Dah page ini Thủ tướng Rajaei Phạm Minh Chính dang akaok mbang nyaom Rajaei ka padang ngak hukum bilan 1/2022. Di mbang nyaom, Rajaei pasang iek brei panuac ka 11 danak dak, ieu kakei padang ngak hukum. Ini lac dom danak dak daok dalam 20 danak dak, ieu kakei padang ngak hukum caong hu rajaei pasang iek, brei panuac piah pok tagok Quốc hội dahlau di harei 01/3/2022 piah ramik veik danak dak hukum, sarak thun 2023. Thủ tướng Phạm Minh Chính brei thau, bruk padang ngak saong pasiam thể chế hu Đảng, kanja thau lac sa dalam dom bruk salih bharau khang dalam jalan ngak. Bruk padang ngak, ngak pasiam dom sarak pataom tame dom bruk bahrau tamuh tabiak ka oh hu adat, jang yau dom bruk hu adat blaoh, min oh ngak hu, dom tavak tavaiy tamuh tabiak caong pabak, pasiam, pabak hu bruk daok rah tabiak dalam raidiuk.

Jeng dalam mesup ni, di Hà Nội, Ủy ban bangsa peih nyaom biai online pakat negar pataom iek veik bruk  bangsa thun 2021, ba tabiak jalan ngak ka thun 2022. Ong Phạm Bình Minh, Ủy viên Bộ Chính trị, Phó Thủ tướng Thường trực rajaei hu mbaok song brei panuac tacei pato.

Ban raya HCM bahrau hu 3 urang njom biến thể Omicron camriep dalam rahra. 3 urang ruak ini daok di huyện Bình Chánh, quận 11 saong quận Gò Vấp. Dahlau di nan, 3 urang ini mboh pandik tarakaong saong haok ia idung, nan ye nao iek ruak di sa bilik iek ruak di tư nhân, hu mek mau dut iek PCR. Dom urang taom gaok jaik haong dom urang ini daok hu pacang veik, duah thau, tui iek. Dahlau di nan, ban raya hu 30 urang njom biến thể Omicron jeng lac urang tame negar.

Tập đoàn Bưu chính Viễn thông Việt Nam VNPT  bahrau alin hadiah  5.400 máy tính bảng gam sim 4G, yaom abih tih labaih 14 tỷ đồng brei ka dom anek saih hu rai duik kan kandah di  tỉnh Đồng Nai.  Kuhria meng bilan  9-2021 mbiah tal ni, gah pato pakai Đồng Nai hu taduan mek saong  parabha jiak 20.000 pandap, lac: Máy tính, ipad, laptop, smartphone ka anek saih. Langiu di nan, dom adei anek saih jeng hu taduan yaok ribau pok jien bac, pok pandap meng dom kapul nyaom, menuac urang dalam tuk vak njauk kan kandah di jit COVID-19.

Piah rik daong ka dom sang kan kathaot, sang njauk kan kandah kayua jit ruak Covid-19 piah raok Tết meng kan thun sak rimaong, đại đức Thích Minh Phước, urang dang akaok Niệm Phật đường Liên Hoa, di xã Xuân Đông, huyện Chợ Gạo, tỉnh Tiền Giang bahrau peih rilo mbang alin hadaih pandap Tết di dom labik dalam 2 tỉnh Tiền Giang saong Bến Tre. Tui nan, hu 2.000 paok pandap, yaok paok hu 200 ribau đồng saong 10 kg brak alin ka dom baoh sang kan kathaot, kuhria abih tih lac 700 triệu đồng. dom thun tapa, tuk thun bharau tal mai, ong hu jak ba labaih 1.000 paok pandap alin hadiah ka dom sang gaok kan kandah piah raok Tết meng kan.

Rajaie Thái Lan brei tapa sarak brei adat ramik veik gah visa piah dui pachreih dom urang negar langiu kaya meda mai dok lavik harei. Tui nan, Thái Lan hu brei visa dok suai lavik (LTR), yaok visa brei ka  rilo di abih lac 4 urang dalam sang, dalam nan hu gam uranaih umo ala 20 thun . Hadei di tuk taduan hu visa, urang negar langiu meda likau adat ngak bruk song hu ngak bruk chip bo oh cang hu harak adat ngak bruk. Jalan ngak ni, lac piah patagok bruk buh jien tame  ngak mbang dalam negar song jhul patagok kinh tế.

Cục pasang iek Liên bang Mỹ brei thau, dom bruk pametai manuac di taneh ia ini daok tagok glaong dalam thun 2021. Tui dom chuyên gia di Mỹ, dom makna praong ba tal bruk pametai manuac tagok rilo, nan lac kayua jit praong COVID-19 ngak sarau kadhau raidiuk di bhap bini ngak ka dom dịch vụ daong ka rahra trun, dom sang bac salih tapa jalan bac online ngak ka rilo anek saih hu hatai oh siam hu jalan ngak suan hukum, dom salih karei dalam sarak an ninh cảnh sát di Mỹ saong bruk pandar phao biak rilo. Dom mbaik phao hu pablei tabiak di Mỹ dalam thun tapa glaong jang biak rilo dut saong dom thun dahlau.

Sa urang likei umo 55 thun metai rak oh nao mai hu saong oh ndom menyai hu luac 5 thun tapa dok di sa palei dalam bang Jharkhand negar  Ấn Độ ngak ka dom bác sĩ tatuak drei  tuk meda nao mai song ndom nyai hu hadei di tuk klauk  vaccine COVID-19. Bruk siam veik hadei di  5 thun  metai rak oh lac bruk oh ka bhian mboh, min dom chuyên gia y tế dok medhil ka bruk siam veik di  ong. Rilo bác sĩ pak ni hu panuac ieu roh duah ka bruk di urang likei ni piah pabak khaw tin cambaih laih di abih./.

Urang lang: Thu Thao & H.Pha – 19/1/2022

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân