, daoh dam dara atau sap yava lách cách meng kik menyim caik veik bruk sa-uh sa-aun dalam hatai manuac urang di puk ini, abih di nyu lac dom urang taha. Amuk Thinh jeng brei thau, sa harei halei nan, amuk meda duah blei veik dom kik menyim, blaoh menyim dom blah khan bai bak samo màu, meda pato tacei veik ka dom anek, dom taco dom ragu daoh bhap bini piah gam khik ramik ilmao urang Thái di Kim Nọi, gam parilo dom janih pandap rivang ma-in, pachreih tuai damuai mai rivang iek./.

Urang lang: Jasi - 22/6/2021

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân