Rilo urang vak di harak mbao hu mbaok piah ba khaw tin 

Mesup 16-4, Jabat akaok negar peih bruk brei thau Lệnh di akaok neagr ka pacang caga ma túy hu QH brei tapa di mbang nyaom ka 11, QH mbang XIV. Danak dak Hukum hu 8 chương, 55 paka, hu ba tame pandar meng harei 1-1-2022. Hukum tacei tabiak cambaih laih sarak pacang caga ma túy, dalam nan ndom lac “ba prein yava tabiak pacang caga ma túy dahlau abih ka bhum bangsa takik saong bhum ceik, bhum atah bayah, tasik pulao, bhum tapen negar haong labik srau kadau gah ma túy”. Hukum jeng hu tacei tabiak dom bruk njauk pakauk yau ye:  mesruh veik atau pacang bruk dut iek ma túy dalam rup pabhap, duah thau bruk njien ma túy…

Mintri ngak nong saong patagok palei pala kakei lac, piah hu sa bilan jayah di labik mbuan hu pandiak bhang saong oh ginup ia piah pruh ka phun pala di puac bilan yau ye di gah Duyên hải Nam Trung Bộ saong Tây Nguyên ye njauk salih meng pala 3 vụ tapa 2 vụ; rami ramik veik tukvak pala drak ka nyu lagaih piah plaih pandiak bhang saong pandar ilamo pala drak piah patakik njauk kan kandah di bilan thu lagu. Taeng di 4 tỉnh lac: Phú Yên, Khánh Hòa, Ninh Thuận saong Bình Thuận hu padang salah bộ jalan pato dom bala pandiak bhang saong jalan batabiak lagaih haong bruk Biến đổi khí hậu, Mintri ngak nong saong patagok palei pala kakei lac dom tỉnh ni padang ngak bruk pasang iek bộ Bản đồ CS-MAP saong pandar dalam bruk padang ngak jalan ba tabiak, tacei pato bruk ngak nong lagaih haong yaok bilan, yaok thun, tacei tabiak cambaih dom bhum njauk paatah vụ, salih janih phun pala…

Yaok pataom di gah y tế dunya brei mboh lac, labaih 75% dom janih jit ruak kan kandah di anek menuac hu asal mai meng athur, dalam nan hu jit praong COVID-19 hu mboh lac mai meng athur. Di Việt Nam, Thứ trưởng Mintri ngak nong saong patagok palei pala Phùng Đức Tiến brei thau, piah ka bruk thú y hu patagok, anak tal, gah ngak nong brei paglaong ilamu khik ramik, pasang iek jit ruak athur, ruak njom mbak di athur haong menuac. Patagok ilamu khik ramik, dut iek athur, pasang iek labik sik ngak ralow, pasang iek vệ sinh thú y saong salamat pandap mbang ngan saong athur, pandap ngak meng athur. Paglaong ilamu khik iek, roh duah, ngak tabiak jru, vác xin thú y siam saong salamat. Buh jien tame ngak brei patagok ilamu khik ramik, dom bilik ngak iek, dut iek ruak athur, vệ sinh thú y, siam mekre pandap mbang. 

# Caong tame "passport vaccine " piah caga rok tuai dunya dalam tuk siam mekre veik, mintri Thể thao- ilamo saong rivang main daok pato tacei Tổng cục rivang main ngak bruk haong dom gah pambuak tal, kapul rivang main, doanh nghiệp padang ngak pandap piah khik ramik tuai damuai. Tui nan, Tổng cục rivang main Việt Nam daok pasang iek, caga yaok labik piah pilih ruah dom pandap panda, darak pasa piah pandar passport vaccine, palagaih ka bruk rok tuai gam  khik caga salamat,  pacang caga jit ruak.

Tui Gilang pariak karja , kuhria tal abih 3 bilan akaok thun 2021, jien brei mesraiy ngak mbang kinh tế lac labaih 9 triệu tỷ đồng, tagok jaik 3% duk saong puac thun 2020. Njauk caik hatai nan lac, brei mesraiy gah sang danaok taneh riya tagok 3%, glaong jang bruk patagok brei mesraiy ngak mbang kinh tế. Yaok pataom di Mintri padang ngak jeng brei mboh, jien mesraiy piah buh tame ngak mbang pablei salih sang danaok taneh riya tagok tui yaok bilan dalam thun 2020. Jien laba brei mesraiy di tanut biar di abih kuhria meng dahlau mai ngak ka jien salih tapa dom gah ngak mbang karei, dalam nan hu taneh riya. Ini jeng lac sa dalam dom makna ba tal tagok yaom taneh oh njauk haong yaom biak di nyu di dom labik dalam taneh ia.

Trang chủ di Sang putih brei thau lac Tổng thống Biden harei 15-4 (tui maong di pak ni) hu brei thau hatai khin pok 9 urang ngoại giao saong ngak bruk lambuak di dom negar. Ni lac mbang pilih ruah urang ngak lambuak di negar langiu camriep abih di ong Biden meng di tuk tagok rai di akaok thun ni. Dalam dom urang ngoại giao hu pilih ruah bahrau di ni, bruk njauk caik hatai nan lac bruk salih bahrau di Việt Nam. Ong Knapper kuhria lac meda salih ka bruk ngak lambuak negar di ong Daniel Kritenbrink, lac urang abih vaktu ngak bruk hadei di 3 thun ngak bruk di Việt Nam.

Thái Lan hu gac 1.582 urang njom COVID-19 dalam harei 16-4, dalam nan hu 1.577 urang njom dalam bhap bini saong 5 urang meng negar lingiu tame. Ini lac dom menuac njom mbak rilo abih dalam 1 harei kuhria meng tuk jit COVID-19 tamuh tabiak di Thái Lan saong lac harei ka 5 gam gam Thái Lan hu menuac njom ruak glaong abih dalam adit ini. Min akaok mintri Y tế Thái Lan Anutin Chanvirakul ndom lac rajaei jia lac yam tapa hu kan kandah di jit ruak urak ini bo oh cang pacang cakak taneh ia./.

Urang lang: Mousaphuong- Thu Thảo -17/4

HỆ PAPAR SAP BANGSA VOV4 BHUM BAN RAYA HCM

Labik daok: 7 Nguyễn Thị Minh Khai, Phường Bến Nghé, Quận 1, TP.Hồ Chí Minh
Pho Yam ndok PT : Nguyễn Ngọc Năm
Phaok yam ndok: Cao Thị Thoa, Trần Xuân Thân