Tui jabat thường trực mban tacei jalan pakat negar ka pacang caga bala meng langik tasik, kuhria tal mon 8 harei 2/12 hajan ia sua di dom  tỉnh Quảng Nam, Quảng Ngãi, Bình Định, Phú Yên, Kon Tum, Đắc Lắk ngak ka 18 urang metai song lahik. Ia dauk song glut jaleih ngak ka radaih oh nduac nao mai hu di dom jalan prong  yau jalan roya 14H, 40B, Trường Sơn Đông (Quảng Nam); jalan roya  24, 24C (tỉnh Quảng Ngãi); jalan roya ka 1 (jalan prong An Nhơn) song dom labik di  jalan roya 19C, 25, 27, 29 (tỉnh Phú Yên)…Hajan ia sua di dom  tỉnh nan dok ngak ka 775 ha padai khut lahik; labaih 9.300m takai krong, takai chraoh njauk glut jaleih. Urak ni dom tỉnh ban dok tacei pato ba menuac song pandap piah ngak pasiam veik dom khut khat kayua hajan ia sua, samar tani tanat rai duik ka rahra.

Bier harei 1/12, di jabat Rajaei, Phó Thủ tướng Vũ Đức Đam, Phó Akaok mBan pato tacei jalan pakat negar ka pacang caga jit COVID-19 par akaok mbang ginum biai online haong urang par akaok Mintri Y tế, dom sang iek ruak Trung ương saong 10 tinh, bal (dalam nan hu Ban raya HCM, Bình Dương, Đồng Nai, An Giang…) ka bruk taong ruak, trun manieng dom urang metai kayua jit COVID-19.  Di mbang ginum biai, Phó Thủ tướng Vũ Đức Đam ieu kakei dom tinh, bal caga ginup dom pandap panda daong rup pabhap ka nyu salamat, sarak daong ka kapul urang ngak gah y tế, abih di nyu nan lac tuk jit ruak daok dui atah, rilo urang ngak bruk oh padieh di dom labik taong ruak tal yaok bilan gam. Dalam bruk taong ruak ka urang ruak COVID-19, taphia di jru taong ruak, njauk caik hatai tal bruk mbang huac ginup dinh dưỡng, pachrieh ba, sangka iek glang gah hatai sahaneng di urang ruak. Phó Thủ tướng ieu kakei dom tinh, bal samar peih bruk pasang iek brei klauk vaccine ka urang taha, urang hu ruak dahlau dalam rup. Mintri Y tế daok kuhria bruk klauk vaccine caga COVID-19 mbang ka 3.

Brei panuac di tuk peih mbaok song nyaom biai pambuak pagam  pablei salih di ban raya thành phố Hồ Chí Minh song dom  tỉnh, ban thun  2021 peih tabiak di mesup ni 2/12 tui jalan online song hu mbaok di labaih  600 Doanh nghiệp song 45 tỉnh ban, Thứ trưởng mintri Công Thương Đỗ Thắng Hải tong yaom glong bruk pabak pandap panda ka labaih 10 triệu menuac di ban raya Hồ Chí Minh, dalam nan hu tuk vak kan kandah di abih, tuk jit tamuh khang saong srau kadau, kan si thau dahlau. Thứ trưởng mintri  Công Thương Đỗ Thắng Hải hu panuac ieu akaok Sở Công Thương dom tỉnh, ban di Trung ương song dom doanh nghiệp njauk paglaong siam lagaih bruk  peih ngak danak dak pambuak bruk pablei salih, abih di nyu nan lac dom danak dak tani tanat drak pasa song danak dak pambuak gauk pablei salih pandap panda pak di labik, samar hu jalan caga pandap duh ka urang blei pandar meyah hu jit ruak atau Tết.

Harei ini (2/12) bruk klauk vắc xin ka anek saih tỉnh Thanh Hóa hu peih ngak veik tui bruk ba tabiak. Dahlau di nan, harei 01/12  tỉnh Thanh Hóa peih bruk klauk vắc xin ka ranaih meng umo 15 tal 17 thun. Min, dalam mbang klauk camriep hu yaok piluh ranaih njauk tame sang iek ruak piah tui iek prein yava kayua phản ứng hadei di tuk klauk. Meng di tuk bier harei kabroi, bruk klauk vắc xin ka anek saih brei padieh; tal melam kabroi, prein yava dom anek saih nan hu tani tanat, hu dom adei hu tabiak truh sang iek ruak piah nao sang.

  Tổng công ty Điện lực ban raya  Hồ Chí Minh hu peih bruk brei thau  Bilan dar phol tuai thun  2021 song peih pakak tổng đài đa kênh iek glang tuai. Khaw tin ka bruk nan brei thau  , urak ni bruk giao dịch online di ban raya Hồ Chí Minh dom dịch vụ ka điện mek hu jiak 100. Tuk vak tapa, gah điện ban raya dak harei dak pasiam jalan  điện piah khik kajap bruk pabak  điện salamat, gam gam, tani tanat ka bruk patagok kinh tế - xã hội song rai duik di bhap bini dok di ban raya; gam haong nan, oh padeih peih ngak dom jalan patagok glong chất lượng dịch vụ duh ka tuai damuai. Dalam  11 bilan thun  2021, tuk vak lahik điện tui kuhria dok labaih  31 minite, trun dut song thun dahlau.

Dom urang ngak praong gah y tế dunya hu ba tabiak dom kadha bahrau brei mboh Omicron meda njom pambak gah langiu châu Phi dahlau di tuk bhum ini hu urang njom biến thể bahrau camriep abih. Tui blah NBCNews, dom urang ngak praong gah y tế Hà Lan brei thau, urang hu duah mboh biến thể Omicron dalam dom mẫu urang ruak hu mek meng harei 19/11 saong harei 23/11. Bruk ini brei mboh biến thể bahrau meda hu mbaok di châu Âu dahlau di tuk hu duah mboh di Nam Phi. Min, Viện Y tế Công cộng negar Hà Lan brei thau: “urak ini ka oh thau cambaih dom urang ini hu nao tal dom taneh ia gah meraong di châu Phi halei oh”.

  Labaih sa adit hadei di tuk dunya thau tal bruk hu mbaok di Ô-mi-crôn (Omicron), biến thể bahrau ni  hu mboh di  23 taneh ia. Mỹ lac negar patui di nan bahrau hu urang njom camereip di Ô-mi-crôn. Tui gah  Y tế dunya, bruk ni lac bruk hu kuhria mboh dahlau song jalan ngak urak ni lac patagok bruk klauk vắc-xin, gam haong dom jalan pacang jit. Gah Y tế dunya cong hu thau rilo jang ka bruk njom mbak di  biến thể ni dalam dom harei tal, oh lac dom adit yau dom kuhria mboh dahlau  nan.

Dalam mbang ginum biai hạt nhân ka 7 di Viên ( Áo) daok yam tame harei ka 3. Bruk ieu Mỹ klaak taong abih dom bruk taong bhat pacang cakak Iran saong bruk Iran patagok dom bruk ngak kaya mada urakni daok lac bruk pandik akaok di abih. Urak ini, meng Mỹ tal Iran saong dom taneh ia jeng daok kham marat piah mek hu bruk njauk gauk, ngan haong hatai caong meda hu sa bruk tanu tu cambaih laih jang ka thỏa thuận hạt nhân di puac adit ini./. 

Urang lang: T.Thao & H.Pha – 2/11/2021

 

 

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân