Biar harei kabroi 19/4, kapol urang jakar nao pasang iek bruk ngak di Hội đồng palih ruah pakat negar kayua đại tướng Đỗ Bá Tỵ - phaok akok Quốc hội, akaok Tiểu ban An ninh, trật tự saong y tế - ngak akaok kapol urang jakar hu var  ngak bruk saong Ban raya HCM ka bruk palih ruah urang ka Quốc hội mbang XV saong HĐ bhap bini dom pakat vaktu 2021- 2026. Phaok akok Quốc hội mboh lac, Ban raya HCM lac labik praong, biak karei, ralo bhap bini, tui kuhria mboh dahlau bruk an ninh, chính trị, trật tự salamat xa hoi jaik tuk palih ruah rah tabiak bruk kan kandah, oh thau dahlau. Yau nan ye, urang ngak praong dom pakat di Ban raya HCM brei patui bruk tacei pato tani tanat padang ngak dom jalan khik brei salamat chính trị, xã hội. Ong Đỗ Bá Tỵ caong khin  TP.HCM ngak siam bruk langyah meriak pathau gauk ka sumu, njuak tui hukum saong lagaih haong bhap bini. Pacang caga dom bruk urang pambak tame bruk dân chủ, pathau gauk, meriak gauk piah ngak sraw kadau bruk palih ruah.

Harei 19/4, di inem mek pakat negar kalan palei An Hải, huyện Lý Sơn, tỉnh Quảng Ngãi, Mban khik ramik kalan palei An Hải haong dom but pajaih angaok pulao hu peih ngak adat Khao lề thế lin Hoàng Sa piah brei mboh hatai thau dhar phor, hadar tal prein yava dom kapul lin Hoàng Sa meng kan yam tapa riyak praong tabiak tasik khik caga quyền ngak po ginreih di taneh ia angaok 2  pulao Hoàng Sa, Trường Sa. Tapa nan nyu pamedeih tagok hatai anit ranam taneh ia, dom yaom glaong ilamu di ong kaok ong kar, brei mboh hatai kham merat khik caga quyền ngak po tasik pulao ginreih di menuac urang daok angaok pulao Lý Sơn.

  Ngak tui bruk tacei ba di Thủ tướng Rajaei, Akok Mentri Y tế, Sang iek ruak Chợ Rẫy birau brei kapol urang ngak bruk samar tagok jalan nao tal Kiên Giang piah daong bruk pacang caga jit Covid-19. Kapol ngak bruk samar mbang ini hu 13 y bac sĩ di rilo khoa, bilik karei di gauk yau ye: Hồi sức cấp cứu, Cấp cứu, pasang iek ruak nhiễm khuẩn, Bệnh nhiệt đới, Thận nhân tạo, Sinh hóa, Vi sinh…

Kuhria ta-eng thun 2020, Ninh Thuận hu salih jaik 1.530 ha taneh padai, taneh puh pala drak takik kein laba tapa pala dom janih njam patam, phun măng tây xanh, phun nha đam, phun ratak, tangei, lange, hareik ka athur mbang saong dom janih phun mbang baoh yau phun nho, meda, kruac bung, durian, lahong, panat, patei, tamun. Gam haong salih janih phun pala, tỉnh kham merat pambak praong bruk pruh ia patak pataom, tal urak ini dalam tỉnh hu labaih 1.500 ha taneh pandar ilamu pruh ia patak pataom saong pruh ia sit sit, patak pataom hu 20 - 35% ia pruh. Meng nan, daong patrun bruk kurang ia, daong ka dom baoh sang peih praong bruk pala drak angaok dom bhum taneh cuah patau thu lagu, patrun bruk klaak saoh taneh.

Harei 19/04, Rayo sap ndem Viet Nam pambuak saong Viện Huyết học – Truyền máu Trung ương peih ngak Danak dak Halan hatian brei darah thun 2021. Danak dak peih brei ka urang jakar, công chức, viên chức saong urang ngak di dom đơn vị di Hà Nội tame brei darah ngan saong kadha “Pambuak baoh hatai  - Pambuak raidiuk”. Danak dak halan hatian brei darah hu jeng bruk ngak yaok thun di Rayo sap ndem Viet Nam labaih 10 thun tapa. Tapa danak dak halan hatian brei darah, Rayo sap ndem Viet Nam caong khin rik daong pasiam bruk kurang darah trak di dom gialng darah urak ini, gam iew urang klak rabha, jalan sahaneng ghieh ghang di yaok urang jakar, urang ngak ngan saong dom bruk halan hatian. Thun ini, danak dak Halan hatian brei darah di Rayo sap ndem Viet Nam kuhria dahlau meda taduan hu labaih 350 đơn vị darah dalam 3 mbang brei darah peih ngak di harei 19, 26 saong 29 bilan 4 thun 2021.

  Kuhria tal harei ini, negar Prang rah tapa 2 adit camereip di bruk pacang cakak negar mbang ka 3, min dom bruk pambuak tal jith COVID-19 jeng ka oh hu siam veik rilo. Tui panuac khan di jabat Y tế negar Prang melam 18/4, dalam 24 mon, taneh ia ini hu bahrau jaik 30 rabau urang njom vi rút Sars-CoV-2.

Harak mbao Khmer Times ndem ka jit ruak Covid-19 di Campuchia daok langiu di bruk pacang khik, tuk hu 624 urang birau njom ruak di harei 19-4. Kuhria abih tih urang njom ruak Covid-19 di negar ini tagok labaih 7.000. Biar harei 19-4, Thủ tướng Hun Sen di Campuchia brei thau dom jalan birau hu ba tame pandar luac tukvak pacang caga di ban ine Phnom Penh saong ban Ta Khmao. Urak ini dua labik ini hu iew lac dom “ bhum bhong meriak”. Taong abih bhap bini dalm “ bhum bhong meriak” oh brei tabiak truh sang. Dom jalan pacang caga birau hu ba tabiak piah pakhgang bruk pacang caga di dom labik angaok nan. Mentri Thương mại Campuchia meda brei peih bruk apbak, pajeng ba saong parabha  pandap mbang ka dom urang daok di dom labik dalam  bhum bhong meriak”

Mỹ daok pasang iek pathau khan ka bruk mbuan hu dom kadha biak trak ngan saong dom menuac hu klauk vắcxin COVID-19 di Giôn-xơn En Giôn-xơn (Johnson & Johnson), tuk anak meta hu 6 urang khal darah hu mboh dalam jaik 7 triệu urang hu klauk jru. Jabat khik ramik pandap mbang saong jru tavao Mỹ (FDA) adit dahlau hu panuac kakei brei padeih pandar vắcxin di hãng ini saong daok tui iek kajap piah thau cambaih ka dom urang hu hagait karei hadei di tuk klauk jru, meng nan ba tabiak panuac ka bruk Mỹ njauk pandar atau padeih pandar vắcxin di Giôn-xơn En Giôn-xơn./.

Urang lang: M.Phuong & A.Nghiem - 20/4/2021 - 11:53:41

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân