Dah page ini, di Hà Nội, Mbang nyaom ka 7 di Ủy ban thường vụ Quốc hội hu peih tabiak. Di mbang nyaom ni, ndem ka bruk padang ngak hukum negar, Ủy ban Thường vụ Quốc hội meda pasang iek, brei panuac ka bruk: langyah, taduan mek panuac rik tame, ramik ngak pasiam danak dak hukum pacacah, pok mayaom (pasiam viek); ieu pabak dự thảo Sarak di Quốc hội ngak iek bruk brei ka urang ngak, pato tacei bruk ngak ka urang njauk duas daok di langiu guk tame danak dak padang ngak hukum, sarak di thun 2022…Daok dom bruk kinh tế- xã hội, Ủy ban Thường vụ Quốc hội brei panuac ka bruk pabak jalan buh jien tame ngak di phun jien taneh ia langiu meng phun jien oh ka parabha saong ramik veik,  kuhria dahlau jalan buh jien di karja tame ngak tukvak mbiah phun jien di kadung jien  kanja trung ương tukvak 2021-2025 ka dom danak dak di dom mintri, dom jabat trung ương saong dom tinh, ban ( mbang ka 2)...

UBMT negar Việt Nam ban raya HCM pambuak bruk hong Ban bangsa ban raya  song  Báo Công an bhap bini  bahrau jao  50 pok jien bac yaom jiak  5 tỷ đồng ka dom anek saih, sinh viên bangsa hu rai duik kan kandah. Dalam nan hu dom adei bangsa Cam. Meng thun  2007 tal ni,  tong abih jien  buh tabiak meng kadung jien  dong ka anek saih bangs , anek saih kan kathaot di  Báo Công an bhap bini tal dom adei anek saih urang bangsa, anek saih kan kathaot  lac jiak 27 tỷ đồng. Kadung jien dok hu padang sang bac,   pabak pandap panda ka dom sang bac mầm non di  xã Pá Hu, huyện Trạm Tấu, Yên Bái, dong padang sang bac di Bắc Giang,  Sơn La song alin brei labaih  4.500 sruh radaih juak ka anek saih.

Ban tacei jalan jak ba daong padang ngak sang daok ka sang kan kandah gah sang daok di tỉnh Sóc Trăng bahrau hu jao 849 baoh sang ka sang kan kathaot gaok kan kandah gah sang daok. Meng bilan 4/2021 tal urak ini, dom công ty, doanh nghiệp,gilang pariak, dom kapul nyaom, manuac urang dalam saong langiu tỉnh Sóc Trăng hu rik tame labaih 60 tỷ đồng piah daong padang ngak sang danaok ka sang kan kathaot. Dalam mbang 1 tỉnh hu jao 849 baoh sang. Tui kuhria meng urak ini tal tuk tết Nguyên đán meda jao brei labaih 300 baoh sang  ka dom sang kan kathaot. Urak ini Sóc Trăng jeng daok hu labaih 2.300 sang kan kandah gah sang daok, caong hu daong brei.

Di Ninh Thuận, di tuk vai ni, urang pala nho dok biak bui sambai kayua  nho pablei hu yaom. Tui dom boh sang urang pala nho, iek tui baoh nho, dom urang mai blei nho di bein yaom meng  30.000 tal 120.000 sa kg. Yaom nho glong jang  2 mbang dut song tuk vak kreih thun bloh. Nhu hu rilo baoh, pablei hu yaom , urang pala nho duah hu jien piah mbang Tết Nguyên đán. Urak ni, Ninh Thuận dok jhul khang bruk padang ngak, pambak prong dom bhum pala nho chất lượng glong tui tanut  chuẩn VietGAP, parilo janih pandap ngak meng  boh nho that, pambuak gauk pala  nho tui jalan h hợp tác xã, kapul pambuak bruk tui chuỗi giá trị piah paglaong kein laba kinh tế.

Harei 17/1, Công an huyện Nhơn Trạch (Đồng Nai) brei thau lac daok pambuak bruk haong Jabat Cảnh sát hình sự, Công an tỉnh Đồng Nai cap khik 37 urang piah pasang iek ngak brei cambaih laih bruk peih me-in mbia. Dahlau di nan, Công an vaih tame sa labik caoh manuk biak praong di bien phun cao su labik ấp 3, xã Phú Thạnh, huyện Nhơn Trạch. Tuk mboh  công an, dom urang nan klaak nduac sarau kadhau min urang jakar hu cap khik samu 56 urang. Pandap panda pataom mek hu di blah ciu labaih 150 triệu đồng gam haong 45 sruh radaih, rilo drei manuk caoh, pandap panda piah pabak ka bruk me-in mbia - taong bai. Tapa pasang iek, công an hu cap khik 37 urang, dalam nan hu rilo urang ngak suan daok di labik tỉnh Đồng Nai saong ban raya HCM.

Yaok pluh triệu urang Trung Quốc dok yam tame mbang Xuân Vận – mbang padeih dui atah  dalam 40 harei , tal harei  25/2. Mintri jalan mbak pajeng ba Trung Quốc kuhria mboh lac dalam mbang padeih thun ni  hu labaih  1 tỷ,180 triệu mbang tuai nao mai, tagok 35,6% dut song thun bloh. Rilo mintri, rilo gah di  Trung Quốc batabiak adat ngak catang bruk nao mai piah khik siam mekre salamad ka bhap bini. Rilo doanh nghiệp caga ginup labik dok, pabak pandap mbang ka urang ngak  dok veik ngak bruk. Karja dom ban prong hu panuac ieu bhap bini oh tabiak truh ban  meyah oh hu bruk hagait dalam tuk Tết Nguyên đán. Hu dom labik daok kuhria dong meng 500 tal  1.000 Nhân dân tệ ka sa urang.

Tổng thư ký NATO Jens Stoltenberg brei thau lac, liên minh quân sự ni halain hatain ginum biai ka bruk cacak trun phao ndao haong Nga, min oh ba bol lin tabiak truh dom taneh ia hu mbaok tame NATO meng di thun 1997. Dahlau di nan, di krieh bilan 12 thun blaoh, Mintri Ngoại giao Nga hu ba tabialk dom sarak njauk gauk haong NATO saong Mỹ ka bruk khik tani tanat an ninh, dalam nan hu panuac ieu oh maong Nga lac kẻ thù, saong abih di nyu nan lac klaak bruk peih praong NATO tapa gah Timun. Piah jhul samar dom sarak nan, Kapul Nga - NATO hu ginum biai di harei 12/1 di Brussels, Bỉ. Min, mbang taom gaok tamat blaoh bo oh ba mai siam lagaih hagait.

Tổng thống Indonesia Joko Widodo hu palih ruah "Nusantara" (hu makna lac "palao kaoh" dalam sap Anh) brei angan ka ban ine bahrau di taneh ia ni, hu padang di angaok palao Kalimantan. Rajaei  Indonesia brei thau bruk salih ban ine  tabiak truh palao Java sa labik hu rilo menuac urang di abih di taneh ia dalam bilan  4/2019. Bruk padang ngak abih yaok  tỷ USD ni tui kuhria  hu peih ngak dalam bilan  8/2020, min, jit prong  COVID-19 ngak ka rajaei brei padeih veik. Ban ine bahrau lac pasak hành chính di  Indonesia, dalam tuk Jakarta – ban ine urak ni  lac labik dok di labaih  10 triệu urang jeng dok lac pasak  kinh tế song jien ndo di Indonesia./.

Urang lang: Thu Thảo & H.Pha -18/1/2022

HỆ PAPAR SAP BANGSA VOV4 BHUM BAN RAYA HCM

Labik jabat: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh

 Yam ndoc : Nguyễn Ngọc Năm
Phaok yam ndoc: Cao Thị Thoa, Trần Xuân Thân