Thủ tướng Rajaei bahrau brei ngak danak bruk ngak negar patrun kathaot tukvak 2021-2025 ngan haong bruk ba tabiak lac patrun kathaot khang kajap, abih gah. Taong abih jien buh tame ngak Danak dak di tukvak ini takik di nyu lac 75.000 tỷ đồng. Dalam nan, jalan ba tabiak lac dom baoh sang kan kathaot rilo gah khik di tanut 1,0% tal 1,5% sa thun; dom baoh sang kathaot lac bangsa takik trun daok labaih 3% sa thun; 30% huyện kathaot, 30% xã biak kan kathaot bhum bãi ngang, tapen tasik saong akaoh pulao tabiak truh bruk kan kathaot, biak kan kandah. Ba dom sang kan kathaot di dom huyện kathaot trun meng 4 tal 5% sa thun.

Rivang song ngak bruk di  tỉnh Sóc Trăng dalam harei  19/1, Phaok akaok negar  Võ Thị Ánh Xuân hu alin brei ka  tỉnh Sóc Trăng 14 boh sang anit ranam  song  750 pok pandap ka boh sang kan kathaot  song boh sang kan kandah kayua jit Covid-19. Di ban  Cần Thơ, Ủy ban Trung ương MT negar Việt Nam haong Ủy ban MT negar Việt Nam ban Cần Thơ hu jao 28 sổ tiết kiệm ka 28 uranaih metui kayua jit  COVID-19 di ban  Cần Thơ. Yaok  sổ tiết kiệm hu yaom  10 triệu đồng. 

Ủy ban Mặt trận Negar Việt Nam ban raya HCM bahrau peih bruk pahadar saong pok manyaom 100 kalup kapul hu dom bruk ngak ka rahra, rik prein tame bruk pacang caga jit ruak COVID-19 di dalam ban raya. Dalam mbang jit COVID-19 mbang ka 4, hu mboh dom bruk ngak siam lagaih, ndung mbak hatai anit ranam gauk, anit ranam rahra yau ye dom ATM brak, ôxy, blah pataik pacang mbaok “darak 0 đồng,” “paok lisei brei saoh”, yaok triệu “paok pandap”, “kadung an sinh,” yaok pluh ribau tấn pandap mbang, rilo pandap panda y tế, jru ka bhap bini dalam taneh ia saong bhap bini daok di negar langiu hu payua tame bhum jit, klaak rabha kan kandah haong bhap bini ban raya. Amuk Tô Thị Bích Châu, akaok Ủy ban Mặt trận negar Việt Nam ban raya HCM brei thau lac: kayua hatai oh huak glaih glar, anit ranam gauk, bruk daong ba gauk di dom kapul ngak pahla hu rik tame biak praong daong ka ban raya yam tapa tukvak kan kandah di abih, pasang iek hu jit ruak.

UBND tỉnh Bình Thuận bahrau pabak  14 pandap OCOP. Dalam 14 pandap  OCOP, hu 2 pandap mek hu tanut  OCOP  5 patuk pakat  tỉnh, lac  rong nho that, rong nho pandam; 8 pandap mek hu tanut  OCOP 4 patuk pakat  tỉnh lac: mực sa pandiak di  Công ty Hải sản Phan Thiết, mắm lú lavik thun di  cơ sở Quang Long, ia mesin Toàn Hương song ia mesin  Bà Hai, ia iak thanh long Bảo Long…  Langiu di nan, hu  4 pandap mek hu tanut  OCOP 3 patuk pakat tỉnh lac alak patih thanh long song  kem thanh long di Hợp tác xã thanh long Hòa Lệ; rilaow tapai bluh thu  tapen ging di sang pablei salih  Hồ Hữu Nghị... Yau nan, hadei di  2 thun peih tabiak, urak ni  Bình Thuận hu  70 pandap OCOP.

Pambuak tal bruk pablei salih suan hukum 3 kg ameh meng Campuchia tame tỉnh An Giang, di melam 19/1, Jabat Cảnh sát pasang iek Công an tỉnh An Giang ba tabiak harak langyah tui hukum negar saong cap khik 6 bị can piah pasang iek ka bruk pablei salih suan hukum ini. 6 bị can njauk cap khik jeng daok di tỉnh An Giang.  Tui khau tin meng jabat pasang iek, langiu di 2 bị can hu cap mek tuk daok pablei salih suan hukum ameh saong đô la, dalam tuk pasang iek 4 urang karei hu nao tal jabat Công an đầu thú saong taduan abih tih dom bruk ngak di drei pambuak tal jalan pablei salih suan hukumu ameh, đô la dalam tukvak tapa.

Di Mbang nyaom akaok mintri Du lịch ASEAN mbang ka  25 rah tabiak tui jalan online  song tapak di  Campuchia, akaok mintri  Du lịch dom taneh ia ASEAN njauk gauk brei peih pabah mbang gilac veik  gah  du lịch ASEAN piah pasiam veik gah ni dalam tuk jit prong  COVID-19. Dalam sa panuac khan, dom akaok mintri hu ndom lac, gah du lịch ASEAN oh lac daok caga peih pabah mbang gilac veik  bo dok pasiam veik samar drah haong prein pacang cakak siam jang. Dom akaok mintri jeng njauk gauk brei pandar passport  vaccine pacang COVID-19 di dom taneh ia ASEAN, saong pok meyaom bruk peih ngak samar danak dak klauk vaccine di dom taneh ia dalam ASEAN, lac jalan ngak prong piah peih veik pabah mbang gah du lịch ASEAN.

Ngoại trưởng Mỹ mdom lac, bruk Nga brei tagok kapul ngak bruk jaik taphia jalan tapen negar haong U-crai-na meda daong ka taneh ia ini hu prein samar drah peih bruk taong tame U-crai-na dalam tukvak biak katut. Ngoại trưởng jeng hu panuac ieu Tổng thống Nga pilih ruah sa jalan saron mbon saong ngoại giao”. Javap jalei dom panuac nan meng Mỹ saong phương Tây, Nga hu rilo mbang brei thau lac taneh ia ini oh hu hatai meblah mek U-crai-na. 

Rajaei Mỹ brei buh tabiak 400 triệu pataih pacang mbaok  N95 hu dalam gilang  khik piah di negar  piah brei saoh ka rahra meng adit anak  . Ni lac kham merat bahrau abih di karja Tổng thống Joe Biden dalam pacang cakak bruk njom mbak  di jit  COVID-19. Adit dahlau, Pasak pasang iek  song pacang caga jit ruak  Mỹ (CDC) hu panuac kakei rahra Mỹ cuk pataih pacang mbaok N95 piah paglaong bruk pacang ruak./.

 Urang lang: H.Pha & Thu Thảo - 20/01/2022

 

       

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân