Page ini 20/4, kapol urang jakar kayua Phó Thủ tướng Thường trực Rajaei Trương Hòa Bình, Phó Akok Hội đồng palih ruah pakat negar ba akaok pasang iek bruk palih ruah urang ka QH mbang 15 saong ka Hội đồng bhap bini dom pakat vaktu 2021-2016 di tỉnh Vĩnh Long. Ủy ban palih ruah tỉnh brei thau, hadei di mbang ginum biai hiệp thương ka 3, njauk gauk ba tabiak 8 urang piah palih ruah ka QH, 85 tabiak piah pilih ruah ka HĐ bhap bini tỉnh, 441 urang tabiak piah pilih ruah ka pakat huyện saong 3.566 urang piah pilih ruah ka pakat xã, phường, ban sit. Mbiah tal urak ini, taong abih 107 xã, phường, ban sit hu ngak salah blaoh bruk tabiak angan cử tri.

Harei 19/4, kapul ngak bruk di Tỉnh ủy Bình Thuận hu mai ravang, tadhau ayuh Ramưwan thun 2021 di urang Cam Awal daok di xã Phú Lạc (h.Tuy Phong) haong xã Phan Hòa (h.Bắc Bình). Di dom labik nao ravang, akaok mban jak ba Tỉnh ủy Đặng Hồng Sỹ tadhau ayuh dom halau janeng, dom urang hu angan je, mikva Cam mbang muk kei dalam bui sambai, siam mekre, patak pataom. Gam haong nan, pachreih ba mikva jhui var bruk ngak mbang, pala drak, pacang caga jit Covid-19. Daok ngan saong bruk bầu cử anak tal, dom halau janeng, urang hu angan je saong mikva Cam meda kham merat peih ngak quyền haong bruk ngak di rahra piah ka bruk pilih ruah pok ngak njauk lac harei roya di bhap bini.

Tổng công ty Cảng kapal haok Viet Nam brei thau lac daok patui bruk duah ralai bom mìn, ngak paga pacang saong meda brei peih ngak takai mblang kapal haok dunya Long Thành di akaok thun 2022. Tổng công ty Cảng kapal haok Viet Nam likau brei hu taneh, peih paha di dua jalan pambuak tame mblang kapal haok piah padang ngak dom danak dak jeng yau pandar ngak tui sarak lagaih. UB bhap bini tỉnh Đồng Nai brei thau, dalam 6 bilan brei jao taong abih taneh praong 5.000 ha ka po padang ngak, gam saong samar padang ngak labik daok tạm piah panduan ba dom baoh sang bhap bini tame daok.

Mesup ini, di TPHCM, UBMT negar ban raya hu taduan 1.250 bộ khan ao bảo hộ, yaom labaih 122 triệu đồng kayua Gilang pariak Sumitomo Mitsui di Japon, dhar TPHCM daong ka bruk pacang caga jit ruak Covid-19. UBMT negar ban raya brei thau, gah mặt trận daok kham merat jak ba, taduan mek jien blei vaccine. Tui kuhria, harei 23/4, UBMT negar ban raya brei peih danak dak taduan jien blei vaccine.

Subuh page ini 20/04, kapol ngak bruk di đồn Biên phòng pabah lamnge negar  An Thới di ban sit Phú Quốc (Kiên Giang) dalam tuk ngak bruk duah mboh 5 urang tame negar suan hukum meng jalan tasik negar Campuchia mai. Dom urang nan brei thau kayua jit ruak tamuh yau nan ye duah jalan tame Viet Nam. Yaok urang brei bayar 1.000 USD mbiah tal 1.200 USD jien pah gilai tame Phú Quốc. Bộ chỉ huy Bộ đội biên phòng tỉnh Kiên Giang daok pambuak bruk duah urang likei daok veik dalam kapol urang tame negar suan hukum nan.

Tong Yam ndok gah Y tế dunya (WHO) Tê-đrốt At-ha-nôm Ghe-brây-i-sớt (Tedros Adhanom Ghebreyesus) brei thau, adit bloh dunya hu labaih 5 triệu mebuac njom bahrau Covid-19, lac glaong di abih kuhria tui adit meng dahlau mai. Makna ngak ka dom urang ruak tagok glaong lac bruk hu mbaok di dom biến thể bahrau saong bhap bini patagok bruk taom gaok gauk. Tong Yam ndok WHO jeng mboh duh hatai ka bruk rilo menuac metai. 9 bilan meng tuk tamuh jit praong, dunya hu 1 triệu urang metai, min hadei di  4 bilan nyu tagok 2 triệu, saong 3 bilan hadei di nan tagok 3 triệu urang metai. 

Mentri Ngoại giao Mỹ birau brei thau meda peih praong panuac kakei  bruk nao mai tal 80% dom taneh ia di dunya dalam tuk patagok dom urang njom ruak Covid-19. Mbiah tal ini, Mỹ ba 34 taneh tame angan labik juai nao tal kayua Covid-19, dalam nan hu Brazil, Argentina, Haiti, Nga saong Tanzania. Meyah Mỹ peih praong bruk kakei jhui nao mai tal 80% dom taneh ia di dunya ye makna di nyu lac 130 taneh ia karei meda ba tame angan taneh ia juai nao tal nan.

Sudan brei tapa danak dak hukum klaak dom hukum mesruh veik haong Israel di taneh ia ini hu patabiak meng kreih abap dahlau. Tui Mintri Tư pháp Sudan, tapa danak dak hukum nan hu makna biak praong dalam bruk patagok talei pambuak bruk di rilo gah yau kinh tế, chính trị, ngoại giao saong quân sự di dua taneh ia./.

Urang lang: M.P & Ai Nghiem - 20/4/2021 

 

 

 

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân